ចូលចិត្តគូរគំនូរតាំងពីអាយុ៨ឆ្នាំ រហូតបើកហាងលក់គំនូរមួយនៅសៀមរាប

2016-02-29 16:03:34
ចំនួនមតិ 0 | ចំនួនចែករំលែក 0

ចន្លោះមិនឃើញ

មាននិស្ស័យគូរគំនូរតាំងពីវ័យប្រមាណ ៨ ឆ្នាំលោក រិទ្ធិ បានសម្រេចចិត្តបើកហាងលក់គំនូរមួយនៅខេត្តសៀមរាបតាមក្ដីស្រមៃ។

«វិចិត្រករខ្មែរ អង្គរ» ជាឈ្មោះហាងដែលទើបដំណើរការបាន កន្លះឆ្នាំនេះ។ លោករិទ្ធិដែលជាម្ចាស់ហាងបានឱ្យដឹងថា លោកស្រឡាញ់សិល្បៈគូរគំនូរតាំងតែពីលោកនៅរៀនថ្នាក់ទីមួយ ទីពីរមកម្ល៉េះ ហើយគំនូរដែលលោកចូលចិត្តបំផុតគឺព្រះពុទ្ធ។

(លោករិទ្ធិ គូររូបបុរសរែកទឹកត្នោត កាលនៅអាយុ ៨ ឆ្នាំ)

អ្នកស្រុកឧត្ដុង្គរូបនេះបានរៀបរាប់ទៀតថា លោកមិនដែលឮឪពុកម្ដាយប្រាប់ពី សាវតាររបស់លោកមានឈាមជ័រជាវិចិត្រករឡើយ ផ្ទុយទៅវិញមានតែជីដូនដែលជាអ្នកសិល្បៈផ្នែកចម្រៀងយីកេប៉ុណ្ណោះ។

ក្រៅពីមានទេពកោសល្យក្នុងការគូរគំនូរ និង ស្មូនរូប បុរសវ័យ៣១ ឆ្នាំរូបនេះក៏មានទេពកោសល្យខាងស្មូត ច្រៀង និង ផ្លុំស្លឹកដែរ ប៉ុន្តែលោករិទ្ធិជ្រើសរើសចាប់អាជីពជាវិចិត្រករ ព្រោះជាអាជីពមួយដែលលោកស្រឡាញ់។

ស្ថិតក្នុងគ្រួសារដែលមានម្ដាយជាគ្រូបង្រៀន និង ឪពុកជាកសិករ លោករិទ្ធិចាប់ផ្ដើមគូររូបប្ដូរយកប្រាក់ពី ៥ពាន់ ដល់ ១ម៉ឺនរៀលតាំងពីលោករៀនថ្នាក់ទី៨ ម្ល៉េះ។ ក្រោយបញ្ចប់ថ្នាក់ទី ១២ នៅវិទ្យាល័យឧត្ដុង្គ យុវជនរិទ្ធិបានចាកចេញ ពីស្រុកកំណើតមកបន្តការសិក្សានៅភ្នំពេញ ជំនាញសិល្បៈគំនូរ នៅ សាកលវិទ្យាល័យ ភូមិន្ទវិចិត្រសិល្បៈ។

ប៉ុន្តែដោយសារកត្តាជីវភាព លោកមិនបានបន្តការសិក្សាភ្លាមៗនោះទេ លោកនៅដើរគូរគំនូរតាមវិហារដើម្បីប្ដូរកម្រៃអស់រយៈពេលពីរឆ្នាំ ទើបចូលសិក្សានៅមហាវិទ្យាល័យ។

ក្រោយបញ្ចប់ការសិក្សាថ្នាក់បរិញ្ញាបត្រ លោករិទ្ធិនៅតែបន្តការគូរគំនូរតាមវិហារដូចដើមរយៈពេល២ ឆ្នាំទៀតរហូតមានលទ្ធភាព បើកហាងគំនូរដូចសព្វថ្ងៃ។

«ធ្វើជាជាងគំនូរមិនអាចចិញ្ចឹមខ្លួនរស់ស្រួលឡើយ!» នេះជាពាក្យដែលមនុស្សភាគច្រើនតែងលើកឡើង។ តែសម្រាប់វិចិត្រកររូបនេះបែរជាយល់ថា «អ្វីក៏ដោយឱ្យតែចេះប្រាកដមិនដែលចេះខ្វះការងារទេ! បើយើងដាក់ចិត្តថាយើងប្រឹង វាងាយស្រួលក្នុងការរកលុយទេ!»។

ផ្ទុយពីវិចិត្រករផ្សេងដែលត្រូវការភាពស្ងប់ស្ងាត់ដើម្បីគូរ លោករិទ្ធិបែរជាចង់ឱ្យមានគេឈរមើលពេលដែលលោកគូរទៅវិញ។ «ពេលគូររូបដូចតាមរូបថត បើគេកាន់តែមើលខ្ញុំកាន់តែមានទឹកចិត្តចង់គូរ លើកលែងតែគំនូរដែលគូរតាមការស្រមើស្រមៃទេ ដែលខ្ញុំត្រូវរកកន្លែងស្ងាត់! ហើយរូបដែលភ្ញៀវឱ្យគូរតាមរូបថតអាចគូរពី ដប់ប្រាំនាទីដល់ម្ភៃនាទី ឯរូបដែលស្មុគស្មាញអាចដល់បីថ្ងៃ» ។ លោករិទ្ធិថ្លែង។

ជាកូនទី៥ក្នុងចំណោម បងប្អូន៧នាក់ ម្ចាស់ហាងខាងលើបានសម្ដែងអារម្មណ៍ថា គួរណាស់តែដល់ពេលដែលកូនខ្មែរត្រូវហ៊ានបញ្ចេញស្នាដៃឱ្យបរទេស និង កូនខ្មែរជំនាន់ក្រោយបានឃើញហើយ ព្រោះវិចិត្រកម្មគឺជាសិល្បៈមួយប្រភេទដែល កម្រមានអ្នកចេះស្ទាត់ ហើយក៏មិនសូវមានអ្នកចាប់អារម្មណ៍ដែរ។

ជាមួយនឹងដំណើរការហាងគំនូរ «វិចិត្រករខ្មែរអង្គរ» ដែលជាគំនិតផ្ដួចផ្ដើម និង ប្រើដើមទុនផ្ទាល់ខ្លួន លោករិទ្ធិអាចលក់គំនូរក្នុងមួយផ្ទាំង ចាប់ពី១០ ដុល្លារឡើង រហូតដល់ផ្ទាំងខ្លះអាចមានតម្លៃដល់រាប់រយដុល្លារ។ ក្រៅពីប្រកបជំនួញនេះ លោករិទ្ធិក៏បានទទួលសិស្សបីនាក់ទៀតដើម្បីបង្ហាត់បង្រៀន ដោយឥតគិតថ្លៃ។ «ថ្ងៃក្រោយទៅចង់ឱ្យស្នាដៃគំនូរនេះមានមុខក្នុងការតាំងពិព័រណ៍អន្តរជាតិ ហើយបើខ្ញុំមានលុយច្រើនមែនទែនខ្ញុំនឹងបើកសាលាបង្រៀនគំនូរមួយដោយឥតគិតថ្លៃដើម្បីជួយដល់ អ្នកដែលមាននិស្ស័យខាងគំនូរប៉ុន្តែគ្មានលទ្ធភាពរៀន»។ លោករិទ្ធបានបន្ថែម៕