ខកខាន ៣ ឆ្នាំ ក្រោយរឿងជាន់គ្នានៅស្ពានពេជ្រ ឥឡូវអុំទូកចាប់ផ្ដើមឡើងវិញ

2014-11-05 18:12:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹកនេះ ពិធីបុណ្យអុំទូកបានចាប់ផ្ដើមដំណើរការឡើងវិញហើយ។ ការចាប់ផ្ដើមសារជាថ្មី ធ្វើឡើងបន្ទាប់ពី ពិធីបុណ្យអុំទូក បានផ្អាកអស់រយៈពេល ៣ ឆ្នាំកន្លងមក លើកទី ១ ក្រោមហេតុផលស្ថានភាពទឹកជំនន់ខ្លាំង កាលពីឆ្នាំ ២០១១, លើកទី ២ ដើម្បីជាការគោរព និង កាន់ទុក្ខចំពោះព្រះបរមសពព្រះមហាវីរក្សត្រ សម្ដេចព្រះបាទនរោត្តមសីហនុ ដែលបានសោយទិវង្គតកាលពីថ្ងៃឆ្លងភ្ជុំបិណ្ឌ ទី១៥ តុលា ២០១២ និង ឆ្នាំ ២០១៣ ក្រោមហេតុផលស្ថានភាពទឹកជំនន់ដូចលើកមុន។ ការលុបចោលពិធីអុំទូកទាំងបីលើកនេះ គឺធ្វើឡើងបន្ទាប់ពីហេតុការណ៍ដើរជាន់គ្នានៅស្ពានពេជ្រ កាលពីឆ្នាំ ២០១០។

គេនៅចាំបានថា នៅបរិវេណស្ពានពេជ្រ នៃតំបន់កោះពេជ្រ ដែលជនរងគ្រោះស្លាប់ គឺបណ្ដាលមកពីការរត់ជាន់គ្នា និង ដេកដួលលើគ្នា ព្រមទាំងកង្វះខ្យល់អុកស៊ីហ្សែន នាយប់ថ្ងៃទី ២២ ខែ វិច្ឆិកា ដែលយ៉ាងហោចណាស់មានមនុស្សប្រុស-ស្រី-ចាស់-ក្មេង ប្រមាណជា ៣៤៩ នាក់ស្លាប់ និង ជាង ៧០០នាក់ ទៀតបានរងរបួស។

ចាប់ពីព្រឹត្តិការណ៍នោះមក ពិធីបុណ្យអុំទូកបានផ្អាកអស់រយៈពេល ៣ ឆ្នាំ ជាប់ៗគ្នា។ ប៉ុន្ដែ ឆ្នាំនេះបានចាប់ផ្ដើមឡើងវិញហើយតាមរយៈការរឹតបន្ដឹងវិធានការណ៍នានា។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញធ្លាប់បានប្រាប់ Sabay ថា ដើម្បីការពារសន្តិសុខ សណ្តាប់ធ្នាប់សាលារាជធានីភ្នំពេញ នឹងដាក់ពង្រាយសមត្ថកិច្ចចម្រុះជិត១ម៉ឺននាក់ នៅតាមគោលដៅផេ្សងៗគ្នា រួមទៅនឹងផែនការច្បាស់លាស់មួយ ដោយផ្អែកលើបទពិសោធន៍ ដែលធ្លាប់ឆ្លងកាត់នាពេលកន្លងមក។

តាមឯកឧត្តម កឹម គុណវឌ្ឍន៍ ចំនួនទូកង ទូកមួង ដែលចូលរួមអុំ ចែវ ៣ថ្ងៃ ក្នុងបុណ្យអុំទូកឆ្នាំ២០១៤ នេះគិតមកត្រឹមថ្ងៃទី ២ វិច្ឆិកាមានចំនួនសរុប ២៤៨ ទូក។ គូពិសេសមាន ៨១ គូ។

តោះ! ទស្សនារូបភាពទូកអុំ ចែវ ព្រឹកនេះ តើទិដ្ឋភាពស្រស់ស្អាតបែបណាដែរ?

គួររំលឹកថា ពិធីបុណ្យអុំទូក គឺជាពិធីរំលឹកដល់បុព្វបុរសខ្មែរដែលរក្សាបាននូវបូរណភាពទឹកដី បង្ក្រាបបានរាល់សង្គ្រាមឈ្លានពាននៃបច្ចាមិត្រ ដែលមានបំណងដណ្ដើមយកនូវសម្បត្តិជាតិ ដូនតាយើង មានកងទ័ពជាច្រើនផ្នែក ពិសេស គឺកងទ័ពជើងទឹកនេះឯង។

ពិធីអុំទូក ជាពិធីមួយរំលឹកឡើងវិញ នូវអនុស្សាវរីយ៍ នៃការរៀបចំក្បួន សមយុទ្ធកងទ័ពជើងទឹករបស់ខ្មែរបុរាណ ដែលពីដើម គេតែងតែប្រារព្ធធ្វើឡើង នៅថ្ងៃទី ១៤-១៥ កើត និង ១ រោច ខែអស្សុជ រៀងរាល់ឆ្នាំ។ ម្យ៉ាងទៀតដោយមានការដឹងគុណដល់ទឹកដី ដែលយើងគ្រប់គ្នា បានរស់នៅសុខសាន្តនេះ ពិធីនេះប្រារព្ធឡើង ដើម្បីជាដង្វាយដល់ព្រះគង្គា និង ព្រះធរណី៕

សូមចុចអាន៖ ពាក្យខុសបច្ចេកទេសលែងមានទៀតហើយ ឥឡូវ អាជ្ញាធរបញ្ជាឲ្យដកកំណាត់ដែកអស់ហើយ

សូមចុចអាន៖ ប្រជាជននៅតែបារម្ភរឿងជាន់គ្នានៅកោះពេជ្រមិនទាន់បាត់

សូមចុចអាន៖ ចរន្តទឹកទន្លេសាបហូរខ្លាំង កីឡាករអុំទូក ត្រូវប្រាប់ឲ្យប្រុងប្រយ័ត្នខ្ពស់