កិច្ចសម្ភាសន៍លម្អិត ជុំវិញដំណើរការឃោសនាបោះឆ្នោតឃុំ / សង្កាត់ ២០១៧
- 2017-06-01 08:24:12
- ចំនួនមតិ 0 | ចំនួនចែករំលែក 0
កិច្ចសម្ភាសន៍លម្អិត ជុំវិញដំណើរការឃោសនាបោះឆ្នោតឃុំ / សង្កាត់ ២០១៧
ចន្លោះមិនឃើញ
គិតត្រឹមថ្ងៃនេះ យុទ្ធនាការឃោសនាបោះឆ្នោតក្រុមប្រឹក្សាឃុំ/សង្កាត់អាណត្តិទី៤ មានរយៈពេល១៣ ថ្ងៃហើយ។ គណៈកម្មាធិការជាតិរៀបចំការបោះឆ្នោតបានវាយតម្លៃពីដំណើរការល្អប្រសើរ មានការយោគយល់ អធ្យាស្រ័យគ្នាល្អ និងគ្មានហិង្សាពីសំណាក់អ្នកគាំទ្រគណបក្សនយោបាយ។ នេះគឺជាការបង្ហាញពីភាពចាស់ទុំមួយរបស់អ្នកគាំទ្រគណបក្សនយោបាយនានា។ ប៉ុន្តែយ៉ាងណាមិញ គ.ជ.ប នឹងបន្តតាមដានស្ថានការនេះបន្ថែមទៀតរហូតដល់ថ្ងៃចប់យុទ្ធនាការ។ យុទ្ធនាការឃោសនាបោះឆ្នោតក្រុមប្រឹក្សាឃុំ/សង្កាត់ នឹងត្រូវបិទបញ្ចប់នៅថ្ងៃទី ២ ខែឧសភា ស្អែកនេះ។
ដើម្បីជ្រាបលម្អិតពីដំណើរការឃោសនាបោះឆ្នោត សូមតាមដានកិច្ចសម្ភាសរវាង លោក សុផល ភ្នាក់ងាររបស់Sabay និងលោក ហង់ ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោតដូចតទៅ៖
១) តើដំណើរការឃោសនាបោះឆ្នោតក្រុមប្រឹក្សាឃុំ/សង្កាត់ជាង ១០ ថ្ងៃមកនេះព្រឹត្តិទៅយ៉ាងដូចម្ដេច?
លោក ហង់ ពុទ្ធា៖ បាទ ! ការចូលរួមឃោសនារបស់សកម្មជននិងនិងអ្នកគាំទ្រពីគណបក្ស នយោបាយនានាមកដល់ពេលនេះមានលក្ខណៈចាស់ទុំជាងមុន។ គណបក្សនយោបាយ មានស្មារតីក្នុងការប្រកាន់ភ្ជាប់នូវក្រមសីលធម៌ និងគោរពគោលការណ៍ ដែលគ.ជ.ប បានចែង ទើបមិនបណ្ដាលឲ្យមានជម្លោះ ពេលឃោសនា។
២) រហូតមកដល់ពេលនេះ គ ជ ប ទទួលបានពាក្យបណ្តឹងប៉ុន្មាន?
