ហេតុផល១០យ៉ាង ធ្វើឲ្យអ្នកមិនអាចក្លាយជាអ្នកមាន
- 2016-03-02 13:20:19
- ចំនួនមតិ 0 | ចំនួនចែករំលែក 0
ហេតុផល១០យ៉ាង ធ្វើឲ្យអ្នកមិនអាចក្លាយជាអ្នកមាន
ចន្លោះមិនឃើញ
មនុស្សគ្រប់រូបសុទ្ធតែអាចក្លាយជាអ្នកមានបានដូចៗគ្នានៅទូទាំងពិភពលោក ប្រសិនបើអ្នកឆក់ឱកាស និងហ៊ានប្រថុយ។ បើយោងទៅតាមការយល់ឃើញរបស់មហាសេដ្ឋីជាច្រើននិយាយថា ការបង្កើតទ្រព្យសម្បត្តិ ដើម្បីក្លាយជាអ្នកមានប្រាក់ច្រើន មិនដូចគេចាប់ឆ្នោតទេ វាអាស្រ័យទៅលើការគិតរបស់អ្នកអំពីលុយ។ មូលហេតុដែលមិនអាចធ្វើឲ្យអ្នកក្លាយជាអ្នកមាន ត្រូវគេសង្កេតឃើញថាបណ្ដាលមកពីកត្តាសំខាន់ៗ ១០យ៉ាង ខាងក្រោម៖
១. អ្នកគិតថាខ្លួនឯងមិនសក្ដិសមក្លាយជាអ្នកមាន
យើងរស់នៅក្នុងសង្គមមូលធន មានន័យថា អ្នកមានឱកាសរកលុយបានដូចអ្នកផ្សេងដែរ ប្រសិនបើអ្នកមានឆន្ទៈប្រឹងប្រែងឲ្យអស់លទ្ធភាព។
២. អ្នកគិតថា ខ្លួនមិនមែនមនុស្សឆ្លាត
ការរៀនសូត្រមិនបានខ្ពស់ រៀនមិនចប់ មិនមែនជាបញ្ហាចោទចំពោះបុគ្គលជោគជ័យល្បីៗក្នុងលោកឡើយ។ ឧទាហរណ៍ម្ចាស់ក្រុមហ៊ុន Microsoft, Facebook, IKEA, ALDI, Luxottica, និង Dell Computers ពួកគាត់សុទ្ធតែឈប់រៀន និងមិនដែលចូលរៀនថ្នាក់មហាវិទ្យាល័យទេ។
៣. អ្នកគិតថា អ្នកមិនអាចមានព្រោះគ្មានមហិច្ឆតា
អ្នកមានជាច្រើន មិនដែលគិត ឬមានមហិច្ឆតាថាខ្លួននឹងក្លាយជាអ្នកមានទេ។ ពួកគេគ្រាន់តែមានជំនឿលើខ្លួនឯង ដើម្បីសម្រេចក្ដីសុបិនឲ្យក្លាយជាការពិតប៉ុណ្ណោះ។ ដូច្នេះអ្នកត្រូវដើរតាមសុបិនខ្លួនឯងបន្ថែមទៀត។
៤. អ្នកគិតតែសន្សំលុយទុក ជាជាងបញ្ចេញលុយរកស៊ី
សូមឈប់គិតគំនិតខុសបែបនេះទៀត។ អ្នកមានក៏សន្សំលុយដូចយើងដែរ ប៉ុន្តែមិនមែនសន្សំនៅធនាគារយកការប្រាក់ទាបនោះទេ។ ពួកគេសន្សំលុយបែបវ័យឆ្លាត គឺប្រើសម្រាប់រកស៊ី ដែលទទួលបានលុយមកវិញយ៉ាងច្រើនបន្ថែមទៀត។
៥. អ្នកគ្រាន់តែគិតថា ដើម្បីរកលុយបានច្រើន គឺត្រូវធ្វើការថែមម៉ោងប៉ុណ្ណោះ
