ម៉ាំមីសុនខដ៏កម្រជាង១២០០០ឆ្នាំ រក្សារូបរាងបានយ៉ាងល្អឥតខ្ចោះ

2016-03-17 18:07:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអ្នកជំនាញមួយក្រុម បានរកឃើញម៉ាំមីសុនខមួយក្បាល នៅជម្រាលមាត់ទន្លេ Syalakh ក្នុងភូមិ Tumat សាធារណរដ្ឋ Sakha ប្រទេសរុស្ស៊ីកាលពីប៉ុន្មានថ្ងៃកន្លងទៅ។ សុនខក្លាយជាម៉ាំមីដ៏កម្រជួបប្រទះខាងលើ នឹងអាចធ្វើឲ្យគេនាំយកប្រភេទសុនខបុរេប្រវត្តិត្រឡប់មកវិញ តាមរយៈសាកសព ដែលកប់ទុកជាង ១២ ៤០០ឆ្នាំនេះ។

អ្វីដែលអ្នកវិទ្យាសាស្ត្រកត់សម្គាល់ គេឃើញសុនខមានធ្មេញ និងរោមនៅល្អ ទោះជាជាប់នៅក្នុងដីភក់រាប់សហស្សវត្សក៏ដោយ។ ម៉ាំម៉ីសត្វដែលគេយកទៅពិនិត្យ ធ្វើឡើងនៅរដ្ឋធានី Yakutsk សាធារណរដ្ឋ Sakha ប្រទេសរុស្ស៊ី ដោយខួរក្បាលរបស់សុនខ នៅរក្សាបានយ៉ាងល្អគួរឲ្យភ្ញាក់ផ្អើល ហើយគេកំពុងពិនិត្យមើលថាវាជាសត្វចិញ្ចឹម ឬមិនមែន។

សែស្រឡាយបងប្អូនសុនខប្រភេទនេះមួយក្បាលទៀត ក៏ត្រូវបានគេគាស់កកាយចេញពីទីតាំងក្នុងភូមិ Tumat ដូចគ្នា កាលពីឆ្នាំ ២០១១ ដែលគេដាក់ឈ្មោះថា សុនខ Tumat តែម្ដង។

អ្នកជំនាញជឿថា សត្វខាងលើប្រហែលជាងាប់ដោយសារបាក់ដីសង្កត់ ដែលស្ថិតក្នុងបរិយាកាសមួយដែលសាកសពមិនអាចរលាយបាន។ សាស្ត្រាចារ្យជំនាញក្លូនជនជាតិកូរ៉េខាងត្បូង លោក Hwang Woo-suk និយាយថា គាត់ពេញចិត្តចំពោះសីតុណ្ហភាពរក្សាបានម៉ាំមីនេះណាស់ ព្រោះវាធ្វើឲ្យសត្វនៅល្អឥតខ្ចោះ។ បន្ថែមលើនេះ លោកក៏បានចុះបញ្ជីសុនខម៉ាំមីខាងលើ ជាសត្វដែលលោកចង់ក្លូនឲ្យមានជីវិតមកវិញផងដែរ ក្នុងពេលឆាប់ៗខាងមុខ៕