លោក ហង់ ពុទ្ធា៖ បើនិយាយពីបណ្ដឹងខ្ញុំអាចនិយាយបានថា មកទល់នឹងថ្ងៃទី៣០ យើងមាន ៦៥ បណ្ដឹង ក្នុងនោះគណបក្សប្រជាជនមាន ៤៨ បណ្ដឹង គណបក្សសង្គ្រោះជាតិប្ដឹង ១៤បណ្ដឹង គណបក្សហ្វ៊ុនស៊ីនប៉ិច ១ បណ្ដឹង ប្រជាពលរដ្ឋធម្មតាមានពីរបណ្ដឹង ហើយបណ្ដឹងនោះទាក់ទងនឹងការមិនជូនដំណឹងអោយបានមុនបីថ្ងៃ ព្រោះតាមច្បាប់ត្រូវជូនដំណឹងអោយបានមុនបីថ្ងៃមុននឹងឃោសនា មិនគោរពប្រតិទិន បណ្ដឹងទាក់ទងនឹងការហែឆ្លងឃុំ ហើយនឹងមានបណ្ដឹងស្ដីពីការរារាំង ការរំខាន និងការជេរប្រមាថជាដើម។ បច្ចុប្បន្ននេះបណ្ដឹងត្រូវបានដោះស្រាយនៅថ្នាក់ឃុំ/សង្កាត់ និងមានបណ្ដឹងចំនួន៨ បានមកដល់គណៈកម្មការខេត្តរៀបចំការបោះឆ្នោត កំពុងដោះស្រាយ។ តាមនីតិវិធី គ.ជ.ប ត្រូវប្រើរយៈពេលបីថ្ងៃ ក្នុងករណីមិនសះជាត្រូវរុញមកលើ។ គ.ជ.ប បានដោះស្រាយចប់សព្វគ្រប់ ២៤ ករណី និងនៅ១៤ករណីទៀត សឹងឈានទៅរកភាពសះជាទៅហើយ ខណៈអ្នកខ្លះបានដកពាក្យបណ្ដឹង។ បណ្ដឹងភាគច្រើនមិនលំបាករហូតដល់ថា ដោះស្រាយមិនបាននោះទេ។
៣) ក្នុងករណីធ្ងន់ធ្ងរអ្នករង បណ្ដឹងប្រឈមនឹងពិន័យយ៉ាងដូចម្តេច?
លោក ហង់ ពុទ្ធា៖ ក្នុងករណីខុសធ្ងន់ធ្ងរ អ្នកមានកំហុសនឹងទទួលរងពិន័យដោយ គ ជ ប ចន្លោះពី ៥ លានរៀល ទៅ ២០ លានរៀល (ប្រហាក់ប្រហែលទៅនឹង ៥ ០០០ ដុល្លារ)។ ប៉ុន្តែអាណត្តិនេះ គ ជ ប ទទួលបានបណ្ដឹងតិច ខណៈអាណត្តិមុនទទួលបានបណ្ដឹងជិត ៤ ០០០ បណ្ដឹង។
៤) តើរហូតមកដល់ពេលនេះនេះមានអ្នកសង្កេតការណ៍ជាតិ និងអន្តរជាតិមានប៉ុន្មាននាក់ហើយ?
លោក ហង់ ពុទ្ធា៖ ឥឡូវហ្នឹងខាងអ្នកសង្កេតការណ៍ជាតិមាន ៧៤ ២៩៤ នាក់ អ្នកសង្កេតការណ៍អន្តរជាតិខាងសហគមន៍អឺរ៉ុប ១៨ នាក់ ជប៉ុន ១៣នាក់ សហរដ្ឋអាមេរិក ៩៤ នាក់។ គណបក្ស នយោបាយ ៥៨៤១០ នាក់ ហើយគណបក្សនយោបាយមានមានអ្នកសង្កេតការណ៍បម្រុងស្ថិតនៅខាងក្រៅការិយាល័យ ៤៦ ៦៦៦នាក់។ អញ្ចឹងតួលេខនេះច្រើនមែនទែន ហើយ គ.ជ.ប កំពុងបោះពុម្ព បន្ថែមនូវប័ណ្ណសំគាល់ ពីព្រោះថាមានការប៉ាន់ស្មានខុសដែរ មិននឹកស្មានថា ភ្នាក់ងាររបស់គណបក្ស និងអ្នកសង្កេតការណ៍មានច្រើនដល់ម្ល៉ឹង។
៥) តើលោកយល់ថា ការបោះឆ្នោតឃុំសង្កាត់អាណត្តិទី៤ នេះមានភាពសុក្រឹតត្រឹមត្រូវយ៉ាងណាដែរ?
