តម្រួតឡេក «ខ្ញុំចង់វ៉ៃ ឡៅ ចន្រ្ទា ឲ្យសន្លប់វិញ»

2017-06-20 07:31:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងវ័យក្មេងរបស់ថៃ តម្រួតឡេក បន្ទាប់ពីផ្ដួលកីឡាករ ថុល មករា ដោយជង្គង់ហោះ កាលពីថ្ងៃសៅរ៍ ទី១៧ មិថុនា ឆ្នាំ២០១៧នេះមក គេនៅចិញ្ចឹមចិត្តចង់ជួបជាមួយសត្រូវចាស់ ឡៅ ចន្រ្ទា ដែលធ្លាប់ធ្វើឲ្យខ្លួនសន្លប់នាពេលកន្លងមក។

តម្រួតឡេក ខៀវ

តម្រួតឡេក ធីដេតឡូងើត បានឲ្យដឹងថា គេពិតជាចង់ជួបសងសឹកជាមួយជើងខ្លាំងរបស់កម្ពុជាមកពី ក្លឹបទ័ពពិសេសឆ័ត្រយោង ៩១១ ឡៅ ចន្រ្ទា ម្ដងទៀតណាស់ ហើយគេសង្ឃឹមថាខាងសង្វៀនទូរទស្សន៍ CNC នឹងរៀបចំឲ្យពួកគេជួបគ្នានៅថ្ងៃណាមួយ។

កីឡាករថៃ រូបនេះបន្តថា ហេតុតែគេចង់ជួប ឡៅ ចន្រ្ទា ព្រោះខ្លួនធ្លាប់ចាញ់ដោយសន្លប់ក្រោមថ្មីដៃកីឡាករខាងលើ កាលពីប៉ុន្មានខែមុននេះ ដូច្នេះគេខំប្រឹងហ្វឹកហាត់បន្ថែមទៀត ដើម្បីជួបប្រកួតសងសឹក ហើយរឹតតែចង់ផ្ដួលសត្រូវចាស់ម្នាក់នេះឲ្យសន្លប់វិញម្ដង ដើម្បីប៉ះប៉ូវ ស្ដារកេរ្តិ៍ឈ្មោះដែលរូបគេធ្លាប់បាត់បង់ក្រោមដៃ ឡៅ ចន្រ្ទា។ សម្រាប់ការប្រកួតសងសឹកជាមួយជើងខ្លាំងម្ចាស់មេដាយមាសថ្នាក់ជាតិលើកទី១ រូបនេះគេសង្ឃឹមរហូតដល់ ៨០% ឯណោះថានឹងទទួលបានជ័យជម្នះ ហើយបើនិយាយពីស្នៀតល្អៗរបស់ ឡៅ ចន្រ្ទា គេគឺពូកែកណ្ដាប់ដៃ និងកែង។

កីឡាករ ថុល មករា ចាញ់ តម្រួតឡេក

តម្រួតឡេក ធីដេតឡូងើត ជាកីឡាករថៃ ដែលធ្លាប់បង្ហាញមុខច្រើនដងនៅសង្វៀនទូរទស្សន៍ CNC គេក៏ទើបនឹងធ្លាក់ចេញពីប្រកួតជម្រុះដណ្ដើមខ្សែក្រវាត់ភេសជ្ជៈគោជលជាមួយ ឃីម ឌីម៉ា ផងដែរ ហើយប្រកួតចុងក្រោយរបស់គេគឺផ្ដួលកីឡាករ ថុល មករា ឲ្យសន្លប់ក្នុងទឹកទី៣ នាការប្រកួតមិត្តភាពអន្តរជាតិចុងសប្ដាហ៍កន្លងទៅនេះ៕