ត្រឹមគូសង្សារសោះហៅគ្នាថា ប្តីប្រពន្ធៗពេញមាត់ តើពួកគេពិតជាធ្លាប់បាននែ…!

2014-10-22 15:45:19
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវវ័យសម័យឥលូវនិយមចូលចិត្តហៅគ្នាថា ប្តីប្រពន្ធពេញៗមាត់ ដោយមិនមានការអៀនខ្មាសឡើយ ខណៈដែលពួកគេមានទំនាក់ទំនងត្រឹមតែសង្សារជាមួយគ្នាតែប៉ុណ្ណោះ។ សញ្ញាណបែបនេះហើយ ទើបធ្វើឲ្យមានជាសំនួរលើកឡើងថា តើសង្សារដែលមានទំនាក់ទំនងស្អិតរមួត ដល់ថ្នាក់ហៅគ្នាបែបហ្នឹង ពួកគេសុទ្ធតែធ្លាប់ឆ្លងកាត់ធ្វើអីៗ ដូចជាប្ដីប្រពន្ធជាមួយគ្នាឬ ទើបបានជាហ៊ានហៅគ្នាអញ្ចឹង?

និយាយដល់ចំណុចនេះ ត្រូវបានយុវជនមួយចំនួនបញ្ចេញទស្សនៈខុសៗគ្នា ដូចខាងក្រោម៖

រូបតំណាង

យុវជន យឿន យឿត អាយុ ២២ ឆ្នាំ ជានិស្សិតសិក្សាផ្នែកមេកានិច នៃវិទ្យាស្ថានបច្ចេកវិទ្យាកម្ពុជា (សាលាតិចណូ) បានបញ្ចេញទស្សនៈថា៖ "ខ្ញុំជឿលើការលើកឡើងនេះ ព្រោះខ្ញុំសង្កេតឃើញថា យុវជនសម័យឥលូវភ្លើតភ្លើនណាស់ ហើយបើនិយាយដល់បញ្ហានោះវិញ ពួកគេមួយចំនួនងាយនឹងបណ្ដែតបណ្ដោយខ្លួនឲ្យឈានទៅដល់ការប្រឡូកក្នុងការរួមភេទខ្លាំងណាស់ បើទោះបីជាពួកគេស្រលាញ់គ្នាត្រឹមតែជាសង្សារក៏ដោយ "។

ឧទាហរណ៍ ដូចជាមិត្តភ័ក្រខ្ញុំជាដើម ស្គាល់គ្នាតាមទូរសព្ទសោះខលទៅមកៗ មិនបានយូរប៉ុន្មានផង ហ៊ានដល់ថ្នាក់ប្រើពាក្យថា ប្តីប្រពន្ធជាមួយនារីនោះ ក្រោយមក គាត់ប្រាប់ខ្ញុំថា ពួកគាត់បានឆ្លងកាត់អីៗជាមួយគ្នា។

សបុរស មុខស្រដៀង និង កូនកាត់ចិន កញ្ញា សុខគៀង អាយុ ២៣ ឆ្នាំ ជានិស្សិតផ្នែកសេដ្ឋកិច្ច នៃសាកលវិទ្យាល័យពុទ្ធិសាស្ត្រ បានប្រាប់ឲ្យដឹងថា៖ " ខ្ញុំមិនធ្វើការបដិសេធចំពោះការលើកឡើងនេះទេ ប៉ុន្តែខ្ញុំយល់ថា វាកើតមានចំពោះតែយុវវ័យដែលមានការភ្លើតភ្លើនមួយចំនួនតូចតែប៉ុណ្ណោះ យើងមិនអាចធ្វើការវាយតម្លៃជារួមបានដែរ"។

សុខគៀង បានបន្ថែមឲ្យដឹងទៀតថា៖ " ការណ៍ដែលឈានដល់ការរួមភេទក្នុងស្រទាប់យុវវ័យបច្ចុប្បន្ន គឺដោយសារតែ ពួកគេនៅក្មេងពេក មានការយល់ដឹងតិច ចូលចិត្តលេងសើច ដើរលេងច្រើន ទើបឆាប់ពាក់ព័ន្ធនិងការរួមភេទអញ្ចឹង"។

ផ្ទុយពីយុវជនខាងលើ កញ្ញា លី ប៉ោជូ អាយុ១៩ឆ្នាំ និស្សិតជំនាញទំនាក់ទំនងអន្តរជាតិ នៃសាកលវិទ្យាល័យបញ្ញាសាស្ត្រកម្ពុជា បានប្រាប់ឲ្យដឹងថា៖ "គ្រាន់តែប្រើពាក្យថាប្តីប្រពន្ធ ក្នុងដំណាក់កាលជាគូរសង្សារ ដូចជាមិនអាចឈានដល់ការរួមភេទជាមួយគ្នានោះទេ មានអ្នកខ្លះក៏គេស្រលាញ់គ្នាត្រឹមចិត្ត និងចិត្តដែរ"។ ប៉ោជូ បានក្រើនរំលឹកផងដែរថា៖ "យុវវ័យដែលស្ថិតក្នុងវ័យត្រឹមជាគូរសង្សារ មិនគួរណាប្រឡូកនិងការរួមភេទទេ ជាពិសេសគឺខាងស្រី ត្រូវចេះគ្រប់គ្រងអារម្មណ៍ និងកាយវិការខ្លួនឯង មិនគួរប្រថុយនៅកន្លែងស្ងាត់តែពីរនាក់ តែត្រូវបង្វែរមកផ្ដោតលើការសិក្សាវិញល្អជាង"។

មានទស្សនៈនៅកណ្តាល កញ្ញា ជ្រឹង មីមី ជានិស្សិតឆ្នាំទី ១ ជំនាញគណនេយ្យ នៃវិទ្យាស្ថានជាតិពាណិជ្ជសាស្ត្របាននិយាយថា៖ "រឿងគូរសង្សារដែលធ្លាប់ឆ្លងកាត់ការរួមភេទជាមួយគ្នា ហើយហៅគ្នាថាប្តីប្រពន្ធ ខ្ញុំយល់ថាវាកើតឡើងចំពោះតែ អ្នកដែលចូលចិត្តដើរលេងសប្បាយតែប៉ុណ្ណោះ ប៉ុន្តែអ្នកខ្លះគេស្រលាញ់គ្នាជាគូរសង្សារនិងគ្នាយូរយ៉ាងណា ក៏គេមិនបណ្ដែតបណ្ដោយឲ្យឈានដល់ការរួមភេទដែរ"៕

មែនអត់ ដែលថាសង្សារ ហៅគ្នាថាប្តីប្រពន្ធពេញៗមាត់មួយចំនួន ពួកគេសុទ្ធតែធ្លាប់ឆ្លងកាត់រឿងនោះជាមួយគ្នា?

អត្ថបទ៖ យិន សំបូរ