សេរ៉ូមអេបូឡា សម្រាប់អ្នកជំងឺអាហ្វ្រិក នឹងមានឆាប់ៗនេះ

2014-10-22 17:33:31
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គការសុខភាពពិភពលោក (WHO) បានប្រកាសថា សេរ៉ូមធ្វើពីឈាមអ្នកជាសះស្បើយពីជំងឺអេបូឡា នឹងមាននៅលីបេរីយ៉ា ដែលជាប្រទេសទទួលរងគ្រោះខ្លាំងបំផុតនៅអាហ្វ្រិកខាងលិច ក្នុងប៉ុន្មានសប្ដាហ៍ខាងមុខ។

អេបូឡា

លោកស្រីវេជ្ជបណ្ឌិត Marie Paule Kieny ជំនួយការអគ្គនាយកប្រព័ន្ធសុខាភិបាល និងកំណែទម្រង់ របស់ WHO មានប្រសាសន៍ថា ការងារនេះនឹងមានដំណើរការណ៍ឆាប់រហ័ស ដើម្បីទទួលបានថ្នាំ និងវ៉ាក់សាំង សម្រាប់ខែមករា ឆ្នាំ២០១៥ខាងមុខ។

ចំពោះសេរ៉ូម បើសិនអ្នកជំងឺបានទទួល ហើយអាចយកឈ្នះការឆ្លង មានន័យថា រាងកាយពួកគេ នឹងរៀនពីរបៀបប្រយុទ្ធប្រឆាំងវីរុស ហើយខ្លួនរបស់ពួកគេ នឹងមានអង់ទីគ័រក្នុងឈាម អាចប្រឆាំងជំងឺអេបូឡាបាន។

ពេលនោះគ្រូពេទ្យ អាចយកគំរូឈាមរបស់ពួកគេ ហើយបញ្ចូលក្នុងសេរ៉ូម រួចយកកោសិកាឈាមក្រហមចេញ ដោយទុកតែអង់ទីគ័រសំខាន់ៗ ដើម្បីយកទៅព្យាបាលអ្នកជំងឺផ្សេងទៀត។

គិលានុបដ្ឋាយិកាអេស្ប៉ាញមួយរូប បានក្លាយជាមនុស្សទី១ ឆ្លងអេបូឡាក្រៅទ្វីបអាហ្វ្រិក ដែលត្រូវបានគេធ្វើតេស្តឃើញមានផ្ទុកវីរុសនេះ ហើយបន្ទាប់មកត្រូវគេរាយការណ៍ថា គ្រូពេទ្យនេះទទួលបានសេរ៉ូម មានអង់ទីគ័ររបស់អ្នកជាពីជំងឺអេបូឡា។

លោកស្រីវេជ្ជបណ្ឌិត Kieny ថ្លែងថា ការព្យាបាលគ្មានគ្រោះថ្នាក់អ្វីទេ ព្រោះ WHO បានចេញគោលការណ៍ណែនាំរួចហើយ ដើម្បីធានាបានសុវត្ថិភាព។ អ្នកបរិច្ចាគឈាមផ្សេងទៀត ចាំបាច់ត្រូវពិនិត្យរកមេរោគឆ្លងដូចជា អេដស៍ និងថ្លើមជាដើម។

លោកស្រីបន្តទៀតថា លោកស្រីបានធ្វើតេស្តនូវវ៉ាក់សាំងអេបូឡាចំនួនពីរ ដែលនឹងចេញលទ្ធផលមុនឆ្នាំក្រោយ តែយ៉ាងណា គ្រូពេទ្យនឹងធ្វើតេស្តមុន ដើម្បីឱ្យដឹងថា វ៉ាក់សាំងទាំងនេះ មានសុវត្ថិភាពដល់មនុស្ស។

អង្គការសុខភាពពិភពលោក WHO បង្ហាញថា៖" ការពិសោធន៍នឹងចាប់ផ្ដើម នៅពីរសប្ដាហ៍ខាងមុខ...ហើយនឹងបន្តដល់រយៈពេល៦ខែ រហូត១ឆ្នាំ ហើយនឹងចេញលទ្ធផលស្ដីពីសុវត្ថិភាពមុន ដើម្បីកំណត់កម្រិតដូស នៅចុងឆ្នាំនេះ"។

ការរីករាលដាលនៃវីរុសអេបូឡាមកទល់ពេលនេះ បានសម្លាប់មនុស្សច្រើនជាង៤៥០០នាក់ ដែលភាគច្រើន ជាប្រជាជននៅហ្គីណេ លីបេរីយ៉ា និងសៀរ៉ាឡេអូន៕