លោក ហង់ ពុទ្ធា៖ អ្វីដែល គ ជ ប បានធ្វើគឺស្របតាមច្បាប់អស់ហើយ ក្នុងនាមជា គ.ជ.ប យើងបានធ្វើការងារជាដំណាក់កាលៗ គ្រាន់តែចាប់ផ្តើមដំបូង គ.ជ.ប បានបង្កើតបញ្ជីបោះឆ្នោតមួយ ល្អប្រសើររហូតដល់ ៩៨ % នេះគឺជាភាពត្រឹមត្រូវហើយ ហើយភាពត្រឹមត្រូវផ្សេងទៀតយើងកំពុងដើរទាំងអស់គ្នា។ ក្រុមអ្នកជំនាញការរបស់សហគមន៍អឺរ៉ុប សហរដ្ឋអាមេរិក និងជប៉ុនបានធ្វើការងារប្រចាំថ្ងៃជាមួយនឹង គ.ជ.ប ហើយការចោទប្រកាន់ ឬ ភាពភ័យខ្លាចណាមួយ គ.ជ.ប បានបើកចំហជានិច្ច ប្ដឹងមក គ.ជ.ប ហើយ គ.ជ.ប នឹងធ្វើការពិនិត្យ ប៉ុន្តែផ្ទុយទៅវិញ គ.ជ.ប នឹងមិនយកមកដោះស្រាយទេនូវមតិជាបុគ្គលមិនមានជាលាយលក្ខណ៍អក្សរ ឬមួយនិយាយជាប្រយោល ដើម្បីចំណេញនយោបាយទៅខាងណាមួយគឺ គ.ជ.ប សុំមិនពិនិត្យដោះស្រាយទេ។
៦) ការបោះឆ្នោតឃុំ/សង្កាត់ នៅឆ្នាំ ២០១៣ កន្លងមក មានករណីមិនទទួលស្គាល់លទ្ធផលឆ្នោត តើលើកនេះអាចមានករណីដដែលហ្នឹងកើតឡើងទេ? លោក ហង់ ពុទ្ធា៖ តាមទិដ្ឋភាពច្បាប់ ដែលគណបក្សទាំងពីរ (សង្គ្រោះជាតិ និងប្រជាជន) បានរួមគ្នាកំណែទម្រង់ហើយ និងមិនមានរឿងហ្នឹងកើតឡើងទេ ប៉ុន្តែបើមានរឿងហ្នឹងកើតឡើង យើងគ្មានអ្វីក្រៅពីយកច្បាប់យកមកដោះស្រាយនោះទេ ហើយច្បាប់ពីមុនមកមានចំណុចដាក់ទោសទណ្ឌ១៣ មាត្រា ចំណែកច្បាប់ថ្មីនេះ ការដាក់ទោសទណ្ឌមាន ២៧ មាត្រា ហើយមានការបង់ប្រាក់បង់អីទៀត។ អញ្ចឹង គ ជ ប សង្ឃឹមថា គណបក្សនយោបាយទាំងអស់គោរពតាមច្បាប់អោយបានល្អ ហើយ គ ជ ប នឹងព្យាយាមអនុវត្តក្នុងនាមអាជ្ញាកណ្ដាល ដែលអាចទុកចិត្តបាន ដោយអ្នកពាក់ព័ន្ធទាំងអស់។
៧) តើរហូតមកដល់ពេលនេះនេះ គ ជ ប បានដឹកសម្ភារៈដល់ឃុំសង្កាត់អស់ហើយឬនៅ?
លោក ហង់ ពុទ្ធា៖ រហូតមកដល់ពេលនេះ យើងបានដឹកជញ្ជូនសម្ភារៈបោះឆ្នោតដល់គ្រប់ឃុំសង្កាត់ទាំង ១៦៤៦ ឃុំសង្កាត់ទូទាំងប្រទេសរួចហើយ។
៨) តើសហគមន៍អឺរ៉ុប សហរដ្ឋអាមេរិក និងប្រទេសជប៉ុន ដែលមានជំនាញការធ្វើជាមួយ គ.ជ.ប យល់ឃើញយ៉ាងដូចម្តេចដែរ ចំពោះដំណើរការឃោសនាកន្លងមក?
