Vertu បិទទ្វារ ព្រោះជំពាក់បំណុលគេវ័ណ្ឌក

2017-07-14 01:58:05
ចំនួនមតិ 0 | ចំនួនចែករំលែក 0

ចន្លោះមិនឃើញ

Vertu ក្រុមហ៊ុនផលិតស្មាតហ្វូនតម្លៃថ្លៃៗផុតលេខរបស់ចក្រភពអង់គ្លេសនឹងត្រូវបិទដំណើរការដោយសារផែនការសង្គ្រោះរបស់ម្ចាស់ក្រុមហ៊ុននេះបានបរាជ័យ។

Murat Hakan Uzan អ្នកជំនួញដែលជាម្ចាស់ក្រុមហ៊ុនខាងលើបានបណ្ដាក់ទុនទឹកប្រាក់ ២,៤ លានដុល្លារដើម្បីស្រោចស្រង់ក្រុមហ៊ុនពីការដួលរលំ ប៉ុន្តែការបណ្ដាក់ទុននេះគ្មានផលនោះទេ ព្រោះបំណុលសរុបរបស់ Vertu មានដល់ ១៦៥,៥ លានដុល្លារឯណោះ។ បំណុលដ៏ច្រើនលើសលប់នេះមានគិតបញ្ចូលទាំងវិក្កយបត្រមិនទាន់ទូទាត់ និង ប្រាក់ខែដែលមិនទាន់បើកឲ្យបុគ្គលិក។ ជាលទ្ធផលការដែលមិនអាចសង្គ្រោះក្រុមហ៊ុនបាននេះ បណ្ដាលឲ្យបុគ្គលិកជំនាញប្រហែល ២០០ នាក់បាត់បង់ការងារ។

ត្បិតថាក្រុមហ៊ុនបានបិទដំណើរការមែនប៉ុន្តែ Hakan Uzan នឹងរក្សាទុកនូវម៉ាកសញ្ញា, បច្ចេកវិទ្យា និង អាជ្ញាប័ណ្ណ ដោយមានគម្រោងនឹងធ្វើឲ្យក្រុមហ៊ុនរស់រានមានជីវិតវិញនាពេលខាងមុខ។ គួរដឹងថា Vertu បានចាប់កំណត់នៅឆ្នាំ ១៩៩៨ ដោយដើមឡើងជាផ្នែកមួយនៃក្រុមហ៊ុនយក្ស Nokia។ នៅឆ្នាំ ២០១២ Vertu ត្រូវបានលក់ទៅឲ្យក្រុមហ៊ុនឯកជន EQT បន្ទាប់មកនៅឆ្នាំ ២០១៥ លក់ទៅឲ្យក្រុមហ៊ុនចិន Godin Holdings។ នៅឆ្នាំ ២០១៦ Hazan ក៏បានសម្រេចទិញយក Vertu ក្នុងតម្លៃ ៦១ លានដុល្លារ ហើយជាលើកចុងក្រោយដែល Vertu ប្ដូរម្ចាស់៕

ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា កុំភ្លេចចុច Like Page Sabay News Technology...

ចុចអាន៖

ប្រភព៖ The Verge ប្រែសម្រួល៖ សុខហេង