ឯកអគ្គរាជទូតថៃ និង ឌី សាវ៉េត បង្ហើបរឿងខ្មែរដំបូងល្បីខ្លាំង

2016-02-17 15:01:15
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Nuttavudh Photisare អគ្គរាជទូតថៃ បានរំលឹកទៅដល់រឿងខ្មែរមួយរឿងមានចំណងជើងថា " ជីវិតផ្សងព្រេង" ទទួលបានការគាំទ្រខ្លាំង នៅប្រទេសថៃអំឡុងមុនសង្គ្រាមឆ្នាំ១៩៧៥។

អគ្គរាជទូតថៃបន្ថែមទៀតថា រឿងនេះបានធ្វើឲ្យប្រជាជនខ្មែរ និងថៃមានទំនាក់ទំនងគ្នាល្អ និងកាន់តែស្គាល់ជនជាតិខ្មែរតាមរយៈការផលិតរឿងរួមគ្នាមួយនេះ។

(លោក Nuttavudh Photisare អគ្គរាជទូតថៃ អង្គុយពាក់អាវក្រៅពណ៌ខ្មៅ)

អគ្គរាជទូតថៃ នេះបន្តឲ្យដឹងទៀតថា "កាលនោះ មានតារាសម្ដែងជើងចាស់របស់ខ្មែរ គឺអ្នកស្រី ឌី សាវ៉េត ជា យុទ្ធថន បានទៅចូលរួមផងដែរ។ គ្រានោះប្រជាជនថៃ និងខ្មែរមានទំនាក់ទំនងគ្នាល្អណាស់ ហើយវិស័យកុនខ្មែរគឺមានភាពរីកចម្រើន ប៉ុន្តែដោយសារឆ្នាំ១៩៧៥ ចូលមកដល់ ខ្មែរបានប្ដូររបប ឆ្លងកាត់សង្រ្គាម ជាហេតុធ្វើឲ្យកុនខ្មែរលែងសូវដូចមុន"។

ជាមួយគ្នានេះ តារាសម្ដែងជើងចាស់ អ្នកស្រី ឌី សាវ៉េត ក៏បានបញ្ជាក់ផងដែរថា រឿងនេះ មានអ្នកស្រីរួមទាំងលោក ជា យុទ្ធថន សម្តែងរួមគ្នាមួយតារាថៃ។ មិនតែប៉ុណ្ណោះ អ្នកស្រី បង្ហើបពីដំណើរដើមទងដែលបង្កើតចេញជាសាច់រឿងនេះឡើងថា ដោយសារអំឡុងឆ្នាំ១៩៧០ អ្នកស្រី និងក្រុមគ្រួសារ មានបំណងចង់ទៅលេងប្រទេសថៃស្របពេលមានអ្នកស្គាល់គ្នានៅទីនោះផង ក៏គិតគ្នាថា កុំឲ្យខាតជើង ជ្រុលជាបានទៅដើរលេងហើយ ឆ្លៀតផលិតរឿងមួយដើម្បីទុកជាអនុស្សាវរីយ៍តែម្ដងទៅ។

ដោយសារមានមិត្តភក្តិស្គាល់គ្នានៅប្រទេសថៃ ជាហេតុធ្វើឲ្យអ្នកស្រីឌី សាវ៉េត មានឱកាសបានជួបអ្នកដឹកនាំនៅប្រទេសថៃ ក៏សម្រេចសហការគ្នា និពន្ធចេញជាសាច់រឿងមួយចំណងជើងថា "ជីវិតផ្សងព្រេង" នេះឡើងតែម្ដង ដោយចំណាយពេលជាង២ខែ ក្នុងការផលិត។ អ្នកស្រី បញ្ជាក់ថា "ជីវិតផ្សេងព្រេង" ក្រោយដាក់បញ្ចាំង ទទួលបានការគាំទ្រយ៉ាងខ្លាំង ទាំងនៅថៃ និងកម្ពុជា៕

ដឹងថា បេនីយ៉ាំង ថតរឿងមួយថ្ងៃស៊ីថ្លៃប៉ុន្មានអត់?

ឡូរ៉ា ម៉ម ចំណាយពេលរៀនខ្មែរ ៤ឆ្នាំនៅ កាលីហ្វ័រញ៉ា

អត្ថបទ៖ ថា ម៉ាលីដា