ណាសានឹងបង្ហោះយានអវកាសទៅបុកអាចម៍ផ្កាយឆាប់ៗ
- 2017-07-06 03:13:03
- ចំនួនមតិ 0 | ចំនួនចែករំលែក 0
ណាសានឹងបង្ហោះយានអវកាសទៅបុកអាចម៍ផ្កាយឆាប់ៗ
ចន្លោះមិនឃើញ
ណាសាកាន់តែខិតជិតដល់ដំណាក់កាលសាកល្បងផែនការនៃការពារផែនដីពីការប៉ះទង្គិចនៃអាចម៍ផ្កាយហើយ។
បច្ចុប្បន្ននេះណាសាកំពុងស្ថិតក្នុងដំណាក់កាលឌីហ្សាញយានអវកាស "បង្វែរទិសដៅអាចម៍ផ្កាយ" ហៅកាត់ថា DART។ គោលដៅរបស់ DART គឺអាចម៍ផ្កាយដែលមានខ្លួនពីរឈ្មោះថា Didymos ដែលនឹងហោះកាត់ផែនដីនៅឆ្នាំ ២០២២ និង ម្ដងទៀតនៅឆ្នាំ ២០២៤។ ពេលនោះយានអវកាសទំហំប៉ុនទូទឹកកករបស់ណាសានឹងហោះទៅបុកអាចម៍ផ្កាយដែលមានទំហំតូចជាងគេក្នុងចំណោមអាចម៍ផ្កាយទាំងពីរដែលមានឈ្មោះ Didymos B។ DART នឹងហោះទៅបុក Didymos B ក្នុងល្បឿន ៥,៩៥ គ.ម/វិនាទី លឿនជាងល្បឿនគ្រាប់កាំភ្លើង ៩ ដង ដែលនឹងធ្វើឲ្យអាចម៍ផ្កាយប្ដូរទិសដៅ។
Tom Statler អ្នកវិទ្យាសាស្ត្រកាន់កាប់លើគម្រោង DART នេះលើកឡើងថា ៖ "អាចម៍ផ្កាយទាំងគូនេះអាចជាការពិសោធន៍បែបធម្មជាតិដ៏ល្អបំផុតសម្រាប់គម្រោងការនេះ។ ការដែលអាចម៍ផ្កាយ Didymos B ធ្វើដំណើរជុំវិញ Didymos A ធ្វើឲ្យយើងអាចឃើញលទ្ធផលពីការប៉ះទង្គិចបានដោយងាយស្រួល ហើយអាចប្រាកដថាការពិសោធនេះនឹងមិនផ្លាស់ប្ដូរគន្លងរបស់អាចម៍ផ្កាយទាំងគូជុំវិញព្រះអាទិត្យឡើយ"។
គួរឲ្យដឹងថាស្ទើរជារៀងរាល់ថ្ងៃមានអាចម៍ផ្កាយតូចៗហោះសំដៅមកផែនដី ប៉ុន្តែអ្វីដែលសំខាន់គឺវាមិនបង្កហានិភ័យដល់ផែនដីឡើយ ព្រោះវាបានបំបែកខ្លួនក្នុងបរិយាកាស។ កាលពីខែមុននៅថ្ងៃទី ៣០ ខែមិថុនា ណាសាបានប្រារព្ធទិវាអាចម៍ផ្កាយដើម្បីរំឭកពីហេតុការណ៍ Tunguska ដែលមានអាចម៍ផ្កាយទំហំ ១២២ ម៉ែត្រ ហោះមកកម្ទេចតំបន់ព្រៃទំហំ ១ ៩៩៤ គីឡូម៉ែត្រការ៉េ ក្បែរទន្លេ Stony Tunguska ខេត្ត Siberia ប្រទេសរុស្សី។ ហេតុការណ៍ផ្ទុះនេះនៅតែជាការផ្ទុះមានឥទ្ធិពលខ្លាំងជាងគេក្នុងប្រវត្តិសាស្ត្រ ដោយបង្កើតថាមពលខ្លាំងជាងគ្រាប់បែបអាតូមទម្លាក់នៅទីក្រុង Hiroshima ដល់ ១៨៥ ដង៕
ចុចអាន៖