មិនគួរជឿ! ទារកអាយុជាង ១ខែ ជួយឪពុកម្ដាយឲ្យគេចផុតពីបាក់ដីសង្កត់ដ៏កាចសាហាវ
- 2017-06-26 03:46:07
- ចំនួនមតិ 0 | ចំនួនចែករំលែក 0
មិនគួរជឿ! ទារកអាយុជាង ១ខែ ជួយឪពុកម្ដាយឲ្យគេចផុតពីបាក់ដីសង្កត់ដ៏កាចសាហាវ
ចន្លោះមិនឃើញ
កាលពីថ្ងៃទី ២៤មិថុនា កន្លងទៅ ខេត្តស៊ីឈួន ប្រទេសចិន បានជួបគ្រោះធម្មជាតិដ៏សាហាវដោយបាក់ដី ធ្លាក់ថ្មភ្នំសង្កត់ផ្ទះជាច្រើនខ្នង និងមនុស្សប្រមាណ ១២០នាក់ត្រូវកប់ទាំងរស់គួរឲ្យអាណោចអាធ័ម។
អ្វីធ្វើឲ្យគេភ្ញាក់ផ្អើលក្នុងហេតុការណ៍នេះគឺ ទារកទើបកើតម្នាក់បានជួយឪពុកម្ដាយ និងខ្លួនគេឲ្យគេចផុតពីគ្រោះថ្នាក់រអិលបាក់ដីបាន ទាំងមិននឹកស្មាន។
អ្នកស្រី Xiao Yanchun និងប្ដី Qiao Dashuai មានអាយុ ២៦ឆ្នាំទាំងពីរនាក់ រស់នៅក្នុងភូមិ Xinmo ស្រុក Maoxian តំបន់ស្វយ័ត Aba Tibetan និង Qiang ខេត្តស៊ីឈួន ភាគនិរតីប្រទេសចិន។ មូលហេតុធ្វើឲ្យពួកគាត់ទាំងពីរអាចរួចផុតពីសេចក្ដីស្លាប់ គឺនៅម៉ោង ៦ព្រឹក កូនប្រុសអាយុ ៣៨ថ្ងៃ របស់ពួកគេបានស្រែកយំយ៉ាងខ្លាំង ដូច្នេះអ្នកស្រី Xiao បានក្រោកពីដំណេកហើយទៅប្ដូរកន្ទប់របស់កូនភ្លាម។
នៅពេលផ្លាស់កន្ទប់ លួងកូនឲ្យបាត់យំរួច អ្នកស្រីបានដើរត្រលប់ទៅកន្លែងគេងវិញ តែមិនទាន់ដល់គ្រែផង គាត់បានឮសំឡេងចម្លែកគ្រាំងៗនៅខាងក្រៅផ្ទះ ហើយអ្នកស្រីមានអារម្មណ៍ថា រញ្ជួយដី។ អ្នកស្រីប្រញាប់អើតកមើលទៅក្រៅភ្លាម ស្រាប់តែឃើញដុំថ្មតូចធំ ទឹក និងល្បាប់ភក់កំពុងហូរបោះពួយមកកាន់បន្ទប់គេងអ្នកស្រី។
ឃើញហេតុការណ៍មិនស្រួល អ្នកស្រីបានឱបកូនប្រុសយ៉ាងណែន និងដាស់ប្ដីឲ្យក្រោក រួចរត់ចេញពីបន្ទប់យ៉ាងទាន់ហន់ និងភិតភ័យយ៉ាងខ្លាំង។
អ្នកស្រី និងប្ដីបានលូនដើរកាត់ទឹកជំនន់ ហើយរត់ទៅរកកន្លែងសុវត្ថិភាពទាំងមិនយកទ្រព្យសម្បត្តិអ្វីតាមខ្លួនឡើយ។ ភូមិនៅក្បែរជើងភ្នំនេះ ត្រូវល្បាប់ភក់ និងថ្មធំៗសង្កត់ពេញទាំងអស់។
ជាសំណាងល្អ នៅម៉ោងប្រមាណ ៩ព្រឹក ប្ដីប្រពន្ធ និងកូន ត្រូវក្រុមសង្គ្រោះបញ្ជូនទៅកាន់មន្ទីរពេទ្យ។ អ្នកស្រី Xiao រៀបរាប់ថា "ពេលព្យាយាមរត់គេច ខ្សាច់បានគ្របពួកយើងពេញខ្លួន ឯកូនប្រុសមានខ្សាច់ពេញមាត់"។ ទោះយ៉ាងណា ពួកគេមិនមានរបួសធ្ងន់ធ្ងរគំរាមកំហែងដល់ជីវិតឡើយ តែវាសនារបស់សមាជិកគ្រួសារផ្សេងទៀតមិនទាន់ដឹងនៅឡើយដូចជាជីដូន ឪពុកម្ដាយ កូនស្រីអាយុ ២ឆ្នាំម្នាក់ទៀត ដែលមិនអាចរត់ចេញពីផ្ទះទាន់ពេលវេលា។
ការបាក់ដីចេញពីភ្នំនេះ បានកប់ភូមិ Xinmo ស្ទើរទាំងស្រុងនៅម៉ោង ៦ព្រឹកដោយមានផ្ទះ ៦២ខ្នង មនុស្ស ៦នាក់ស្លាប់ និង ១១២នាក់កំពុងបាត់ខ្លួន៕
ចុចអាន៖
ទារកអាយុ១១ខែនៅរស់ ពេលបាក់ដីនៅកូឡុំប៊ីស្លាប់យ៉ាងតិច៧៨នាក់
លោកតាម្នាក់ទឹមជាមួយក្របីមួយក្បាល កំពុងធ្វើឱ្យពិភពលោករំជួលចិត្ត