ប្រិយមិត្ត​ស្ដាប់​ហើយ​ ច្បាស់​​ជា​មាន​អារម្មណ៍​​នឹក​ចង់​សើច​ជាមួយ​ប្រធាន​បទ​មួយ​នេះ​ជាក់​ជា​មិន​ខាន តែ​​នេះ​ជា​រឿង​ពិត​ដែល​កើត​មាន​​ពិត​មែន​​ ទាក់​ទង​ទៅ​នឹង​ការ​ដាក់​ឈ្មោះ​ប្លែកៗ​នៅ​ក្នុង​លើ​បណ្ដាញ​សង្គម​​ facebook។

មាន​អ្នក​ខ្លះ​ចូល​ចិត្ត​ដាក់​ឈ្មោះ​តាម​ត្រង់ ​ដោយ​ឡែក​អ្នក​ខ្លះ​ទៀត​​មិន​អញ្ចឹង​ទេ ចូល​ចិត្ត​ដាក់​ឈ្មោះ​ប្លែកៗ ហើយ​រឹត​តែ​ប្លែក​ទៀត​នោះ គឺ​ឈ្មោះ​ខ្លះ​ដាក់​ចេញ​មក​​ធ្វើ​ឲ្យ​គេ​ដឹង​ច្បាស់​​​ភ្លាម​ថា​ អ្នក​កំពុង​តែ​នៅ​ខ្លួន​មួយ​ និយាយ​ឲ្យ​ចំ គឺ​នៅ​លីវ​​ គ្មាន​គូ​ ឬ​ក៏​កំពុង​តែ​ស្វែង​រក​ដៃ​គូ​ទៀត​ផង។

តើ​មាន​ឈ្មោះ​អ្វី​ខ្លះ​ទៅ​ហ្ន៎​ ដែល​ដាក់​នៅ​ក្នុង facebook ហើយ​ធ្វើ​ឲ្យ​គេ​យល់​ថា ​អ្នក​មិន​ទាន់​មាន​គូ?​​

១. ឲ្យ​តែ​មាន​​ពាក្យ​ថា​ single នៅ​ពី​ក្រោយ​​ដាក់​ទៅ​អត់​ចេះ​ខុស​ទេ

​កញ្ញា ងី សុជាតា អាយុ​ ២០ ឆ្នាំ និស្សិត​ឆ្នាំ​ទី​ ១​ នៃ​វិទ្យាស្ថាន​វ៉ាន់​ដា បាន​ប្រាប់​ពី​ការ​ដាក់​ឈ្មោះ​ឲ្យ​​គេ​មើល​ទៅ​ដឹង​ថា​ យើង​នៅ​ទំនេរ​ថា៖​ ទាំង​ខ្ញុំ​ទាំង​គេ​ឲ្យ​តែ​ឃើញ​ឈ្មោះ​​នៅ​ក្នុង​ FB របស់​គេ​​មាន​ពាក្យ​ថា​ single ច្បាស់​ជា​គិត​ថា​អ្នក​ហ្នឹង​នៅ​ទំនេរ​ហើយ។ គិត​មើល​ទៅ​បើ​សិន​ជា​គេ​មាន​គូ​ហើយ​ សង្សារ​គេ​ប្រាកដ​ជា​មិន​ព្រម​ឲ្យ​គេ​ដាក់​ឈ្មោះ​នៅ​ single អញ្ចឹង​ទេ​ ព្រោះ​ខ្លាច​មាន​គេ​តាម​ស្រលាញ់។

២. No Honey

សម្បុរ​ស្រអែម​ សក់​រួញ​អង្គាដី​យុវជន អៀង ចំរើន អាយុ​ ២៣ ឆ្នាំ​ និស្សិត​នៃ​សាកល​វិទ្យាល័យ​បញ្ញាសាស្ត្រ​កម្ពុជា​ បាន​និយាយ​ថា៖ ច្បាស់​ណាស់​អ្នក​ណា​ក៏​​អាច​កាត់​យល់​បាន​ដែរ​ ពាក្យ​ថា​ No Honey នេះ​ខ្មែរ​គេ​បក​ប្រែ​ថា​ គ្មាន​សង្សារ។ បើ​អ្នក​គេ​ឆ្លាត​​ គ្រាន់​តែ​ឃើញ​ឈ្មោះ​ FB គេ​ដាក់​អញ្ចឹង​ គេ​​ច្បាស់​ជា​ដឹង​មុន​ថា ដូច​បើក​ភ្លើង​ខៀវ​ហើយ​ម្នាក់​ហ្នឹង​ប្រហែល​ជា​មិន​ទាន់​មាន​សង្សារ​ទេ​ បាន​ជា​ដាក់​ឈ្មោះ​​អញ្ចឹង។

