ជៀប គន្ធា គ្មានជំនាញ IT អាចបង្កើត App រៀនតែតាម YouTube

2016-01-13 14:30:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ជៀប គន្ធា បានស្រាវជ្រាវបង្កើត App លើទូរសព្ទ Android តាមក្តីស្រមៃបានសម្រេចទាំងខ្លួនមិនដែលរៀនជំនាញ IT ទាល់តែសោះ។ គ្រាន់តែមើលតាមការណែនាំពី YouTube និងវេបសាយផ្សេងៗ យុវជនវ័យក្មេងរូបនេះអាចបង្កើត App សិក្សាជាច្រើនដែលអាចប្រើជាជំនួយសម្រាប់សិស្សសិក្សានៅកម្រិតវិទ្យាល័យ។

តើមានមូលហេតុអ្វីដែលបណ្ដាលចិត្តឲ្យយុវជនវ័យក្មេងរូបនេះមានសមត្ថភាពអាចបង្កើត App មួយបាន បើទោះបីខ្លួនមិនមានចំណេះជំនាញ IT ទាល់តែសោះ?

គន្ធា ដែលសិក្សាជំនាញឧស្សាហកម្មប្រាប់ថា ការដែលបណ្ដាលចិត្តគេបង្កើត App សម្រាប់សិស្សកម្រិតវិទ្យាល័យដាក់ក្នុងប្រព័ន្ធប្រតិបត្តិការ Android នេះឡើងព្រោះតែការស្រឡាញ់វិស័យបច្ចេកវិទ្យា និងក្នុងគោលបំណងចង់ឲ្យមានកម្មវិធីអប់រំជាភាសាខ្មែរនៅលើអ៊ីនធឺណិតកាន់តែច្រើនដើម្បីជួយសម្រួលក្នុងការស្រាវជ្រាវដល់សិស្សជំនាន់ក្រោយ។

អតីតសិស្សពូកែគណិតវិទ្យារូបនេះរៀបរាប់បន្តថា ការបង្កើត App នេះ ជួបការលំបាកច្រើន។ ម៉្យាងលោកគ្មានមូលដ្ឋានជំនាញ IT ទេប៉ុន្តែដោយសារចិត្តស្រឡាញ់ជំនាញនេះទើបព្យាយាមសាកល្បងធ្វើរហូតបានសម្រេច។

ពេលទំនេរពីការសិក្សា គន្ធា តែងតែទៅហាងកាហ្វេណាដែលមានអ៊ីនធឺណិតដើម្បីរៀនពីការសរសេរកូដ និងតិចនិកក្នុងការបង្កើត App។ លើ Youtube ដែលមានការបង្ហាញណែនាំនិងវិបសាយផ្សេងៗដែលមានឧទាហរណ៍ស្រាប់ គន្ធាបានព្យាយាមរៀនអនុវត្តនិងព្យាយាមបំបែកដោយខ្លួនឯង។

ដោយមានការប្រឹងប្រែងរួមទាំងភាពឈ្លាសវៃផងនោះ គន្ធា អាចបង្កើត App បានសម្រេចសម្រាប់ប្រើនៅលើ Play Store ដោយគិតមកទល់ពេលនេះបង្កើតសរុបបាន ១១ App។

យុវជនអ្នកខេត្តកំពង់ធំរូបនេះបញ្ជាក់ថា ការបង្កើត App មួយៗត្រូវការចំណាយពេលប្រហែលមួយសប្តាហ៍។

កម្មវិធីដែលវិស្វកររូបនេះបានចងក្រងអាចប្រើប្រាស់គ្រប់កម្រិត រាប់តាំងពីថ្នាក់អនុវិទ្យាល័យ ដល់វិទ្យាល័យ។ កម្មវិធីបានភ្ជាប់ជាមួយរូបមន្តសង្ខេប លំហាត់ដោះស្រាយ កម្រងវិញ្ញាសាប្រឡងសិស្សពូកែប្រចាំឆ្នាំ វិញ្ញាសាត្រៀមប្រឡងបាក់ឌុប វិញ្ញាសាត្រៀមប្រឡងអាហារូបករណ៍ទៅបរទេស ប្រឡងចូលសាលាពេទ្យជាដើម។

ដោយមើលឃើញពីតម្រូវការស្រាវជ្រាវតាមអ៊ីនធឺណិតមានការកើនឡើង អតីតសិស្សពូកែគណិតវិទ្យា ដែលមានស្រុកកំណើតនៅឯស្រុកបារាយ ខេត្តកំពង់ធំរូបនេះនិងប្រឹងប្រែងស្រាវជ្រាវប្រមូលផ្ដុំរូបមន្ត និងលំហាត់ទាំងក្នុងសៀវភៅ និងតាមអ៊ីនធឺណិតបន្ថែមទៀតដើម្បីពង្រីកចំណេះដឹង និងជាចំណែកមួយក្នុងការអភិវឌ្ឍប្រទេសជាតិឲ្យកាន់តែសម្បូរធនធានមនុស្ស។

បន្តអាន៖ កម្មវិធីថ្មីល្អជំនួយសម្រាប់សិស្សនៅកម្រិតវិទ្យាល័យ

អត្ថបទ៖ រក្សា