ចោរលួចលុយធនាគារបាងកកអស់ជាង ២៨ម៉ឺនដុល្លារ

2016-05-10 17:38:46
ចំនួនមតិ 0 | ចំនួនចែករំលែក 0

ចន្លោះមិនឃើញ

លុយប្រមាណ ១០លានបាត ឬជាង ២៨,៣ម៉ឺនដុល្លារអាមេរិក ត្រូវបានចោរលួចអស់ពីទូដែករបស់សាខាធនាគារបាងកក Bangkok Bank នៅស្រុកឆាអាម ខេត្តបញ្ចបុរ៉ី កាលពីយប់ថ្ងៃអាទិត្យទី ៨ឧសភាកន្លងទៅ។

ហេតុការណ៍បានផ្អើលឆោឡោឡើង នៅពេលបុគ្គលិកធនាគារចូលធ្វើការពេលព្រឹក ស្រាប់តែពួកគេឃើញទូដែកធនាគារចំហ ហើយសាច់ប្រាក់ ១០លានបាត និងប្រាក់បរទេសផ្សេងទៀត ត្រូវបានបាត់សូន្យឈឹង។ បើតាមប្រភព អនុសាខាមួយនេះផ្ដល់សេវាកម្មប្ដូរប្រាក់ដ៏ច្រើនបំផុតមួយទៅជាប្រាក់បរទេស។

ប៉ូលិសស្រុកឆាអាម ទើបទទួលដំណឹងពីការលួចនៅម៉ោង ៧៖២០នាទីព្រឹកថ្ងៃច័ន្ទ រួចក៏ចុះទៅកន្លែងកើតហេតុភ្លាមៗដែរ តែមិនទាន់ទទួលបានតម្រុយអ្វីសោះ។ ប៉ូលិសបានសង្ស័យក្រុមចោរចូលតាមអគារជាប់ធនាគារ ដែលទ្វារដែកពុំបានចាក់សោឡើយ។ ចោរបានឡើងតាមដំបូលអគារ និងបានឆ្លងទៅកាន់ដំបូលធនាគារ វាយបំបែកសោ និងចូលក្នុងអគារតែម្ដង។

ក្រុមចោរបានប្រើប៉ុស្តិ៍ផ្សាដែកបើកទូដែក និងយកប្រាក់ទាំងនោះទៅដោយសុវត្ថិភាព។ ចំណែកតាមកាមេរ៉ាសុវត្ថិភាពនៅក្បែរធនាគារ បានថតជាប់រថយន្ត Pickup ពណ៌ប្រាក់បានចតនៅមុខអគារក្បែរធនាគារម៉ោងប្រមាណ ៩យប់ថ្ងៃអាទិត្យ និងបានបើកចេញទៅនៅម៉ោង ៣ទៀបភ្លឺ ដោយមិនបានបើកភ្លើងចង្កៀងទៀតផង។ ពេលនេះ ប៉ូលិសកំពុងស៊ើបអង្កេត តែមិនទាន់មានដានសង្ស័យអ្វីមួយនៅឡើយទេ៕