គ្រួទ័ពថា ក្រុមខ្លួនយ៉ាងច្រើនមានត្រឹមកីឡាករពីររូបជាប់ជម្រើសជាតិ

2017-05-27 02:31:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ទេព ឡុងរចនា គ្រួទ័ពបង្ហើបឈ្មោះកីឡាករក្នុងក្រុមរបស់ខ្លួនពីររូប ដែលអាចជាប់ជម្រើសជាតិក្នុងការប្រកួតមិត្តភាពអន្តរជាតិប៉ះឥណ្ឌូណេស៊ីថ្ងៃទី៨ ខែមិថុនា ឆ្នាំ២០១៧ នៅពហុកីឡដ្ឋានជាតិវេលាម៉ោង ៦:៣០ នាទី។

លោក ទេព ឡុងរចនា

គ្រូបង្វឹកកម្រិត A-License រូបនេះបានឲ្យដឹងថា ក្លឹបរបស់លោកយ៉ាងច្រើនមានតែកីឡាករពីររូបប៉ុណ្ណោះ ដែលអាចជាប់ជម្រើសជាតិលើកនេះគឺ អ៊ុំ សេរីរ័ត្ន និង ច្រឹង ពលរដ្ឋ។ មូលហេតុគិតដូចនេះ ពីព្រោះលោកមើលឃើញការជ្រើសរើសរបស់លោក Leonardo Vitorino គ្រូបង្វឹកកម្ពុជាចូលចិត្តប្រើកីឡាករលឿន និងមានភាពឆ្លាតវៃ។

លោកបន្ថែមថា ការជ្រើសរើសរបស់គ្រូជម្រើសកម្ពុជារូបនេះអាចថាល្អ ប៉ុន្តែក៏មានចំណុចខ្វះខាតដែរ ដូចជារើសកីឡាករក្មេងពេកខ្វះបទពិសោធ ដែលអាចឲ្យក្រុមបរាជ័យជាដើម។ លោកយល់ថា គ្រូបង្វឹកសញ្ជាតិប្រេស៊ីលរូបនេះចូលចិត្តប្រយុទ្ធខ្លាំងទោះប៉ះក្រុមខ្លាំងជាងខ្លួនក៏ដោយ។

សហព័ន្ធបាល់ទាត់កម្ពុជា នឹងប្រកាសបង្ហាញឈ្មោះសមាជិកក្រុមបាល់ទាត់ជម្រើសជាតិវេលាម៉ោងប្រហែល ៣ រសៀលថ្ងៃទី២៩ ខែឧសភា ឆ្នាំ២០១៧ខាងមុខនេះទីស្នាក់ការរបស់សហព័ន្ធបាល់ទាត់កម្ពុជានៅពហុកីឡដ្ឋានជាតិ៕