សញ្ញាខ្លះៗបង្ហាញថា អ្នកជាមនុស្សកំពុងបាក់ទឹកចិត្ត

2017-06-28 06:41:39
ចំនួនមតិ 0 | ចំនួនចែករំលែក 0

ចន្លោះមិនឃើញ

បុគ្គលគ្រប់រូបតែងតែមានអារម្មណ៍ស្រងូតស្រងាត់ ឬធ្លាក់ទឹកចិត្ត ក៏ប៉ុន្តែវានឹងបាត់ទៅវិញ ក្នុងរយៈពេលខ្លីនេះគឺជាអារម្មណ៍ឆ្លើយតបទៅនឹងសម្ពាធបញ្ហាក្នុងដំណើរជីវិតប្រចាំថ្ងៃ។ ផ្ទុយទៅវិញជំងឺធ្លាក់ទឹកចិត្ត ជាជំងឺធ្ងន់ធ្ងរទាំងក្នុងផ្នែកវេជ្ជសាស្ត្រ និងចិត្តសាស្ត្រ។

ខាងលើនេះ គឺជាការលើកឡើងរបស់លោករបស់សាស្ត្រាចារ្យវេជ្ជបណ្ឌិត យឹម សុបុត្រា អ្នកឯកទេសវិកលវិទ្យា និងជាប្រធានផ្នែកសុខភាពផ្លូវចិត្ត និងការបំពានគ្រឿងញៀននៃមន្ទីរពេទ្យមិត្តភាពខ្មែរ-សូវៀត ដែលបានថ្លែងក្នុងវេទិកាស្តីពី "ការដោះស្រាយវិបត្តិផ្លូវចិត្តតាមបែបវេជ្ជសាស្ត្រនិងព្រះពុទ្ធសានា" កាលពីចុងសប្តាហ៍មុននេះនៅមជ្ឈមណ្ឌលសហប្រតិបត្តិការកម្ពុជា-ជប៉ុន។

វេជ្ជបណ្ឌិត យឹម សុបុត្រា

លោកវេជ្ជបណ្ឌិតបានបន្ថែមថា ជំងឺបាក់ទឹកចិត្តវាមានរយះពេលយូរ ប៉ះពាល់ដល់អារម្មណ៍ ការគិតអាកប្បកិរិយាសរីរាង្គកាយ ដំណេក តួនាទីមុខងារប្រចាំថ្ងៃ និងមុខងារក្នុងសង្គម ខណៈស្រ្តី ប្រឈមនឹងជំងឺបាក់ទឹកចិត្ត ២ដង ច្រើនជាងបុរស។ លោកវេជ្ជបណ្ឌិតបានលើកឡើងថា មានសញ្ញាខ្លះបង្ហាញថា អ្នកជាមនុស្សបាក់ទឹកចិត្ត រួមមាន៖

អាការៈរាងកាយ

អស់កម្លាំងល្ហិតល្ហៃ
វិបត្តិដំណេក ញុំាមិនបាន ស្រកទម្ងន់
ឈឺក្បាល ចុកចាប់សាច់ដុំស្ទើរពេញខ្លួនប្រាណ - ឈឺចុកផ្សាចុងដង្ហើម ឈឺក្រពះ ទល់លាមក
រដូវមិនទៀង

អាការៈ ផ្លូវចិត្ត

មានអារម្មណ៍ស្រងូតស្រងាត់ ឬធ្លាក់ទឹកចិត្តស្ទើរតែរាល់ថ្ងៃ - បាត់ចំណាប់អារម្មណ៍ និងការសប្បាយស្ទើរគ្រប់សកម្មភាព - លែងមានទំនុកចិត្ត ពិបាកក្នុងការសម្រេចចិត្ត
ស្តីបន្ទោសខ្លួនឯង មិនចង់រស់ ឬធ្លាប់ធ្វើអត្តឃាត ឬមនុស្សឃាតក៏សឹងមាន។

អាកប្បកិរិយា

ពួនសម្ងំនៅក្នុងផ្ទះ
គ្មានចំណង់ចង់ចេញក្រៅ ឬចង់ធ្វើការ
ដកខ្លួនចេញពីគ្រួសារ មិត្តភ័ក្រ និងសង្គម
ពិសាបារី
ឈានទៅរកការប្រើប្រាស់គ្រឿងស្រវឹង និងគ្រឿងញៀន
ប្រើប្រាស់ថ្នាំងងុយគេង ដោយគ្មានវេជ្ជបញ្ជា និងដោយបំពាន។

មូលហេតុ

បញ្ហាគ្រួសាររ-សង្គម
កាបាត់បង់អ្នកជាទីស្រឡាញ់-ខកចិត្ត-សោកស្តាយ
ការបម្រែបម្រួលសារធាតុគីមីខាងក្នុង
ឱសថព្យាបាលមួយចំនួន
ការប្រើប្រាស់គ្រឿងស្រវឹង និងគ្រឿងញៀន
ជំងឺផ្លូវកាយ

ការព្យាបាល

ឱសថប្រឆាំងនឹងជំងឺធា្លក់ទឹកចិត្ត
ការផ្តល់ប្រឹក្សា
ការគាំទ្រផ្លូវចិត្ត
ការសំរាកកាយ និងចិត្ត
លំហាត់ប្រាណ
ការកែរប្រែបែបបទរស់នៅ

លោកវេជ្ជបណ្ឌិតបានឱ្យដឹងថា បើប្រៀបធៀបនឹង៥មុន នឹងបច្ចុប្បន្នចំនួនអ្នកកើតជំងឺបាក់ទឹកចិត្តបានកើនឡើងជាលំដាប់ ក្នុងនោះរាប់បញ្ចូលទាំងករណីថ្មី និងករណីចាស់។ មនុស្សពេញវ័យស្ថិតនៅក្នុងចំណោមអ្នកមានជំងឺបាក់ទឹកចិត្តច្រើនជាងគេ។ ច្រើនដោយសារមនុស្សពេញវ័យប្រឈមនឹងរឿងរ៉ាវសង្គមច្រើន និងមិនទាន់មានបទពិសោធន៍ ប្រលូកក្នុងសង្គម។ ដូច្នេះហើយធ្វើឱ្យយុវជនងាយនឹងប៉ះទង្គិចបញ្ហាផ្លូវចិត្ត ឬបាក់ទឹកចិត្ត៕

ចុចអាន

អត្ថបទ៖ សុផល