តារា​សម្ដែង​ប្រុស​ថៃ​វ័យ​ក្មេង​១០​រូប​ដែល​មាន​ទាំង​រូប​សម្បត្តិ​ និង​ទេពកោសល្យ​ត្រូវ​បាន​គេ​មើល​ឃើញ​ថា​កំពុង​ទទួល​បាន​ការ​គាំទ្រ​ច្រើន​ជាង​គេ​ ហើយ​នឹង​អាច​ក្លាយ​ជា​អ្នក​ស្នង​តំណែង​តារា​ជើង​ចាស់​កំពូល​ៗ​ទៅ​ថ្ងៃ​អនាគត។ ចង់​ដឹង​ថា​ពួក​គេ​ជា​នរណា​ខ្លះ​ សូម​តាមដាន​ខាង​ក្រោម៖​

១. Nadech Kugimiya

មាន​រឿង​ភាគ​ហូរហែ​ ឯ​ការងារ​ផ្សេង​ៗ​ក៏​មាន​បន្ត​មិន​ដាច់ ហើយ​ថ្មី​ៗ​នេះ Nadech Kugimiya ក៏​មាន​ឱកាស​បាន​ទៅ​ចូលរួម​កម្មវិធី​បង្ហាញ​ម៉ូដ Newyork Fashion Week 2016 ខណៈ​តារា​ថៃ​តិចតួច​ប៉ុណ្ណោះ​ដែល​ធ្លាប់​បាន​ចូលរួម​កម្មវិធី​​លំដាប់​អន្តរជាតិ​បែប​នេះ។ មិន​តែ​ប៉ុណ្ណោះ​គ្រប់​រឿង​ដែល​តារា​រូប​នេះ​សម្ដែង តែង​មាន​អ្នក​គាំទ្រ​ច្រើន​ៗ​ជានិច្ច។

២. Mark Prin

តាំង​ពី​ចូល​សិល្បៈ​មក គេ​សង្កេត​ឃើញ​ទេពកោសល្យ​សម្ដែង​របស់ Mark Prin អភិវឌ្ឍ​កាន់​តែ​ល្អ​ និង​មាន​ប្រជាប្រិយភាព​ជា​ច្រើន​ផង​ដែរ​នៅ​ក្រៅ​ប្រទេស។ តួ​យ៉ាង​នៅ​ប្រទេស​កូរ៉េ មិត្ត​ប្រុស​របស់ Kimberly ធ្លាប់​ទទួល​បាន​ពាន​រង្វាន់​តារា​អន្តរជាតិ​ពេញ​និយម​ពី​កម្មវិធី Korean & Culture Entertainment Awards and Asia Awards ទៀត​ផង។

៣. James Ma

បើ​ទោះ​ជា​ធ្លាប់​ទទួល​ការ​រិះគន់​ទាក់ទង​សមត្ថភាព​សម្ដែង​ពេល​ដំបូង​ៗ តែ James Ma បាន​អភិវឌ្ឍ​សមត្ថភាព​ខ្លួន​ឯង​បាន​យ៉ាង​ល្អ​នៅ​ពេល​នេះ និង​ទទួល​បាន​ការ​គាំទ្រ​យ៉ាង​ច្រើន​លើសលប់។ កាន់​តែ​ពិសេស​ដែរ​នោះ James Ma បាន​ចាប់​ផ្ដើម​ថត​ភាពយន្ត​ខ្នាត​ធំ​ដំបូង​ដោយ​ចាប់​ដៃ​គូ​ជាមួយ​សមាជិក​ក្រុម​ចម្រៀង​កូរ៉េ T-ara Eun Jung។​

៤. James Jirayu

James Jirayu មិន​អាច​នឹង​មើល​រំលង​បាន​ឡើយ​ក្នុង​បញ្ជី​នេះ ដោយ​ក្រៅ​ពី​ទាក់ទាញ​បេះដូង​អ្នក​គាំទ្រ​នារី​ៗ​ពេញ​ប្រទេស​ថៃ​ហើយ នៅ​ក្រៅ​ប្រទេស​វិញ​ក៏​មាន​អ្នក​គាំទ្រ​ច្រើន​មិន​ធម្មតា​ដែរ។ ដោយ​សារ​មាន​ទាំង​សម្រស់ និង​សមត្ថភាព​ទាំង​ការ​សម្ដែង​និង​ផ្នែក​តន្ត្រី James ធ្លាប់​បាន​ចេញ​ចម្រៀង​នៅ​ប្រទេស​ជប៉ុន និង​ចុះ​កិច្ចសន្យា​ជាមួយ​ក្រុមហ៊ុន​នៅ​ប្រទេស​ជប៉ុន​ថែម​ទៀត។

៥. Weir Sukollawat

សម្រាប់​តារា​ឯក​ប្រុស Weir Sukollawat នៅ​ពេល​នេះ​អាច​និយាយ​បាន​ថា​ជា​តារា​ប្រុស​លំដាប់​ទី​មួយ​ប្រចាំ​ប៉ុស្តិ៍​លេខ​៧​ទៅ​ហើយ ព្រោះ​មិន​ត្រឹម​តែ​មាន​​រូប​សង្ហា ទឹក​ដៃ​សម្ដែង​ល្អ តែ​ថែម​ទាំង​មាន​ទឹក​ចិត្ត​ធ្វើ​សកម្មភាព​មនុស្ស​ធម៌​ជា​រឿយ​ៗ​ថែម​ទៀត។ ថ្មី​ៗ​នេះ​ Weir ទើប​តែ​ចូលរួម​កម្មវិធី​ជួបជុំ​អ្នក​គាំទ្រ​របស់​ខ្លួន​នៅ​អាមេរិក ហើយ​នៅ​ប្រទេស​ផ្សេង​ៗ​ក៏​មាន​ការ​ទាក់ទង​ឲ្យ​ទៅ​សម្ដែង​ជា​ច្រើន​ដែរ។

