២៤ម៉ោង ក្រោយមរណភាពអ្នកវិភាគ ដ៏មានប្រជាប្រិយភាពនៅកម្ពុជា
- 2016-07-11 17:00:51
- ចំនួនមតិ 0 | ចំនួនចែករំលែក 0
២៤ម៉ោង ក្រោយមរណភាពអ្នកវិភាគ ដ៏មានប្រជាប្រិយភាពនៅកម្ពុជា
ចន្លោះមិនឃើញ
-ភរិយាបណ្ឌិតកែម ឡី ដែលកំពុងពរពោះកូនទី៥ (៥ខែ) បានចាត់ទុកថា នេះជាការសម្លាប់ផ្នែកនយោបាយ -រាជរដ្ឋាភិបាលបញ្ចេញសារចូលរួមមរណទុក្ខ និងតឿនអោយសមត្ថកិច្ចស្វែងរកការពិត -ជនសង្ស័យដែលប៉ូលិសឃាត់ខ្លួនត្រូវបានមហាជនរិះគន់ថាជាឆាកល្ខោនមិនសមទំនង -មនុស្សប្រមូលផ្តុំគ្នាជាង១ម៉ឺននាក់ដង្ហែសពចេញពីទីកើតហេតុទៅកាន់ឈាបនដ្ឋាន -សារព័ត៌មានជាតិ និងអន្តរជាតិបញ្ចេញប្រតិកម្មមមាញឹកលើករណីនេះ -មានមតិរិះគន់អំពីការកេងចំណេញផ្នែកនយោបាយក្នុងសំណុំរឿងនេះ -មរណភាពចុងក្រោយនេះបានធ្វើអោយកម្រើករំពើកស្រទាប់បញ្ញវន្តដែលធ្លាប់តែអត់ធ្មត់សង្កត់ចិត្ត។ -អង្គការGlobal Witness ចេញសេចក្ដីថ្លែងការណ៍ ឲ្យមានការស៊ើបអង្កេតដោយឯករាជ្យ -ទីកើតហេតុបានផ្អាកអាជីវកម្ម
រូបភាពព្រឹកនេះ ម៉ាតកាល់តិច បានផ្អាកសេវាកម្មរបស់ខ្លួន ក្រោយហេតុការណ៍បាញ់សម្លាប់ លោកបណ្ឌិត កែម ឡី កាលពិម្សិលមិញ
ម៉ាតកាល់តិច ដែលជាទីកើតហេតុការណ៍បាញ់ប្រហារកាលពីម្សិលបានបិទផ្អាកសេវាកម្មនៅព្រឹកថ្ងៃចន្ទនេះខណៈដែលសពបណ្ឌិត កែម ឡី ត្រូវបានគេព្រមព្រៀងតម្កល់រយៈពេល ១០ថ្ងៃមុនបូជា។
នៅព្រឹកនេះបណ្ដាញសង្គមបន្តធ្វើការរិះគន់ចាស់ដៃទៅលើបណ្ដាញព័ត៌មានសោតទស្សន៍ (TV) មិនបានមានការចេញផ្សាយអ្វីអោយសស្រាក់សស្រាំស្មើទៅនឹងរឿងអាស្រូវ លោក កឹម សុខា នោះសោះ។
បណ្ដាញទូរទស្សន៍ក្នុងស្រុកក៏ត្រូវបានរិះគន់ពីភាពយឺតយ៉ាវ និងផ្ដល់ព័ត៌មានមិនឯករាជ្យលើករណីនេះផងដែរ។
ពលរដ្ឋនិយាយថា ព័ត៌មានអនឡាញ បានដើរតួនាទីដ៏សំខាន់ក្នុងការផ្សាយព័ត៌មានលើសំណុំរឿងឃាតកម្មកណ្ដាលក្រុងភ្នំពេញនេះ ខណៈដែលទូរទស្សន៍ចាក់កម្មវិធីកម្សាន្ត។
សារព័ត៌មានអន្តរជាតិពិភពលោក មានដូចជា BBC, Reuters, Channal News Asia, AFP, The Strats Times បានចុះផ្សាយពីការបាញ់សម្លាប់លើ លោក កែម ឡី ភ្លាមៗ ផ្ទុយពីភាពព្រងើយកន្តើយរបស់ម៉ាស៊ីនផ្សព្វផ្សាយក្នុងស្រុក និងបានបញ្ជាក់ផងដែរ ពីការទទួលស្គាល់បណ្ឌិតកែម ឡី ជាអ្នកវិភាគនយោបាយដ៏ល្បីល្បាញម្នាក់ ក៏ជាអ្នករិះគន់ រដ្ឋាភិបាលដ៏រសើប។
