វិធីធ្វើសក់រួញសំពោង ឲ្យរាបតាមធម្មជាតិ មិនចំណាយលុយកៀបសក់

2015-10-08 22:44:53
ចំនួនមតិ 0 | ចំនួនចែករំលែក 0

ចន្លោះមិនឃើញ

សក់ស្ងួត សក់រួញ ឬសំពោង ជាបញ្ហាមួយដែលមនុស្សស្រីមួយចំនួនបានជួបប្រទះ។ ក្រៅពីទៅកៀបសក់នៅហាង អ្នកក៏អាចសាកវិធីងាយៗមួយចំនួនដោយខ្លួនឯង ដែលធ្វើឲ្យសក់ត្រង់តាមធម្មជាតិ។

១. ស៊ុត

ស៊ុតផ្ដល់នូវសារធាតុបំប៉នសក់ដែលធ្វើឲ្យសក់ភ្លឺរលោង។ យកស៊ុតលាយទឹកបន្តិចវាយកូរឲ្យសព្វរួចយកមកម៉ាស្សាលើសក់ក្បាលថ្នមៗ។ លាងជម្រះនឹងទឹកឲ្យស្អាតរួចកក់សក់នឹងក្រែមបន្ទន់សក់ ប៉ុន្តែចៀសវាងការកក់សាប៊ូទើបទទួលបានប្រសិទ្ធភាព។

២. ទឹកខ្មេះ (ផ្សំពីផ្លែប៉ោម)

ទឹកខ្មេះជាផលិតផលធម្មជាតិពិសេសមួយដែលជួយធ្វើឲ្យសក់ត្រង់តាមធម្មជាតិ។ វាមានសារធាតុប្រឆាំងនឹងអង្គែលើស្បែកក្បាលជួយឲ្យសក់ភ្លឺរលោង។ លាយទឹកខ្មេះ (ផ្សំពីផ្លែប៉ោម) មួយស្លាបព្រាបាយជានឹងទឹកលាបលើសក់រយៈពេល៥នាទីរួចលាងជម្រះនឹងទឹកចោលនឹងឃើញពីប្រសិទ្ធភាព។

៣. ចេក

ចេកជាក្រែមបន្ទន់សក់ល្អពីធម្មជាតិ។ វាជួយកម្ចាត់សក់ស្ងួតនិងសក់រួញបាន។ លាយចេកមួយផ្លែជាមួយទឹកឃ្មុំ និងប្រេងអូលីវឲ្យក្លាយជាល្បាយម៉ត់។ យកល្បាយនោះមកលាបសក់រួចទុករយៈពេល២០នាទីដើម្បីឃើញនូវលទ្ធផលសក់ត្រង់។

៤. ប្រេងដូងឬប្រេងផ្លែអាវូកាដូ

សារធាតុនៃប្រេងធម្មជាតិទាំងនេះជួយកម្ចាត់បញ្ហាសក់រួញ និងធ្វើឲ្យសក់ភ្លឺរលោង។ អាចយកប្រេងដូងបន្តិចមកម៉ាស្សាលើសក់ និងស្បែកក្បាលរយៈពេល២០ទៅ៤០នាទីមុនពេលកក់សក់នឹងសាប៊ូកក់សក់និងក្រែមបន្ទន់សក់។ វិធីមួយទៀតគឺ លាយប្រេងដូងបន្តិចជាមួយនឹងសាប៊ូកក់សក់តែម្ដងដែលបង្កើនជាសំណើមដល់សក់។ ម៉ាស្សាថ្នមៗលើសក់រួចទុកចោលបន្តិចនិងលាងជម្រះនឹងទឹកស្អាត។

ចំណាំ៖ ចៀសវាងកក់សាប៊ូកក់សក់រៀងរាល់ថ្ងៃ ព្រោះថាសាប៊ូកក់សក់ញឹកញាប់ពេកជាមូលហេតុធ្វើឲ្យសក់ខូចទៅជាស្ងួតនិងរួញ។ គប្បីជ្រើសរើសសាប៊ូកក់សក់ណាដែលមានសារធាតុស្រាលៗ៕

ចុចអាន៖ វិធីធម្មជាតិបណ្ដុះសក់ឱ្យក្រាស់ជាងមុន

ចុចអាន៖ ៥ចំណុចគួរដឹង មុនពេលហាយឡាយសក់

ប្រែសម្រួល៖ មាន រតនា ប្រភព៖ inminutes