រឿងក្ដី Apple តទល់នឹង FBI ត្រូវបញ្ចប់ក្រោយពីមានអ្នកខ្លាំងអាចបំបែកកូដ iPhone បាន
- 2016-03-29 17:18:49
- ចំនួនមតិ 0 | ចំនួនចែករំលែក 0
រឿងក្ដី Apple តទល់នឹង FBI ត្រូវបញ្ចប់ក្រោយពីមានអ្នកខ្លាំងអាចបំបែកកូដ iPhone បាន
ចន្លោះមិនឃើញ
នៅទីបំផុតសំណុំរឿងក្ដីដ៏ត្រាំត្រែងរវាងក្រុមហ៊ុន Apple និងភ្នាក់ងារ FBI ត្រូវបានតុលាការអាមេរិកទម្លាក់ចោលក្រោយពីមានក្រុមហ៊ុនមួយអាចទាញយកទិន្នន័យពីទូរសព្ទ iPhone 5c របស់ភេរវជនដែលស្លាប់ក្នុងព្រឹត្តិការណ៍វាយប្រហារ។
បើតាមការរាយការណ៍ពីសារព័ត៌មាន CNBC បានឲ្យដឹងថាភ្នាក់ងារ FBI អាចបំបែកកូដនិងយកទិន្នន័យពីទូរសព្ទ iPhone 5c នោះបានដោយគ្មានការជួយពីសំណាក់ក្រុមហ៊ុន Apple ឡើយ។ គួររំឭកថាតុលាការធ្លាប់បានកំណត់ឲ្យ Apple ចូលខ្លួនមកស្រាយបំភ្លឺរឿងក្ដីកាលពីថ្ងៃទី២២ខែមីនា ប៉ុន្តែមុនមួយថ្ងៃ ខាងភ្នាក់ងារ FBI បានសូមឲ្យមានការពន្យារពេល ដោយសារតែពួកគេរកឃើញវិធីបំបែកលេខកូដលើ iPhone ដោយមិនត្រូវការការសហការពី Apple ឡើយ។
ក្រោយមកទៀតគេក៏ដឹងថាភ្នាក់ងារ FBI គឺបានសុំជំនួយពីខាងក្រុមហ៊ុន Cellebrite របស់ប្រទេសអ៊ីស្រាអែល ដែលជាក្រុមហ៊ុនមួយមានផ្ដល់សេវាកម្មបំបែកប្រព័ន្ធការពារទូរសព្ទ ទៅដល់ភ្នាក់ងារអនុវត្តច្បាប់ទាំងឡាយ។ យ៉ាងណាក្ដីខាង FBI មិនបានបង្ហើបឲ្យដឹងអំពីវិធីសាស្ត្រដែលគេប្រើដើម្បីយកទិន្នន័យពី iPhone នោះឡើយដោយគ្រាន់តែបញ្ជាក់ថាយកបាន។
គួររំឭកថាកន្លងមកដែលក្រុមហ៊ុន Apple ជំទាស់មិនព្រមជួយភ្នាក់ងារ FBI បំបែកកូដទូរសព្ទ iPhone 5c ក៏ដោយសារការលូកដៃជួយក្នុងរឿងក្ដីនេះអាចបង្កជាគ្រោះថ្នាក់ដ៏ធ្ងន់ធ្ងន់មួយដែលមិនធ្លាប់មានពីមុនមកលើអ្នកប្រើប្រាស់របស់ខ្លួន ហើយវាប្រៀបដូចជាទម្លាយចោលនូវប្រព័ន្ធការពារដ៏រឹងមាំដែលវិស្វកររបស់ខ្លួនបានចំណាយពេលបង្កើតឡើងអស់រាប់ទសវត្សមកហើយ៕
ចុចអាន៖ CEO Google គាំទ្រគំនិតក្រុមហ៊ុន Apple ដែលជំទាស់នឹងការទាមទាររបស់ FBI
ប្រែសម្រួល៖ ហៃ សុខហេង ប្រភព៖ MacRumours