Zhao Li Ying បកស្រាយរឿងខ្លួនជាតារាត្រូវគេស្អប់បំផុតក្នុងសិល្បៈ

2016-09-27 20:43:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ តារាសម្ដែងស្រីល្បីឈ្មោះ Zhao Li Ying បានបកស្រាយពីរឿងខ្លួនជាផ្ទាំងស៊ីបត្រូវអ្នកប្រើប្រាស់អ៊ីនធឺណិតរិះគន់គ្មានប្រណីជារៀងរាល់ថ្ងៃ។

ចាប់តាំងពីបោះជើងប្រឡូកចូលសិល្បៈមកទល់ពេលនេះ តារាសម្ដែងស្រីស្រស់ស្អាត Zhao Li Ying តែងជួបរឿងអាស្រូវរាប់មិនអស់។ តួរឿង "និស្ស័យស្នេហ៍ដាវទេព" ធ្លាប់ត្រូវស្អុយឈ្មោះដោយសាររឿងជាច្រើនដូចជា ធ្វើឫកធ្វើពា ឈ្នានីសនឹងមិត្តរួមការងារ មានIQ ទាប ជាមនុស្សពុតត្បុត និងលួចប្ដីគេជាដើម។ យ៉ាងណាមិញ ជំនួសឲ្យការចេញមុខបកស្រាយ ស្រីស្អាតវ័យ២៩ឆ្នាំបានត្រឹមរក្សាភាពស្ងៀមស្ងាត់ និងផ្ដោតអារម្មណ៍លើការងាររបស់ខ្លួនតែប៉ុណ្ណោះ។

កាលពីពេលថ្មីៗនេះ នៅក្នុងបទសម្ភាសន៍មួយ Zhao Li Ying បាននិយាយពីរឿងអាស្រូវទាំងឡាយនៅក្នុងអាជីពរបស់ខ្លួន។ "រឿងអាស្រូវប្រៀបដូចជាម្ហូបមួយមុខ។ មិនអាចដោយសារតែមតិអាក្រក់របស់អ្នកដទៃហើយបោះបង់ចោលអ្វីដែលយើងស្រលាញ់នោះទេ។ ខ្ញុំខំប្រឹងបានដល់សព្វថ្ងៃនេះព្រោះវាជាក្ដីសុបិនរបស់ខ្ញុំ។ ដូចនេះហើយ ត្រូវគ្រវែងរឿងអត់បានការចោល"។

តារាស្រីកើតឆ្នាំ១៩៨៧ក៏បន្ថែមទៀតដែរថា៖ "នៅពេលខ្ញុំបើកឃើញមតិអវិជ្ជមានពីខ្ញុំម្ដងៗនៅលើអ៊ីនធឺណិត ខ្ញុំលែងសូវខ្វល់ដូចមុនហើយ។ ការងាររបស់ខ្ញុំនៅពេលនេះគឺរវល់ខ្លាំងណាស់ មិនទាំងដឹងផងថាអាចសម្រេចរួចរាល់ឬអត់ផង។ ឲ្យតែខ្ញុំមិនធ្វើអ្វីដែលក្បត់នឹងឧត្ដមគតិខ្លួនឯងគឺគ្រប់គ្រាន់ហើយ"៕