បណ្ដាញផ្សព្វផ្សាយបរទេសបានចេញផ្សាយករណីឃាតកម្មនៅស្រុកខ្មែរ
សំណុំរឿងបាញ់សម្លាប់អ្នកចេះដឹងដែលមានការគោរពជាទូទៅនេះ បានកើតឡើងនៅចំថ្ងៃអាទិត្យ ដោយ បណ្ឌិត កែម ឡី ត្រូវបានឃាតកចូលទៅបាញ់សម្លាប់ ក្នុងម៉ាតកាល់តិចស្តុបបូកគោដែលជាទីទទួលទានកាហ្វេដ៏មានប្រជាប្រិយភាពជាងគេបង្អស់របស់ពលរដ្ឋក្រុងភ្នំពេញ។ ទីនោះតែងតែមានការតម្រង់ជួរវែងអន្លាយរង់ចាំទិញកាហ្វេ ហើយបណ្ឌិតកែម ឡីបានមកកាន់ទីនោះជាប្រចាំអានព័ត៌មាន និងពិសាកាហ្វេ។
សាក្សីដែលនៅកន្លែងកើតហេតុរាយការណ៍ថា នៅម៉ោងប្រហែល ៨និង៤០នាទីព្រឹក ខ្មាន់កាំភ្លើងបានដើរចូលទៅ សំដៅរក កែម ឡី ដោយមិនបាននិយាយអ្វីហើយដកកាំភ្លើងខ្លីបាញ់សម្លាប់។ បើតាមនាយឧត្តមសេនីយ ជួន សុវណ្ណ អគ្គស្នងការរងនគរបាលជាតិ និងជាស្នងការរាជធានីភ្នំពេញ ប្រាប់អ្នកសារព័ត៌មានម្សិលមិញថា ខ្មាន់កាំភ្លើងបានបាញ់ចំនួន ២គ្រាប់ ដែលគ្រាប់ទី១ ត្រូវចំក្បាល ហើយគ្រាប់ទី២ ត្រូវចំដើមដៃធ្លាយទៅដល់ដោះ។
មហាជនសម្រុកមកដល់កន្លែងហេតុការណ៍ ទីខ្មាន់កាំភ្លើងបាញ់សម្លាប់លោកបណ្ឌិត កែម ឡី នៅក្នុងម៉ាតកាល់តិក កាលពីព្រឹកថ្ងៃទី ១០ កក្កដា ២០១៦
បន្ទាប់ពីការធ្វើឃាត ខ្មាន់កាំភ្លើងបានរត់ចេញមកក្រៅដោយកាន់កាំភ្លើងខ្លីនៅដៃ និងមានប្រឡាក់ឈាមនៅលើផ្ទៃមុខហើយក្រោយមក ត្រូវចាប់ខ្លួនបាន នៅម្ដុំស្ថានទូតរុស្ស៊ី។ ម៉ោង១០ និង៥០នាទីព្រឹកនគរបាលខណ្ឌ ចំការមនបានបញ្ជូនជនសង្ស័យទៅកាន់ស្នងការនគរបាលរាជធានីភ្នំពេញហើយ បន្ទាប់ពីការសួរចម្លើយ ជនសង្ស័យ សារភាពថា ខ្លួនបាញ់សម្លាប់ ព្រោះបណ្ឌិតកែម ឡី ជំពាក់លុយខ្លួន ៣ពាន់ដុល្លារ។ មហាជនបានចាត់ទុកថា នេះជាករណីបំភ័ន្តការពិត ដែលមិនសមទំនងមួយ។
នៅវេលាម៉ោង១១ថ្ងៃដដែល ប្រជាពលរដ្ឋ បានប្រមូលផ្តុំគ្នានៅជុំវិញទីកើតហេតុ ដើម្បីចូលរួមតវ៉ាមិនឲ្យសមត្ថកិច្ចដឹកសពចេញតាមរថយន្តនគរបាល និងរថយន្តពេទ្យដោយទាមទារដង្ហែចេញតាមរថយន្តផ្ទាល់ខ្លួន។ យុវវ័យជានិស្សិត និងពលរដ្ឋជាច្រើនបានដាក់ផ្កា ទាន និងដបទឹកក៏ដូចជាផ្លែឈើតាមប្រពៃណី ជាកិច្ចគោរពជួនចដំណើរសព។
