មាស សុខសោភា ឧបត្ថម្ភ ប្រាក់ ១លានរៀលដល់ទូកបីមកពី កំពង់ធំ

2014-11-06 15:37:23
ចំនួនមតិ 0 | ចំនួនចែករំលែក 0

ចន្លោះមិនឃើញ

មាស សុខសោភា ឧបត្ថម្ភទឹកប្រាក់ ១លានរៀលដល់ទូកបីមកពីខេត្ត កំពង់ធំ ក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក រយៈពេលបីថ្ងៃនៅមុខព្រះបរមរាជវាំង។

ទូកទាំងបីមកពីខេត្តកំពង់ធំ ដែលស្ថិតក្នុងស្រុក តាអោកដែលនាងបានឧបត្ថម្ភមានឈ្មោះដូចជា ព្រះចន្ទកុមារធេរាសែនជ័យ តាអោកតេជោសែនជ័យបារមីកំពុងស្បូវ និងមរកតលង្កាតេជោសែនជ័យ។

តារាចម្រៀងល្បីឈ្មោះក្នុងផលិតកម្ម Town មាស សុខសោភា និយាយថា៖"បីទូកហ្នឹងខ្ញុំឧបត្ថម្ភ ១លានរៀល តែនេះជាតួលេខបណ្ដោះអាសន្នទេ អាចច្រើនលើសពីនេះទៀតចាំមើលពួកគាត់សិន"។

តារាចម្រៀងរូបនេះបន្តថា ទឹកប្រាក់១លានរៀលតិចតួចប៉ុណ្ណោះ ប៉ុន្តែគឺជាការលើកទឹកចិត្តដល់ក្រុមកីឡាករគ្រប់រូបឱ្យមានកម្លាំងដើម្បីប្រជែងនឹងទូកដទៃទៀតដែលត្រូវប្រកួតជាមួយគ្នា។

បើទោះជាចាញ់ ឬមួយក៏ឈ្នះ មាស សុខសោភា និយាយថាមិនសំខាន់ឡើយ សំខាន់គឺការចេះរួបរួមសាមគ្គីគ្នា ក៏ដូចជាចូលរួមអបអរសាទរព្រះរាជពិធីដ៏ល្អផូរផង់របស់ខ្មែរមានអាយុកាលរាប់ពាន់ឆ្នាំមកហើយ។

ទន្ទឹមនឹងការជួយឧបត្ថម្ភដល់ទូកទាំងបីមកពីស្រុក តាអោក ខេត្តកំពង់ធំខាងលើ រយៈពេលបីថ្ងៃក្នុងព្រះរាជពិធីនេះ នាងមិនមានពេលសម្រាកទេ គឺជាប់ច្រៀងឱ្យបណ្ដាក្រុមហ៊ុន និងទូរទស្សន៍ពេញតែម្ដង។

ក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក រយៈពេលបីថ្ងៃនេះ តារាចម្រៀងល្បីឈ្មោះខាងលើជូនពរឱ្យប្រជាពលរដ្ឋខ្មែរទូទាំងប្រទេសធ្វើដំណើរប្រកបដោយសេចក្ដីសុខ ជាពិសេសក្រុមកីឡាករ កីឡាការិនីជាអ្នកអុំទូកមានសុវត្ថិភាពគ្រប់ពេល។

មាស សុខសោភា ទើបត្រឡប់មកពីប្រទេស ចិនក្នុងដំណើរទស្សនកិច្ចក្រុមហ៊ុនទូរសព្ទ Huawei ដែលនាងតំណាងផ្សព្វផ្សាយទូរសព្ទនេះក្នុងប្រទេសកម្ពុជា។ ក្រៅតែពីមានភាពល្បីឈ្មោះក្នុងនាមជាតារាចម្រៀងស្រីឈានមុខ តារារូបនេះក៏ឈានមុខដែរក្នុងការផ្សព្វផ្សាយស្ប៉តពាណិជ្ជកម្ម៕

អានអត្ថបទបន្ត៖ អ្នកគ្រប់គ្រងកម្មវិធីម្នាក់ថា ខេម អាចប្រជែង ព្រាប សុវត្ថិ និង សិរីមន្ត បាននាថ្ងៃខាងមុខ!

អានអត្ថបទបន្ត៖ ភាពយន្តដ៏ល្បីកាល ២០០៦ ត្រូវបានយកមកបញ្ចាំងឡើងវិញអបអរព្រះរាជពិធីបុណ្យអុំទូក

អានអត្ថបទបន្ត៖ តារាស្រីម្នាក់ធ្លាប់ចោរឆក់ខ្សែដៃមាសអស់ ៥ ជី ថ្ងៃបុណ្យអុំទូក