អេនឌី ចេញបេសកកម្មទៅកាណាដាលើកទី១

2016-08-06 21:16:32
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អេនឌី បានចេញប្រទេសកាណាដា ជាលើកទី១នាព្រឹកមិញនេះ បន្ទាប់ពីទើបចប់បេសកកម្មនៅប្រទេសបារាំង អូស្ត្រាលី និងអាមេរិកបន្តបន្ទាប់។

លោក អេនឌី ចេញទៅតែម្នាក់ឯងប៉ុណ្ណោះ បន្ទាប់ពីស្ថានទូតប្រទេសនេះប្រចាំនៅកម្ពុជា ផ្ដល់ទិដ្ឋាការឲ្យលោកតែម្នាក់ប៉ុណ្ណោះ ខណៈតារាស្រី ដែលជាមិត្តរួមអាជីពប៉ុន្មាននាក់ទៀត បរាជ័យក្នុងការសុំសិទ្ធិចូលទៅប្រទេសគេ។

ដោយសារតែបែបនេះ លោកបញ្ជាក់ថា មានអារម្មណ៍កណ្ដោចកណ្ដែងជាងការចេញបេសកកម្មទៅប្រទេសនានាកន្លងទៅ។ "យ៉ាងណា ខ្ញុំនឹងប្រឹងប្រែងធ្វើឲ្យបានល្អ ដើម្បីបងប្អូនខ្មែរយើងសប្បាយរីករាយ ព្រោះជាលើកទី១របស់ខ្ញុំផង"។ អេនឌី ថ្លែង។

តួសម្ដែងក្នុងបទ "គេងលើព្រះចន្ទ" មានបេសកកម្មចំនួន២សប្ដាហ៍ សម្រាប់បេសកកម្មលើកទី១នៅក្នុងប្រទេសមួយនេះ មុនពេលត្រឡប់មកប្រទេសកំណើតវិញ។ យ៉ាងណា លោកថា មិនទាន់ដឹងថា លោកនឹងត្រូវទៅសម្ដែង បម្រើអារម្មណ៍បងប្អូនខ្មែរនៅទីនោះ នៅទីកន្លែងណាខ្លះទេ។

អេនឌី ទើបត្រូវបានស្ថានទូតប្រទេសកាណាដា ហៅឲ្យទៅទទួលទិដ្ឋាការចំនួន២ខែ សម្រាប់ចេញបេសកកម្មសិល្បៈក្នុងប្រទេសគេ។ រយៈពេលនេះ លោកប្រាប់ថា ខ្លីណាស់ ខណៈលោកស្នើសុំមានរយៈពេលវែងជាងនេះ។ "គេឲ្យតែពីរខែ ខ្លីមែនទែន តែយ៉ាងណា ត្រូវតែចេញទៅបង ព្រោះលើកទី១ផង បើមិនអីចឹង ប្រាកដជាពិបាកសម្រាប់ការស្នើលើកក្រោយ"។

មុនចេញទៅកាណាដាព្រឹកមិញនេះ អេនឌី ធ្លាប់ចេញទៅប្រទេសអាមេរិក អូស្រ្តាលី បារាំង និងចុងក្រោយបំផុតគឺជប៉ុន។ ដោយសារតែធ្លាប់ចេញប្រទេសនានាខាងលើ ធ្វើការងារដោយភាពរលូន ទើបតារាប្រុសដែលមានពិតថា លាវ ពិសិដ្ឋ ដាក់ការសង្ស័យថា នោះជាហេតុផលមួយដែលស្ថានទូតប្រទេសកាណាដានៅកម្ពុជា សម្រេចផ្ដល់ទិដ្ឋាការឲ្យលោកចូលស្រុកគេតែម្នាក់ ដោយបានទាត់ចោលការស្នើសុំដូចគ្នា របស់មិត្តរួមអាជីពលោកពីរបីនាក់ទៀត ដែលបានពាក្យតំណាលគ្នា៕

សូមចុចអាន៖ អេនឌី កាណាដា កោះហៅឲ្យចូលស្ថានទូត សូមចុចអាន៖ អេនឌី ប្ដូរ Style ជាមួយ លី អ៊ីវ៉ាធីណា សូមចុចអាន៖ អេនឌី ខឹងអ្នកជំនាន់ក្រោយ យកបទលោកមកច្រៀងគ្មានសុំការអនុញ្ញាត

អត្ថបទ៖ ទារិកា រូបថត៖ អេនឌី