រហូតដល់វេលាម៉ោង ២:៤០នាទី សព ត្រូវបានដង្ហែ ចេញពីកន្លែងកើតហេតុ តាមរថយន្តផ្ទាល់ខ្លួនដោយមានការអោយធម៌ពីព្រះសង្ឃ និងការសោយសោក ចំណែកកម្លាំង សមត្ថកិច្ច បានដាក់កម្លាំងថែមឡើងទប់ស្កាត់មិនឲ្យប្រជាពលរដ្ឋចូលរួមហែសព បណ្តាលអោយមានការប៉ះទង្គិចមួយចំនួន។
រាជរដ្ឋាភិបាលកម្ពុជា ក្រសួងមហាផ្ទៃ ក្រសួងយុត្តិធម៌ និងគណបក្សនយោបាយទាំងអស់បានចូលរួមថ្កោលទោសថានេះ ជាអំពើសម្លាប់ដ៏កំសាក និងអំពាវនាវអោយវែកមុខឃាតកព្រមទាំងបក្សពួក និងការពិតនៅពីក្រោយនេះ។
សម្ដេចតេជោ ហ៊ុន សែន បានធ្វើឡើងនៅក្នុងពិធីសម្ពោធដាក់ឲ្យប្រើប្រាស់អគារចំនួនពីរ រួមនឹងប្រព័ន្ធហេដ្ឋារចនាសម្ព័ន្ធមួយចំនួនទៀត នៅទីបញ្ជាការដ្ឋានកងរាជអាវុធហត្ថលើផ្ទៃប្រទេសនៅព្រឹកថ្ងៃទី១១ ខែកក្កដា ឆ្នាំ២០១៦នេះ បានស្នើដល់ប្រជាពលរដ្ឋកុំយកឃាតកម្មលោក កែម ឡីថា ជារឿងនយោបាយ។ សម្ដេចតេជោ បានបន្ដថា ការបាញ់សម្លាប់លោក កែម ឡី បានធ្វើឲ្យរាជរដ្ឋាភិបាលកម្ពុជាមានការខាតបង់ និងប៉ះពាល់យ៉ាងធ្ងន់ធ្ងរចំពោះមុខមាត់របស់រាជរដ្ឋាភិបាលកម្ពុជា ហើយសម្ដេចបានចាត់ទុកការបាញ់ប្រហារលើលោកកែម ឡី ថាជាអំពើឃោរឃៅ ដែលសម្ដេចសូមថ្កោលទោសអំពើដ៏ព្រៃផ្សៃនេះ។
ចំណែកអង្គការ Global Witness បានចេញសេចក្ដីថ្លែងការណ៍ភ្លាមៗទាមទារអោយមានការស៊ើបអង្កេតឯករាជ្យលើឃាតកម្មអ្នកវិភាគ ដែលការវិភាគមុនពេលស្លាប់របស់បណ្ឌិតកែមឡី មានពាក់ព័ន្ធនឹងការបញ្ចេញនូវរបាយការណ៍ដ៏រសើបរបស់ខ្លួន។
បណ្ឌិត សុខទូច ដែលជាដៃគូសម្បូរវោហារជាមួយអ្នកស្លាប់បានប្រាប់ Sabayនៅថ្ងៃដដែលនោះ ថាលោកបានឃ្លាតចេញពីដៃគូម្នាក់នេះ ក្រោយពីបានទទួលការព្រមាន គំរាមគួរអោយចត់បាយពីជនអនាមិក ហើយថា ការគំរាមនោះគឺប្រាថ្នាដល់ជីវិតលោក ។
សួមស្ដាប់ប្រសាសន៍លោកបណ្ឌិត សុខ ទូច ដែលបានផ្ដល់សម្ភាសន៍តាមទូរសព្ទឲ្យវិបសាយ Sabay ម្សិលមិញ
បណ្ឌិត ឡៅ ម៉ុងហៃ និងបញ្ញវន្តជាច្រើនទូទាំងប្រទេសបានចាត់ថា នេះជាការបាត់បង់យ៉ាងដំណំ សម្រាប់សង្គមបញ្ញាជនខ្មែរហើយថ្កោលទោសថា នេះជាអំពើយ៉ាងកំសាកដែលសមត្ថកិច្ចខ្មែរត្រូវតែឆ្លើយតបចំពោះមហាជន៕
អត្ថបទ៖ ឃុត សុខឿន