ប៊ិចពិសេស អាចបញ្ជូនអ្វីដែលសរសេរលើសៀវភៅ ទៅបង្ហាញលើទូរសព្ទ

2016-04-08 18:18:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះក្រុមហ៊ុនផលិតសៀវភៅសរសេរដ៏ធំឈ្មោះ Moleskine បានដាក់លក់ឈុត Smart Writing ដែលមានរួមបញ្ចូលដោយសៀវភៅសរសេរពិសេស និងប៊ិចឆ្លាតវៃ អាចបម្លែងអ្វីមានលើសៀវភៅឲ្យចូលទៅក្នុងទូរសព្ទបាន។

ប៊ិចឆ្លាតវៃនោះត្រូវបានគេហៅថា Moleskine Pen+ ដែលវាប្រើប្រាស់កាមេរ៉ាមានបង្កប់ក្នុងប៊ិច ដើម្បីកត់ត្រាពីដំណើរការនៃចុងប៊ិចនៅលើសៀវភៅសរសេរ។ ប៊ិចពិសេសនេះត្រូវប្រើជាមួយសៀវភៅសរសេរពិសេស ដែលក្រុមហ៊ុនហៅវាថា Paper Tablet។

Paper Tablet ជាសៀវភៅសរសេរដែលមានក្រឡាខុសពីសៀវភៅធម្មតា ពោលគឺក្រឡារបស់វាជាប្រភេទ ស្នាមចុចៗ ដែលស្នាមនេះងាយស្រួលឲ្យប៊ិចកត់ត្រាបានថាចុងប៊ិចស្ថិតនៅទីតាំងណានៃសៀវភៅ។

ក្រៅឧបករណ៍ទាំងពីរខាងលើមានកម្មវិធីទូរសព្ទមួយទៀតឈ្មោះ Moleskine Notes ដោយវាមាននាទីបង្ហាញរូបភាពដែលប៊ិចប្រមូលបានពីសៀវភៅ។ កម្មវិធីនេះប្រើប្រាស់ដោយភ្ជាប់ប៊ិចទៅកាន់ទូរសព្ទតាមរយៈប្រព័ន្ធ Bluetooth រួចដំណើរការកម្មវិធីនោះឡើង ជាការស្រេច។ ចំពោះកំណត់ត្រាដែលបញ្ជូនទៅក្នុងកម្មវិធីទូរសព្ទ គឺសុទ្ធតែអាចកែសម្រួលនៅលើកម្មវិធីទូរសព្ទបាន។

គួរបញ្ជាក់ថាប្រសិនបើប៊ិច Pen+ មិនបានភ្ជាប់ជាមួយទូរសព្ទក៏វាមិនមានបញ្ហាដែរ ដោយប៊ិចនេះមានអង្គផ្ទុកទិន្នន័យអាចរក្សាទុកកំណត់ត្រាបាន១០០០សន្លឹក ដើម្បីទុកបញ្ជូនទៅកាន់ទូរសព្ទ។

ចំពោះឈុត Smart Writing នេះគឺមានដាក់លក់លើវិបសាយរបស់ក្រុមហ៊ុន មានតម្លៃ ១៩៩ដុល្លារក្នុងមួយឈុត៕

ចុចអាន៖ ជើងដាក់ឆត្រពិសេស រំលឹកម្ចាស់ឲ្យយកឆត្រតាមខ្លួនពេលមេឃជិតភ្លៀង

ប្រែសម្រួល៖ ហៃ សុខហេង ប្រភព៖ Gizmodo