ក្មេងកំព្រាថ្ងៃវាយប្រហារ ១១ កញ្ញា រស់នៅក្នុងភាពក្រីក្រជាង១០ឆ្នាំ អត់ដឹងមានទ្រព្យរាប់សែនដុល្លារ

2015-08-06 15:45:46
ចំនួនមតិ 0 | ចំនួនចែករំលែក 0

ចន្លោះមិនឃើញ

អស់រយៈពេល១៤ឆ្នាំហើយ ដែលព្រឹត្តិការណ៍ភេរវកម្មយន្តហោះបុកអគារពាណិជ្ជកម្មពិភពលោក នាថ្ងៃទី១១ ខែកញ្ញាឆ្នាំ ២០០១បានកន្លងផុតទៅ។ មនុស្សជាច្រើនបានស្លាប់ក្នុងហេតុការណ៍នោះដោយបន្សល់ទុកសាច់ញាតិដែលនៅសរស់ ក្នុងនោះមានក្មេងប្រុសកំព្រាបីនាក់ ដែលឪពុករបស់ពួកគេបានស្លាប់ក្នុងហេតុការណ៍ខាងលើ។ ពួកគេទាំងបីនាក់រស់នៅក្នុងភាពវេទនាក្រីក្រ ដោយពុំដឹងថាឪពុកគេបានរក្សាទ្រព្យសម្បត្តិទុកសម្រាប់ពួកគេនោះទេ។ រយៈពេលជាង១០ឆ្នាំ ទើបកូនកំព្រាបានទទួលមរតកដែលឪពុកបានបន្សល់ឲ្យ។

បុរសជាឪពុកឈ្មោះ John Holland បានស្លាប់នៅក្នុងការវាយប្រហារខាងលើ អំឡុងពេលធ្វើការក្នុងផ្ទះបាយនៅទីនោះ។ បុរសដែលបានស្លាប់នៅវ័យ៣០ឆ្នាំ បានបន្សល់ទុកកូនប្រុសបីនាក់ឲ្យនៅកំព្រា មាន Tyshawn Ward អាយុ១៤ឆ្នាំ, Dujon Holland អាយុ១៣ឆ្នាំ និងចុងក្រោយ Trent Ward អាយុ៩ឆ្នាំ (អាយុនៅពេលកើតហេតុ)។

កូនកំព្រាទាំងបីនាក់ បានរស់នៅក្នុងភាពវេទនាអស់ជាច្រើនឆ្នាំ ក្នុងផ្ទះដែលជាជំនួយរបស់រដ្ឋាភិបាលសម្រាប់អ្នកក្រីក្រ ដោយពុំដឹងថាពួកគេនៅមានទ្រព្យសម្បត្តិបន្សល់ពីឪពុករបស់ខ្លួននោះទេ។ ក្នុងឆ្នាំ២០០៤តុលាការបានប្រកាសសើរើទ្រព្យសម្បត្តិដែលបន្សល់ទុកឲ្យកូនប្រុសទាំងបីរបស់លោក Holland ប៉ុន្តែរកក្មេងប្រុសទាំងបីមិនឃើញ។ រហូតមកដល់ឆ្នាំ២០១៣ ទើបមេធាវី Salvatore Diliberto បានរកពួកគេឃើញ។

មកដល់ពេលនេះ ពួកគេបានទទួលប្រាក់របស់ខ្លួនហើយ គឺ Tyshawn មានអាយុ២៨ឆ្នាំ បានទទួលប្រាក់ចំនួន ៣៤៦ ៥៩៨,២៣ដុល្លារ Trent អាយុ២៣ឆ្នាំទទួលបាន ២៩៦ ០៧៤,២៩ដុល្លារ និង Dujon ២៧ឆ្នាំ ទទួលបាន៣៥៩ ៧៧៥,៦៧ ដុល្លារ។

គួរបញ្ជាក់ផងដែរថា សាច់ញាតិរបស់អ្នករងគ្រោះក្នុងព្រឹត្តិការណ៍វាយប្រហារអគារពាណិជ្ជកម្មពិភពលោកគឺមានសិទ្ធិទទួលបានទ្រព្យសម្បត្តិដែលបន្សល់ទុកសម្រាប់ទ្រទ្រង់ជីវភាពរបស់ពួកគេ៕

ចុចអាន៖ ជិត ៤លាននាក់ ចូលរួមព្យុហយាត្រាប្រឆាំងភេរវកម្មនៅប៉ារីស

ប្រែសម្រួល៖ មាន រតនា ប្រភព៖ dailymail