៣. Forever alone

ដោយ​ឡែក​ យុវជន ពិសិដ្ឋ អាយុ​២២ឆ្នាំ និស្សិត​​ច្បាប់​នៃ​សាកលវិទ្យាល័យ​ចំរើន​ពហុ​បច្ចេកវិទ្យា បាន​លើក​ឡើង​ថា៖ "ខ្ញុំ​ឃើញ​មិត្តភ័ក្តិ​​មួយ​ចំនួន​នៅ​ក្នុង​ FB គេ​ចូល​ចិត្ត​ដាក់​ឈ្មោះ​​​ថា forever alone ឬ​ក៏​ lonely ហើយ​គេ​ប្រាប់​ខ្ញុំ​ថា​ តាំង​ពី​គេ​ប្ដូរ​ឈ្មោះ​បែប​កម្សត់​ៗ​​មើល​ទៅ​ទំនង​ថា​អត់​សង្សារ​មក​ សំបូរ​​ស្រីៗ​​លេង​ chatជាមួយ​គេ​ណាស់"។ ប្រហែល​ជា​គេ​គិត​ថា​ ឈ្មោះ​បែប​ហ្នឹង​អត់​មាន​សង្សារ​មែន​ហើយ​មើល​ទៅ។

៤. No heart

​​​​ដោយ​ឡែក​ឈ្មោះ​ដែល​ដាក់​ចេញ​មក​ ដូច​ជា​ No heart ក៏​ឃើញ​មាន​អ្នក​និយម​លេង​ FB មួយ​ចំនួន​ប្រើ​ច្រើន​ដែរ។ ជួប​ជាមួយ​ យុវជន រស់ ពុទ្ធី អាយុ​២២ឆ្នាំ បាន​ប្រាប់​ថា៖ សព្វ​ថ្ងៃ​ខ្ញុំ​ប្រើ​ប្រាស់​ account fb ពីរ មួយ​ដាក់​ឈ្មោះ​ពិត​ ឯ​មួយ​ទៀត​ជា​ account ក្លែង​ក្លាយ​​មាន​ដាក់​ថា​ no heart ហើយ​ដាក់​រូប​ប្រុស​ស្អាត។ ពុទ្ធី​ បាន​បន្ថែម​ទៀត​ថា​ "ខ្ញុំ​​យល់​ថា​ ការ​ដាក់​ឈ្មោះ​បែប​ហ្នឹង​ពិត​ជា​មាន​ភាព​ទាក់​ទាញ​ខ្លាំង​មែន ព្រោះ​ឲ្យ​តែ​​ឈ្មោះ​បែបៗ​ហ្នឹង​ មិត្តភ័ក្តិ​នៅ​ក្នុង​ FB យើង​ច្បាស់​ជា​គិត​ថា​ យើង​គ្មាន​សង្សារ​ទេ"។

៥. Need love ​

"ឈ្មោះ​នៅ​ក្នុង​ FB ដែល​ដាក់​ថា​ need love នេះ​ក៏​ជា​ឈ្មោះ​មួយ​ដែល​ទាក់​ទាញ​ខ្លាំង​ដែរ គ្រាន់​តែ​ឃើញ​ភ្លាម​ គេ​ច្បាស់​ជា​គិត​ថា​ អ្នក​កំពុង​តែ​ត្រូវ​ការ​​ដៃ​គូ​ស្នេហា​ហើយ​មើល​ទៅ"។ នេះ​ជា​ការ​លើក​ឡើង​​របស់ ភួង ចាន់សេង អាយុ​២៤ឆ្នាំ​ សព្វ​ថ្ងៃ​ជា​អ្នក​បក​ប្រែ​ភាសា​អង់​គ្លេស​នៅ​ក្រុម​ហ៊ុន​ទេសចរណ៍​មួយ។

ទាំង​អស់​នេះ​ គ្រាន់​តែ​ជា​ការ​លើក​ឡើង​របស់​យុវជន​មួយ​ចំនួន​ ដែល​ពួក​គាត់​កត់​សម្គាល់​ឃើញ​ថា​ ​ការ​ដែល​ដាក់​ឈ្មោះ​នៅ​ក្នុង​​ FB ពិត​ជា​អាច​បញ្ជាក់​ឲ្យ​គេ​បាន​ដឹង​ថា​ យើង​នៅ​ទំនេរ​ ឬ​មាន​គូ​ហើយ។

ចុះ​ប្រិយមិត្ត​វិញ​ មាន​ដឹង​​ឈ្មោះ​អ្វី​ផ្សេង​ទៀត​ដែល​ អ្នក​អត់​គូ​និយម​ដាក់​នៅ​ក្នុង​ FB ដែល​ឬ​ទេ​ ជួយ​ប្រាប់​ផង​មើល៍!

អត្ថបទ៖ យិន សំបូរ​​​