លោក ហង់ ពុទ្ធា៖ បាទ !!! ឯកអគ្គរដ្ឋទូតសហគមន៍អឺរ៉ុប សហរដ្ឋអាមេរិក និងប្រទេសជប៉ុន នៅក្នុងជំនួបកាលពីថ្ងៃទី ៣១ ខែឧសភា ជាមួយនឹង គ ជ ប បានបង្ហាញអារម្មណ៍កក់ក្តៅក្នុងអារម្មណ៍ ដោយឃើញបញ្ហាទី១ គឺការឃោសនាបោះឆ្នោតនេះមានភាពល្អប្រសើរ ទី២ ការងារអប់រំកន្លងមករបស់ គ ជ ប ក៏មានភាពល្អប្រសើរដែរ ដែលបណ្ដាលអោយសភាពការការណ៍ឃោសនាបោះឆ្នោតមានភាពល្អប្រសើរច្រើន។
ដោយឡែកឯកអគ្គរដ្ឋទូទូតទាំងបីបានលើកឡើងនូវសំនួរខុសៗគ្នាដែរ ប៉ុន្តែសំនួរខ្លះយើងអាចនិយាយបានថា ជារឿងតែមួយទេ ទី១ តួនាទីរបស់ភ្នាក់ងារសន្តិសុខកន្លងមកមានលេចលឺថា ការបង្ហាញនូវកម្លាំងការពារសន្តិសុខនៅថ្ងៃបោះឆ្នោតហ្នឹងច្រើនពេកធ្វើអោយប្រជាពលរដ្ឋមានការភ័យខ្លាច ប៉ុន្តែ គ ជ ប បានជម្រាបទៅវិញដែរថាមិនមែនជាការបំភ័យអ្នកបោះឆ្នោតទេ គ្មានប្រទេសណាមួយ ដែលគ្មានប៉ូលិស ទាហាន ដើម្បីការពារសណ្ដាប់ធ្នាប់ និងសុខសន្តិភាពរបស់ប្រទេសជាតិនោះទេ។ ពីមុនមកចំនួនមានច្រើនជាងហ្នឹងទៀត ប៉ុន្តែលើកនេះដាក់ជាង ៣៧ ០០០នាក់។ អញ្ចឹងនេះគឺជាសេចក្តីពន្យល់របស់ គ ជ ប ។
ឯកអគ្គរដ្ឋទូតទាំងបី លោកចាប់អារម្មណ៍អោយ គ ជ ប ពន្យល់អំពីដំណើរការនៃការផ្តល់លទ្ធផលបោះឆ្នោតដល់សាធារណៈជនទូទៅ ដែលការប្រកាសលទ្ធផលចែកចេញជាបីដំណាក់កាល គឺ លទ្ធផលបឋម លទ្ធផលបណ្តោះអាសន្ន និងលទ្ធផលផ្លូវការ។
គ ជ ប សុំកុំអោយមានកាភ័ន្តច្រឡំព្រោះកន្លងមកអាចថា មានខាងគណបក្សនយោបាយ អង្គការមិនមែនរដ្ឋាភិបាលលោកថតយកលទ្ធផលបោះឆ្នោតបិទផ្សាយនៅមុខការិយាល័យបូកហើយប្រកាសតែម្តង។ ប៉ុន្តែអ្វីដែល គ ជ ប ធ្វើយើងមានជំហានធ្វើជួនកាលការិយាល័យខ្លះរងនូវបណ្ដឹង យើងត្រូវសិក្សាដោះស្រាយបណ្តឹងទាំងហ្នឹង ហើយមួយទៀតត្រូវផ្ទៀងផ្ទាត់ដែរ។ ឧទាហរណ៍ថា នៅក្នុងការិយាល័យហ្នឹង ទំរង់នៃការបូកនៅតែមានការភ័ន្តច្រឡំទៀត។ អីចឹង! យើងមានយន្តការក្នុងការផ្ទៀងផ្ទាត់ថ្នាក់ខេត្តផង ថ្នាក់ឃុំសង្កាត់ផង និងនៅ គ ជ ប ទៀត។ ដូច្នេះរយៈពេលនៃការផ្ទៀងផ្ទាត់នេះត្រូវប្រើរយៈពេល ២០ ថ្ងៃទើបអាចប្រកាសលទ្ធផលផ្លូវការ៕