រុស្ស៊ីចល័តនាវាចម្បាំងយក្ស ប្រដាប់គ្រាប់មីស៊ីលទៅស៊ីរី ក្រោយអាមេរិកបាញ់៥៩គ្រាប់

2017-04-09 03:20:18
ចំនួនមតិ 0 | ចំនួនចែករំលែក 0

ចន្លោះមិនឃើញ

នាវាចម្បាំងរុស្ស៊ីមួយគ្រឿង ដែលប្រដាប់ដោយគ្រាប់មីស៊ីល កំពុងចល័តទៅកាន់ឆ្នេរសមុទ្រនៃប្រទេសស៊ីរី បន្ទាប់ពីសហរដ្ឋអាមេរិក បានបាញ់មីស៊ីល ចំនួន៥៩គ្រាប់ ទៅលើមូលដ្ឋានកងទ័ពអាកាសរបស់ប្រទេសស៊ីរី កាលពីថ្ងៃសុក្រ កន្លងទៅនេះ ដែលបានសម្លាប់ទាហានស៊ីរី យ៉ាងហោចណាស់ ៦នាក់ និងកម្ទេចយន្តហោះ អាវុធយុទ្ធភណ្ឌ និង អគារមួយចំនួនទៀតផង។

នាវាចម្បាំង Admiral Grigorovich របស់រុស្ស៊ី

នាវាចម្បាំងមានឈ្មោះថា Admiral Grigorovich របស់រុស្ស៊ី ត្រូវបានចល័តពីសមុទ្រខ្មៅ (Black Sea) ទៅកាន់កំពង់ផែក្នុងទីក្រុង Tartus ដែលជាមូលដ្ឋានទ័ពជើងទឹករុស្ស៊ី។

«នាវានេះនឹងប្រតិបត្តិការនៅក្នុងតំបន់អនុញ្ញាត ដើម្បីផ្លាស់ប្ដូរស្ថានភាពយោធា។ វាផ្ទុកទៅដោយគ្រាប់មីស៊ីល ប្រព័ន្ធការពារគ្រាប់មីស៊ីល កាំភ្លើងធំ កាំភ្លើងបាញ់យន្តហោះ គ្រាប់បែកបុក និងអាចចតឧទ្ធម្ភាគចក្របាន»។ នេះបើតាមការឲ្យដឹងពីប្រព័ន្ធផ្សព្វផ្សាយរដ្ឋរបស់រុស្ស៊ី។

គួរបញ្ជាក់ថា រុស្ស៊ីស្ថិតក្នុងចំណោមប្រទេសជាច្រើន ដែលប្រើមូលដ្ឋានទ័ពអាកាស Shayrat ដែលសហរដ្ឋអាមេរិកបានវាយប្រហារ ប៉ុន្តែសហរដ្ឋអាមេរិក បានព្រមានកងកម្លាំងរបស់ប្រធានាធិបតីរុស្ស៊ី លោក Vladimir Putin នៅមុនពេលវាយប្រហារ ដូច្នេះហើយទើបមិនមានទាហាន Kremlin របស់រុស្ស៊ីទទួលរងគ្រោះ។

ផ្ទុយទៅវិញ រុស្ស៊ី បានថ្កោលទោសការបាញ់ផ្លោងគ្រាប់មីស៊ីលរបស់អាមេរិក ទៅលើមូលដ្ឋានកងទ័ពអាកាសនោះ ថាជាការរំលោភលើច្បាប់អន្តរជាតិ។

អ្នកនាំពាក្យរបស់ លោក Putin បានឲ្យដឹងថា ការវាយប្រហាររបស់អាមេរិកទៅលើស៊ីរី បានធ្វើឲ្យខូចខាតយ៉ាងធ្ងន់ធ្ងរ រវាងទំនាក់ទំនងនៃទីក្រុងវ៉ាស៊ីនតោន (សហរដ្ឋអាមេរិក) និង ទីក្រុងមូស្គូ (រុស្ស៊ី) ដែលបានផ្អាកកិច្ចព្រមព្រៀងមួយយ៉ាងរហ័ស ក្នុងគោលបំណងជៀសវាងការប៉ះទង្គិចជាមួយកងកម្លាំងអាមេរិក៕

ប្រភព៖ Independent ប្រែសម្រួល៖ សេង ឡុង