៦. Mario Maurer

អាច​និយាយ​បាន​ថា​ជា​តារា​ប្រុស​ដែល​មាន​អ្នក​គាំទ្រ​ក្រៅ​ប្រទេស​ច្រើន​បំផុត សម្រាប់ Mario Maurer តាម​រយៈ​ភាពយន្ត​ល្បី​របស់​ខ្លួន​ដូច​ជា "Love of Siam” និង "Pee Mak” ដែល​ធ្វើ​ឲ្យ​តារា​រូប​នេះ​មាន​ការងារ​ក្រៅ​ប្រទេស​យ៉ាង​មមាញឹក។ ទោះ​យ៉ាង​ណា​ក្ដី​ក្នុង​ប្រទេស​ខ្លួន Mario ក៏​នៅ​មាន​ការងារ​ច្រើន​ដូច​គ្នា ហើយ​ថ្មី​ៗ​នេះ​បាន​សហការ​គ្នា​ជាមួយ​អាយដល​ល្បី​កូរ៉េ Sandara Park ដែល​ទទួល​បាន​ការ​ចាប់​អារម្មណ៍​ជា​ច្រើន។

៧. Mike Thongraya

បន្ទាប់​មក​នេះ​គឺ​កំឡោះ​សង្ហា Mike Thongraya ដែល​ពេល​នេះ​ហាក់​មាន​រឿង​ភាគ​ជា​ច្រើន​ទាក់ទាញ​ចិត្ត​អ្នក​គាំទ្រ​តួ​យ៉ាង​រឿង "សមុទ្រ​ភ្លើង"និង​រឿង "គ្រា​មួយ​នៃ​បេះដូង" ដែល​មាន​អ្នក​គាំទ្រ​យ៉ាង​ច្រើន​នៅ​ប្រទេស​ចិន និង​បាន​ចូលរួម​កម្មវិធី​បង្ហាញ​ម៉ូដ​ជា​ច្រើន។ ថ្មី​ៗ​នេះ Mike ក៏​នៅ​មាន​រឿង​ភាគ​ល្បី​មួយ​ទៀត​គឺ​រឿង "ពេជ្រ​កាត់​ពេជ្រ"។

៨. Mike Pattaradet

ងាក​មក​តារា​សម្ដែង Mike Pattaradet ឯណេះ​វិញ​ក៏​កំពុង​មាន​សន្ទុះ​គាំទ្រ​ខ្លាំង​ដែរ ដោយ​មាន​រឿង​ភាគ​ត្រូវ​ចិត្ត​អ្នក​គាំទ្រ​កាន់​តែ​ច្រើន ហើយ​ជា​ពិសេស​បាន​ចាប់​ដៃ​គូ​ជាមួយ​តារា​ស្រី Baifern Phimchanok ដែល​ជា​តារា​ស្រី​មាន​អ្នក​គាំទ្រ​ច្រើន​នៅ​ក្រៅ​ប្រទេស។ អ្វី​ដែល​សំខាន់ Mike អាច​និយាយ​ភាសា​ចិន​បាន ដែល​ធ្វើ​ឲ្យ​គេ​មាន​ទំនាក់ទំនង​កាន់​តែ​ល្អ​ជាមួយ​អ្នក​គាំទ្រ​របស់​ខ្លួន​នៅ​ទីផ្សារ​ដ៏​ធំ​នេះ។

៩. Push Puttichai

កំឡោះ​មុខ​ស្រស់ Push Puttichai ក៏​ជា​តារា​ប្រុស​ម្នាក់​ទៀត​ដែល​ស្ថិត​ក្នុង​ចិត្ត​អ្នក​គាំទ្រ​នារី​ៗ​ទូទាំង​ប្រទេស ដោយ​មាន​សមត្ថភាព​ពិសេស​ច្រើន​យ៉ាង​ទាំង​ការ​សម្ដែង ជា​ពិធីករ និង​ឌីជេ​វិទ្យុ។ តួ​ឯក​ប្រុស U-Prince ក៏​មាន​ការ​គាំទ្រ​ជា​ច្រើន​ផង​ដែរ​នៅ​ប្រទេស​ចិន។

១០. Sean Jindachot

ចុង​បញ្ចប់​នេះ​គឺ​តារា​សម្ដែង Sean Jindachot ដែល​បាន​ទាក់ចិត្ត​អ្នក​គាំទ្រ​ជា​ច្រើន​តាម​រយៈ​រូបរាង​សង្ហា និង​សមត្ថភាព​សម្ដែង​ប៉ិនប្រសប់​របស់​ខ្លួន។ ថ្មី​ៗនេះ Sean បាន​ត្រលប់​មក​សម្ដែង​រួម​គ្នា​វិញ​ជាមួយ​ដៃ​គូ​ចាស់​របស់​ខ្លួន​គឺ Esther Supreeleela ដែល​មាន​ការ​គាំទ្រ​ច្រើន​បំផុត​ពី​ទស្សនិកជន ៕

ចុចអាន៖ការ​ពិត​ពិសេស១០​យ៉ាង​ដែល​អ្នក​មិន​ធ្លាប់​ដឹង​ពី James Ma

ចុចអាន៖តារា​ល្បី​​ពី​ក្មេង៦​រូប​ដែល​កាន់​តែ​ស្អាត​និង​សិចស៊ី ពេល​ធំ​ពេញ​រូប​រាង

ប្រែ​សម្រួល៖ វ៉ាន់ថន ប្រភព៖ daradaily