Samsung Galaxy S7 គឺ​ទំនង​ជា​ឈ្មោះកំពូល​ស្មាតហ្វូន​ជំនាន់​​បន្ទាប់​របស់​ក្រុមហ៊ុន​ Samsung ​ដែល​នឹង​បង្ហាញ​ខ្លួន​ក្នុង​ពេល​ខាង​មុខ​នេះ ​ដើម្បី​មក​ផ្ដួល​ iPhone 6s និង iPhone 6s Plus។ ទាក់​ទង​ទៅ​នឹង​ Galaxy S7 ថ្មីៗ​នេះ​ក៏​មាន​ព័ត៌មាន​មួយ​ចំនួន​បាន​បែក​ធ្លាយ​បង្ហាញ​ពី​លក្ខណៈ​សម្បត្តិ​ ដែល​នឹង​មាន​នៅ​លើ​ស្មាតហ្វូន​មួយ​នេះ  ​ក្នុង​នោះ​រួមមាន៖

ទំហំ​អេក្រង់ពីរ​ជម្រើស

ដូច​ទៅ​នឹង​ iPhone 6s និង 6s Plus ដែរ​ Galaxy S7 ​ ប្រហែល​ជា​​នឹង​ផលិត​ឡើង​ដោយ​មាន​ទំហំ​អេក្រង់​ពីរ​ជម្រើស​​ គឺ​ទំហំ ៥,២ ​អ៊ីញ​ និង ៥,៨ អ៊ីញ​  ដោយ ​​Galaxy S7 ដែល​មាន​ទំហំ​អេក្រង់ ៥,២ អ៊ីញនឹង​​​​មាន​កម្រិត​បង្ហាញ​​ ៨៤៧ ភិចស៊ែល​ក្នុង​មួយ​អ៊ីញ​ ហើយ​ Galaxy S7 ​ដែល​មាន​ទំហំ​អេក្រង់ ៥,៨​អ៊ីញ​វិញ​ នឹង​មាន​កម្រិត​បង្ហាញ​ដល់​ទៅ​ ៧៥៩ភិចស៊ែល​ក្នុង​មួយ​អ៊ីញ។ នេះ​បើ​តាម​របាយការណ៍​លើ​គេហទំព័រ​ G4Games។

​

កាមេរ៉ា​ភ្លោះ

​តាម​របាយការណ៍​ដោយឡែក​មួយ​ផ្សេង​ទៀត​​លើ​គេហទំព័រ​  G4Games​ បាន​ឲ្យ​ដឹង​ថា​ Galaxy S7 ​នឹង​បំពាក់​ដោយ​កាមេរ៉ា​ភ្លោះ​​​​ដើម្បី​បង្កើន​នូវ​គុណភាព​នៃ​ការ​ចាប់​​​យក​រូបភាព​ ក៏​ដូច​ជា​មុខងារ​បន្ថែម​ដើម្បី​ឲ្យ​ការ​ប្រើប្រាស់​បាន​កាន់​តែ​ស្រួល។

​ទំហំ​ម៉េមូរី

​ក្រុមហ៊ុន​ Samsung ទំនង​ជា​នឹង​​ប្ដូរ​កំណែ​ទម្រង់​ការ​រចនា Galaxy S7 ​​ផ្សេង​ពី​​​ Galaxy S6 និង​ Note 5។  មាន​ន័យ​ថា ​ក្រុមហ៊ុន​​គ្រោង​​នឹង​នាំ​យក​មក​វិញ​នូវ​ការ​បន្ថែម​​​រន្ធ​ microSD Card សម្រាប់​បន្ថែម​ទំហំ​ម៉េមូរី​​សម្រាប់​ Galaxy ជំនាន់​ក្រោយ​ គឺ Galaxy S7 នេះ។ ​​ដូច្នេះ​ Galaxy S7 ​ត្រូវ​បាន​គេ​រំពឹង​ទុក​ថា​ នឹង​អាច​បន្ថែម​ទំហំ​ម៉េមូរី​ដល់​ទៅ​ទំហំ 128GB។

លក្ខណៈ​ផ្សេងទៀត

ជា​មួយ​គ្នា​នេះ​​ដែរ​សម្រាប់​ប្រភេទ​ CPU ដែល​នឹង​បំពាក់​នៅ​លើ​ Galaxy S7 ​ប្រហែល​ជា​ប្រភេទ​ Snapdragon 820 ឬ Exynos M1។ ចំណែក​ឯ​​​​ទំហំ​ RAM វិញ  ​ស្រប​តាម​ការ​ប្រកាសរបស់​ក្រុមហ៊ុន​ Samsung ​កន្លង​ទៅថ្មីៗ​នេះ​ថា ​ខ្លួន​​​គ្រោង​នឹង​ផលិត​ RAM ទូរសព្ទ​ទំហំ 12 GB ​ប្រភេទ​ LPDDR4  ដូច្នេះ​វា​​ត្រូវ​បាន​គេ​សម្មត់ថា​​ Galaxy  S7 ប្រហែល​ជា​ស្មាតហ្វូន​ដំបូង​​​ដែល​នឹង​បំពាក់​ដោយ​ RAM ទំហំ 6 GB​​។ ហើយ​វា​នឹង​​ដំណើរការ​ដោយ​ប្រព័ន្ធ​ប្រតិបត្តិការ​ Android 5.1.1 Lollipop ។

កាល​បរិច្ឆេទ​ប្រកាស

ចំណែក​ឯ​​កាល​បរិច្ឆេទ​នៃ​ការ​ប្រកាស​វិញ​គឺ​ប្រហែល​ជា​មុន​ពេល​កំណត់ ​​បើ​ធៀប​នឹង​ការ​ប្រកាស​ Galaxy ជំនាន់​មុន​​ Galaxy S6 និង Galaxy S6 Plus ​បាន​ប្រកាស​ក្នុង​ខែ​មេសា ២០១៥។ ដូច្នេះ​​​ Galaxy S7 ប្រហែល​ជា​ប្រកាស​ក្នុង​​​ចន្លោះ​ខែ​កុម្ភៈ​ និង​ខែ​មីនា​ ២០១៦៕​​

អាន​បន្ត៖   ​iPhone 6s / 6s Plus បំពាក់​ RAM 2GB ថាមពល​ថ្ម​ទាបជា​ង​ម៉ូដែល​មុន ​​តែ​រយៈ​ពេល​ប្រើ​ដូច​គ្នា

ប្រែ​សម្រួល៖ សំនៀង

ប្រភព៖ yibada, christiantoday