ប្រសិនបើអ្នកត្រឹមតែគិតធ្វើការថែមម៉ោងដើម្បីរកលុយបន្ថែម អ្នកនឹងទទួលបានប្រាក់មកវិញបន្តិចប៉ុណ្ណោះ ដែលវិធីនេះអ្នកមានគេមិនប្រើទេ។
៦. អ្នកខ្លាច ការបរាជ័យ
ក្រុមមហាសេដ្ឋីរាប់ជាច្រើននាក់ ធ្លាប់បរាជ័យរាប់មិនអស់ មុនពួកគេក្លាយជាអ្នកមាន។ កុំខ្លាចមានកំហុស អ្នកគ្រាន់តែចាត់ទុកការបរាជ័យទាំងនោះជាមេរៀន និងស្ពានឆ្លងទៅរកភាពជោគជ័យបានហើយ។ បរាជ័យ ត្រូវគេចាត់ទុកជាគ្រូម្នាក់ និងមិនមែនជាទីបញ្ចប់របស់យើងឡើយ។
៧. អ្នករាប់អាន មនុស្សមិនត្រឹមត្រូវ
យើងទាំងអស់គ្នាស្រលាញ់មិត្តភ័ក្ដិ ប៉ុន្តែប្រសិនបើមិត្តភ័ក្ដិរបស់អ្នកជាមនុស្សបរាជ័យ គិតមិនបានវែងឆ្ងាយនោះបើរាប់អានជិតស្និទ្ធពេក នឹងមិនអាចជួយអ្នកបានឡើយ។ អ្នកមាន ទាក់ទង រាប់អានជាអ្នកមាន ឬអ្នកមានគំនិតរកស៊ី ដើម្បីអាចជួយគ្នាទៅវិញទៅមកបាន។ ប្រសិនបើចង់ក្លាយជាអ្នកមាន ត្រូវស្វែងយល់ កត់សម្គាល់ ឬនៅក្បែរអ្នកមាន។
៨.អ្នកគិតថា អ្នកនឹងឃ្លាតឆ្ងាយពីគ្រួសារ
អ្នកមិនអាចជ្រើសរើសរវាងភាពជោគជ័យ ភាពមានបានដ៏ធំធេង និងពេលវេលាជាមួយគ្រួសារឡើយ។ តាមពិតគ្រួសារគឺជាអ្នកជំរុញលើកទឹកចិត្ត ផ្ដល់កម្លាំងចិត្ត ពេលអ្នកសម្រេចចិត្តរកស៊ី។ ការចំណាយពេលវេលាច្រើនពេកនៅជាមួយក្រុមគ្រួសារ អ្នកប្រាកដជាទទួលពាក្យថាមនុស្សមិនចេះចង់រកស៊ីមានបានឡើយ។
៩. អ្នកជឿថា លុយជាអ្នកនាំបញ្ហាអាក្រក់
លុយមិនមែនជាបញ្ហានាំរឿងអាក្រក់ទេ ប្រសិនបើអ្នកចេះចាត់ចែង។ លុយចាំបាច់សម្រាប់ទិញគ្រឿងតម្រូវការប្រើប្រាស់ប្រចាំថ្ងៃ។ លុយជានុយសម្រាប់ស្ទូចលុយបន្ថែមទៀតឲ្យយើង។ អ្នកខ្លះគិតថាមានលុយច្រើនពិបាករក្សាទុក ខ្លាចចោរលួចប្លន់ជាដើម។
១០. អ្នកស្អប់អ្នកមាន
មនុស្សជាច្រើនគិតថាអ្នកមានជាមនុស្សមិនទៀងត្រង់ កុហកបោកប្រាស់ កំណាញ់។ ប៉ុន្តែតាមពិតពួកគេជាច្រើន ជាសប្បុរសជន ចិត្តធម៌ និងតែងបរិច្ចាគទឹកប្រាក់ខ្លួនជួយអ្នកខ្សត់ខ្សោយ។ ពួកគេតែងតែមានឆន្ទៈជួយអ្នកឲ្យរៀនអ្វីថ្មីៗពីខ្លួនថែមទៀត៕
ចុចអាន៖ពង្រឹងជំនាញ៦ ដើម្បីក្លាយជាមនុស្សមានឥទ្ធិពល
ប្រែសម្រួល៖ ឡេង ភារុណ ប្រភព៖lifehack