ហេតុផល ៣ ចំណុច ញ៉ាំងឲ្យកំណើននៃការធ្វើ និង ប្ដូរអត្តសញ្ញាណប័ណ្ណថ្មីធ្លាក់ចុះដើមឆ្នាំនេះ

2016-01-29 17:24:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ចូលមកដល់ឆ្នាំ ២០១៦ សន្ទុះនៃការមកធ្វើប័ណ្ណ និង ប្ដូរអត្តសញ្ញាណប័ណ្ណថ្មី មានចំនួនធ្លាក់ចុះ។ ធ្លាក់ចុះដោយសារតែហេតុផល ៣ ចំណុច ដូច្នេះហើយមន្ត្រីធ្វើការជំនាញខាងអត្តសញ្ញាណប័ណ្ណអំពាវនាវឲ្យប្រជាពលរដ្ឋចូលរួមមកធ្វើប័ណ្ណ និង ប្ដូរអត្តសញ្ញាណប័ណ្ណថ្មី។

ឯកឧត្ដម នាយឧត្ដមសេនីយ៍ ម៉ៅ ច័ន្ទតារា អគ្គនាយកនៃអគ្គនាយកដ្ឋានអត្តសញ្ញាណកម្ម បានមានប្រសាសន៍ថា សន្ទុះនៃការមកធ្វើអត្តសញ្ញាណប័ណ្ណថ្មី និង ប្ដូរប័ណ្ណ ច្រើនគឺនៅចន្លោះខែ សីហា ដល់ ខែវិច្ឆិកា ឆ្នាំ ២០១៥។ ប៉ុន្ដែ ចូលមកដល់ដើមឆ្នាំ ២០១៦ តួលេខបង្ហាញថា អ្នកមកធ្វើអត្តសញ្ញាណប័ណ្ណបានធ្លាក់ចុះ។ ការធ្លាក់ចុះនេះអាចបណ្ដាលមកពីមូលហេតុបីចំណុច៖

ទី១. ប្រជាពលរដ្ឋរវល់ប្រមូលផលកសិកម្ម ទី២. ប្រជាពលរដ្ឋចំណាកស្រុកច្រើន (ផ្អែកតាមរបាយការណ៍ពលករចំណាកស្រុកមានជាង ៧០ ម៉ឺននាក់ ដោយមិនទាន់រាប់អ្នកទៅធ្វើពលករមិនស្របច្បាប់ផង)។ ក្នុងចំណោមពលករចំណាកស្រុកនេះ គឺមាន ៣០% នៅមិនទាន់មានអត្តសញ្ញាណប័ណ្ណ តែ៧០ % គឺមានអត្តសញ្ញាណប័ណ្ណ តែពួកគាត់អត់ទាន់មកប្ដូរប័ណ្ណថ្មី។ ទី៣. វ័យចំណាស់៖ ពលរដ្ឋដែលមានវ័យចាប់ពី ៦០ ឆ្នាំឡើងទៅ គឺគាត់ប្រកាន់ទស្សនៈថា ចាស់ហើយដូច្នេះមិនចង់មកធ្វើប័ណ្ណថ្មីនោះទេ ដោយទុកឲ្យក្មេងៗធ្វើវិញ។

ខាងក្រោមនេះ គឺជា គំរូអត្តសញ្ញាណប័ណ្ណថ្មី

ប្រសិនបើតួលេខនៅតែមានចំនួនអ្នកមកធ្វើប័ណ្ណថ្មី ឬ ប្ដូរអត្តសញ្ញាណប័ណ្ណទៀតនោះ គឺផែនការនៃការធ្វើអត្តសញ្ញាណប័ណ្ណ ឬ ប្ដូរអត្តសញ្ញាណប័ណ្ណថ្មីនឹងមិនសម្រេចដូចបំណង ដែលកំណត់ឲ្យប្រជាពលរដ្ឋទាំងអស់មានប័ណ្ណថ្មីនៅដំណាច់ឆ្នាំ ២០១៦នោះទេ។ ដើម្បីសម្រេចបានផែនការនេះ ឯកឧត្ដម នាយឧត្ដមសេនីយ៍ ម៉ៅ ច័ន្ទតារា អំពាវនាវឲ្យអាជ្ញាធរមូលដ្ឋានទូទាំងប្រទេសបង្កើនយុទ្ធនាការផ្សព្វផ្សាយជូនប្រជាពលរដ្ឋ ដើម្បីឲ្យពលរដ្ឋទាំងអស់យល់ពីតម្លៃនៃការធ្វើអត្តសញ្ញាណប័ណ្ណនេះ។

អគ្គនាយកនៃអគ្គនាយកដ្ឋានអត្តសញ្ញាណកម្ម បានបង្ហាញតួលេខឲ្យដឹងថា ចាប់តាំងពីផ្ដើមយុទ្ធនាការធ្វើអត្តសញ្ញាណប័ណ្ណថ្មី ២០១២ មក គឺរហូតមកទល់នឹងពេលនេះ គឺនៅសល់ប្រហែលជិត ៣ លាននាក់នាក់ ហើយប្រជាពលរដ្ឋក្រោម ១ លាននាក់បានធ្វើចំណាកស្រុកដែលពុំទាន់បានមកធ្វើអត្តសញ្ញាណប័ណ្ណ ឬ ប្ដូរប័ណ្ណថ្មីនៅឡើយ៕ នេះជា បញ្ជីឈ្មោះមន្រ្តីទាំង ២៥ រាជធានី-ខេត្ត ហើយប្រសិនបើប្រជាពលរដ្ឋមិនច្បាស់ព័ត៌មានធ្វើអត្តសញ្ញាណប័ណ្ណសញ្ជាតិខ្មែរ អាចទាក់ទងលេខខាងក្រោមនេះ៖