ត្រី១៤តោនពុលងាប់ក្នុងប្រឡាយកណ្ដាលក្រុងហូជីមិញ

2016-05-18 22:08:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រីប្រមាណ ១៤តោន បានពុលងាប់អណ្ដែតក្នុងទឹកប្រឡាយ Nhieu Loc-Thi Nghe នៅទីក្រុងហូជីមិញកាលពីថ្ងៃអង្គារម្សិលមិញ ក្រោយធ្លាក់ភ្លៀងមួយមេធំ ។

ចំពោះមូលហេតុនៃការងាប់ ត្រូវគេសន្និដ្ឋានថា ដោយសារទឹកកាកសំណល់មានជាតិពុលហូរចេញគំនរសំរាម ចូលប្រឡាយ ខណៈទីក្រុងត្រូវទឹកភ្លៀងលើកដំបូង បន្ទាប់ពីរាំងស្ងួតអស់រយៈពេលជាច្រើនខែ។

ប្រជាជនរស់នៅតាមដងប្រឡាយដ៏ធំជាងគេនេះ និយាយថាត្រីរាប់ពាន់ក្បាលបានហើមអណ្ដែតពេញផ្ទៃទឹក ចាប់តាំងពីល្ងាចថ្ងៃច័ន្ទ ក្រោយភ្លៀង ៣ម៉ោង ហើយសំរាមជាច្រើនបានប៉ើងចូលក្នុងទឹក។

លោក Tran Van Son ជាមន្ត្រីម្នាក់ទទួលបន្ទុកផ្នែកការពារធនធានវារីវប្បកម្មទីក្រុង បានកត់សម្គាល់ថា មានសាកសពត្រីដ៏ច្រើនចាប់ផ្ដើមអណ្ដែត ដោយសារទឹកភ្លៀង។ លោកបានបន្ទោសទៅលើការបំពុលខាងរោងចក្រឧស្សាហកម្ម។ ប្រភពដដែលបន្តថា ប្រឡាយក៏មានប្រព័ន្ធការពារបន្សាបជាតិពុលក្នុងសំរាមដែរ តែមិនអាចទប់ទល់បាន ដោយសារកាកសំណល់ច្រើនជ្រុល។

ប្រឡាយ Nhieu Loc-Thi Nghe មានប្រវែងជាង ៨គីឡូម៉ែត្រហូរកាត់សង្កាត់ចំនួន ៣ក្នុងទីក្រុង។ ទីក្រុងហូជីមិញ បានចំណាយពេលជាងមួយទសវត្ស និងប្រាក់ជាង ៣៩០លានដុល្លារ រួមទាំងមូលនិធិពីធនាគារពិភពលោក World Bank ដើម្បីធ្វើយ៉ាងណាឲ្យប្រឡាយកខ្វក់នេះមានសោភ័ណភាពល្អ៕