ក្តៅៗ! លម្អិតជុំវិញ ការបាញ់គ្រាប់មីស៊ីលរបស់អាមេរិក លើស៊ីរី នៅមុននេះបន្តិច
- 2017-04-07 02:52:49
- ចំនួនមតិ 0 | ចំនួនចែករំលែក 0
ក្តៅៗ! លម្អិតជុំវិញ ការបាញ់គ្រាប់មីស៊ីលរបស់អាមេរិក លើស៊ីរី នៅមុននេះបន្តិច
ចន្លោះមិនឃើញ
យោងតាមសារព័ត៌មាន CNN បានឲ្យដឹងថា សហរដ្ឋអាមេរិកបានបើកការវាយប្រហារយោធា នៅយប់ថ្ងៃព្រហស្បតិ៍ ទី០៦ (ត្រូវនឹងព្រឹក ថ្ងៃសុក្រ ទី០៧ នៅកម្ពុជា និងស៊ីរី) ខែមេសានេះ ទៅលើរដ្ឋាភិបាលស៊ីរី ក្នុងការសងសឹកចំពោះការវាយប្រហារដោយប្រើអាវុធគីមី ដ៏សាហាវឃោរឃៅលើជនស៊ីវិល កាលពីព្រឹកថ្ងៃអង្គារ ទី០៤ ខែមេសា នាដើមសប្ដាហ៍នេះ។
តាមរយៈការបញ្ជាដោយផ្ទាល់ពីប្រធានាធិបតីអាមេរិក លោក ដូណាល់ ត្រាំ កប៉ាល់យោធាអាមេរិក បានបើកប្រតិបត្តិការបាញ់គ្រាប់មីស៊ីលរយៈចម្ងាយឆ្ងាយ Tomahawk ចន្លោះពី៥០ ទៅ ៦០គ្រាប់ លើមូលដ្ឋានកងទ័ពអាកាសស៊ីរី ដែលបានវាយប្រហារអាវុធគីមី។ នេះបើតាមការឲ្យដឹងពីមន្ត្រីអាមេរិក។
«នៅយប់នេះ ខ្ញុំបានបញ្ជាឲ្យបាញ់គោលដៅយោធាអាកាស នៅក្នុងប្រទេសស៊ីរី ដែលជាកន្លែងវាយប្រហារអាវុធគីមី។ វាគឺជាសន្តិសុខជាតិដ៏សំខាន់សម្រាប់សហរដ្ឋអាមេរិក ដើម្បីទប់ស្កាត់ និងបង្អាក់ការរាលដាល ក៏ដូចជាការប្រើប្រាស់អាវុធគីមីសម្លាប់មនុស្ស»។ នេះបើតាមការថ្លែងសុន្ទរកថាខ្លីមួយរបស់ លោក ត្រាំ។
ប្រធានាធិបតីអាមេរិក វ័យ៧០ឆ្នាំរូបនេះ បានបន្ថែមទៀតថា «វាគ្មានជម្លោះណាដែលប្រទេសស៊ីរី ចាំបាច់ត្រូវប្រើអាវុធគីមីហាមឃាត់ (សារីន) ដែលរំលោភលើកាតព្វកិច្ចរបស់ខ្លួន ក្រោមអនុសញ្ញាអាវុធគីមី និងមិនអើពើពីការជំរុញរបស់ក្រុមប្រឹក្សាសន្តិសុខអង្គការសហប្រជាជាតិ ទេ។ ការព្យាយាមរាប់ឆ្នាំដើម្បីផ្លាស់ប្ដូរឥរិយាបថរបស់មេដឹកនាំស៊ីរី លោក អាសាដ ត្រូវបានបរាជ័យយ៉ាងខ្លាំង»។
រដ្ឋមន្រ្តីការបរទេសអាមេរិក លោក Rex Tillerson បាននិយាយថា មេដឹកនាំស៊ីរី លោក អាសាដ (Bashar al-Assad) មិនគួរមានតួនាទីដឹកនាំប្រទេសស៊ីរី នៅពេលអនាគតទៀតនោះទេ។
បើយោងតាមមន្ត្រីការពារជាតិអាមេរិកម្នាក់ បាននិយាយថា ការវាយប្រហាររបស់អាមេរិក គឺសំដៅលើផ្លូវយន្តហោះ យន្តហោះ និង កន្លែងចាក់សាំងយន្តហោះ។ គ្រាប់មីស៊ីលទាំងនោះ ត្រូវបានបាញ់ចេញពីនាវាចម្បាំង នៅភាគខាងកើតសមុទ្រមេឌីទែរ៉ាណេ។
«ការវាយប្រហារបានបញ្ចប់ហើយ នៅរង់ចាំតែការសម្រេចចិត្តផ្សេងទៀតប៉ុណ្ណោះ»។ នេះបើតាមការបញ្ជាក់បន្ថែមពីមន្ត្រីខាងលើ។
មន្ត្រីរដ្ឋបាលជាន់ខ្ពស់អាមេរិកម្នាក់ បានប្រាប់ឲ្យដឹងថា ប្រធានាធិបតី ត្រាំ បានខ្លោចចិត្តយ៉ាងខ្លាំង ចំពោះរូបភាពនៃការស្លាប់របស់កុមារ ក្នុងចំណោមជនស៊ីវិលដែលបានស្លាប់ និងរងរបួស នៅក្នុងការវាយប្រហារដោយអាវុធគីមី នៅក្នុងប្រទេសស៊ីរី ទើបបង្ខំចិត្តបើកការវាយប្រហារតបតវិញតែម្ដង៕