ផ្លូវជាប់គាំងនៅភ្នំពេញអ្នកណាទទួលខុសត្រូវ?

2014-10-28 16:46:46
ចំនួនមតិ 0 | ចំនួនចែករំលែក 0

ចន្លោះមិនឃើញ

មានការកកស្ទះចរាចរ ដ៏អាក្រក់ស្ទើរគ្រប់កន្លុកកន្លៀត ក្នុងរាជធានីភ្នំពេញ ក្នុងរវាងពេលប្រមាណពេញមួយខែមកហើយនេះបានបង្ករ ជាការខាតបង់ដ៏ធំសម្រាប់ពលរដ្ឋដែលកំពុងក្រស្រាប់។ នេះជាការលើកឡើង របស់យុវជនមួយក្រុម ប្រាប់Sabay ខណៈជាប់គាំងលើផ្លូវព្រះមុនីវង្ស។

កញ្ញា សោភា និស្សិត ឆ្នាំទី ២ សិក្សានៅសកលវិទ្យាល័យជាតិគ្រប់បាននិយាយថា ការកកស្ទះចរាចរណ៍កាន់តែខ្លាំងក៏ព្រោះតែចំនួន ប្រជាជនមករស់នៅរាជធានីភ្នំពេញកាន់តែមានចំនួនច្រើនឡើង។ដូច្នេះយានយន្តក៏កើនឡើង ដូចគ្នាផងដែរ។ម្យ៉ាងទៀតការកកស្ទះចរាចរណ៍ក៏អាចបណ្តាលមកពី អ្នកបើកបរខ្លួនផង ព្រោះពេលកកស្ទះចរាចរខ្លាំងអ្នកបើកបរខ្លះបានបើកបររំលោភលើចំណែក ផ្លូវភាគីម្ខាងទៀត ក្នុងនោះមិនមែនមានម៉ូតូទេ តែឡានក៏មានច្រើនដែរ។ កញ្ញាបន្ថែមថា៖ “ខ្ញុំនៅម្តុំផ្សារពោធិ៍ចិនតុង ថ្ងៃខ្លះចំណាយពេលជិតមួយម៉ោងទម្រាំមកដល់សាលា ដោយសាឡានម៉ូតូច្រើនពេក” ។

“ការកកស្ទះចរាចរណ៍រាល់ថ្ងៃ ខ្ញុំគិតថា អាចបណ្តាលមកផ្លូវស្រុកយើងមានទំហំតូច ហើយចំនួនយាន្តយន្តកាន់តែច្រើន” ។ ទាំងនេះគឺជាការលើកឡើងរបស់យុវជន កែវ បូរាណ និស្សិតឆ្នាំទី១ សកលវិទ្យាល័យភូមិន្ទនិត្តិសាស្រ្ត និង វិទ្យាសាស្រ្តសេដ្ឋកិច្ច។ បូរាណ និយាយថា ៖ “ខ្ញុំនៅម្តុំជិតវិទ្យុជាតិស្ទឹងមានជ័យ ធ្វើដំណើរតាមផ្លូវវេងស្រេងរាល់ថ្ងៃ ផ្លូវនេះជាផ្លូវមួយដែលមានភាពមមាញឹកច្រើនជាងគេព្រោះ នៅអមសង្ខាងផ្លូវមានរោងចក្រជាច្រើន ហើយក៏មានរថយន្តធំៗចរាចរច្រើន ធ្វើឲ្យកកស្ទះភាគច្រើននៅពេលព្រឹក ចន្លោះពីម៉ោង ៦ ៖ ៣០ ដល់ ម៉ោង ៨ ៖ ០០ ហើយពេលល្ងាចវិញស្ទះខ្លាំងជាងគេគឺចាប់ពីម៉ោង ៥ ៖ ០០ ដល់ម៉ោង ៦៖ ០០ ”។

“ការកកស្ទះចរាចរក៏អាចបណ្តាលមកពីគ្មានវិធានការណ៍ល្អ ក្នុងការសម្រួល ចរាចរណ៍ផងដែរ”។ ទាំងនេះគឺជាការអៈអាងរបស់ កញ្ញា ចិន្តា និស្សិត ឆ្នាំទី ៣ នៃសកលវិទ្យាល័យបៀលប្រាយផ្នែកគណេយ្យ ។ចិន្តា និយាយថា៖ “ខ្ញុំនៅម្តុំរោងកុនគិរីរម្យមានផ្លូវតូចៗជាច្រើនកាត់ផ្លូវព្រះសីហនុ ទាំងឡាន និង ម៉ូតូបានសម្រុកទៅមុខតែរាងៗខ្លួនអត់មានអ្នកជួយសម្រួលចរាចរ ពេលខ្លះក៏អាចបង្ករឲ្យមានការកកស្ទះកាន់តែខ្លាំងផងដែរ ”។

យុវជន ភារម្យ បុគ្គលិកបំរើការងារនៅក្រុមហ៊ុនឯកជនមួយបាននិយាយថា កន្លែងខ្លះការកកស្ទះចរាចរក៏អាចបណ្តាលមកពីដាច់ភ្លើងស្តុប។ ភារម្យ និយាយថា៖ ”ជាក់ស្តែងភ្លើងស្តុបនៅបូកគោកាលពីពេលថ្មីៗនេះបានដាច់ច្រើនម៉ោង បង្ករឲ្យកកស្ទះចរាចរ ហើយនគរបាលបានប្តូរវេនគ្នា និងមានភាពនឿយហត់ជាខ្លាំង ក្នុងការសម្រួលចរាចរ កុំឲ្យកកស្ទះ”។

យោងតាមរបាយការណ៍របស់សាលារាជធានីភ្នំពេញបានឲ្យដឹងថាទីក្រុងភ្នំពេញមានប្រជាជនរស់នៅ ជាង ២ លាននាក់ រស់នៅ មានម៉ូតូជាង១ លានគ្រឿង និងមានរថយន្តជាង២៣ម៉ឺនគ្រឿងធ្វើចរាចរនៅលើដងផ្លូវ។

តាមទិន្នន័យចុះបញ្ជីយានយន្តដែលបានបង្ហាញដោយសាលារាជធានីភ្នំពេញ រហូតមកដល់ពេលនេះ ភ្នំពេញ មានចំនួនម៉ូតូសរុបជាង ១ លានគ្រឿង និងរថយន្តជាង ៤០០ ០០០ គ្រឿងដែលចំនួននេះគឺជាមានការកើនឡើងយ៉ាងខ្លាំងពីមួយឆ្នាំទៅ មួយឆ្នាំ។ កាលពីពេលថ្មីៗ នេះដែរ សាលារាជធានីភ្នំពេញបានបញ្ចប់សេចក្តីព្រាងផែនការមេដឹកជញ្ជូន រាជធានីភ្នំពេញសម្រាប់ ឆ្នាំ២០៣៥ បន្ទាប់ពីការសិក្សារយៈពេលពីរឆ្នាំក្រោមកិច្ចសហការជាមួយទីភ្នាក់ងារ សហប្រតិបត្តិការអន្តរជាតិ ជប៉ុន (JICA) ដើម្បីសម្រួលការកកស្ទះចរាចរណ៍ខណៈចំនួនយានយន្តត្រូវបានព្យាករថា នឹងបន្តកើនឡើង។