មកស្គាល់បណ្ដាញសង្គមដែលគេនិយមប្រើមុនមាន Facebook
- 2017-07-20 04:49:34
- ចំនួនមតិ 0 | ចំនួនចែករំលែក 0
មកស្គាល់បណ្ដាញសង្គមដែលគេនិយមប្រើមុនមាន Facebook
ចន្លោះមិនឃើញ
មុនបណ្ដាញសង្គម Facebook ចាប់កំណើតតាមពិតទៅមានបណ្ដាញសង្គមជាច្រើនបានកើតឡើង ហើយទទួលបានការពេញនិយមជាខ្លាំង។ តទៅនេះនឹងបង្ហាញពីបណ្ដាញសង្គមដែលមានប្រើមុន Facebook៖
ចាប់ផ្ដើមដំបូងគេបំផុតគឺ BBS (Bulletin Board System) ដែលជាកម្មវិធីសម្រាប់ចែករំលែក ឬ ផ្លាស់ប្ដូរសា ឬ ឯកសារផ្សេងៗលើប្រព័ន្ធ Network មួយ ដោយបានបង្ហាញខ្លួនតាំងពីឆ្នាំ ១៩៧៨។ BBS បានក្លាយជាសហគមន៍ទំនាក់ទំនងដ៏សំខាន់មួយចាប់តាំងពីទសវត្សឆ្នាំ ១៩៨០ ដល់ ដើមទសវត្សឆ្នាំ ១៩៩០។ BBS អាចប្រើប្រាស់បានតាមរយៈ Modem ឬ តាមការភ្ជាប់ខ្សែអ៊ីនធឺណិត។ ពេលនោះផ្ទៃ Interface របស់ BBS ភាគច្រើនមានទ្រង់ទ្រាយជាអក្សរសុទ្ធ និង មានផ្ទៃ Background ពណ៌ខ្មៅ។
បន្តមកទៀតមាន CompuServe ហៅកាត់ថា CIS ដែលបានបង្កើតឡើងតាំងពីទសវត្សឆ្នាំ ១៩៧០ ក្នុងរូបរាងជាក្រុមហ៊ុនផ្ដល់សេវាកម្មអនឡាញមួយ។ រហូតដល់ដើមទសវត្សឆ្នាំ ១៩៩០ ទើបសេវាកម្មនេះបានប្រែក្លាយជាប្រព័ន្ធសម្រាប់សន្ទនា (Chat) អនឡាញ, វេទិកាពិភាក្សាលើប្រធានបទជាច្រើន និង ជាបណ្ណាល័យកម្មវិធីដ៏ល្បីមួយ។ CIS ក៏មានកេរ្តិ៍ឈ្មោះល្បីតាមរយៈការបង្កើតរូបភាពមានចលនា (GIF) ផងដែរ ហើយ CIS នេះក៏ជាប្រព័ន្ធដែលគេនិយមប្រើ GIF ច្រើនបំផុត។
នៅឆ្នាំ ១៩៩៤ ក៏លេចចេញនូវបណ្ដាញទំនាក់ទំនង GeoCities មួយទៀត ដោយគំនិតនៃបណ្ដាញនេះចង់ឲ្យអ្នកប្រើប្រាស់បង្កើតនូវមាតិកាតាមចំណង់ចំណូលចិត្តរបស់ខ្លួន។ សេវាកម្មនេះត្រូវបាន Yahoo! ទិញយកនៅឆ្នាំ ១៩៩៩ ប៉ុន្តែ ១០ ឆ្នាំក្រោយ Yahoo! ក៏បានបិទសេវាកម្មនេះចោល។
នៅឆ្នាំ ១៩៩៥ សេវាកម្មមួយទៀតដែលអាចនិយាយថាជាបណ្ដាញទំនាក់ទំនងពេញលេញដំបូងបានឈ្មោះ theglobe។ សេវាកម្មនេះអាចឲ្យអ្នកប្រើប្រាស់បង្ហោះមាតិការបស់ខ្លួន និង ទំនាក់ទំនងជាមួយអ្នកប្រើប្រាស់ដទៃដែលមានចំណង់ចំណូលចិត្តស្រដៀងគ្នា។ ប៉ុន្តែនៅឆ្នាំ ២០០៨ ដោយសារមិនទ្រាំទ្រទៀតបានសេវាកម្មនេះក៏បានបិទទ្វារ។
ឆ្នាំ ១៩៩៧ បណ្ដាញទំនាក់ទំនងថ្មីឈ្មោះថា AOL Instant Messenger បានលេចចេញឡើយដែលគេអាចប្រើសម្រាប់ផ្ញើសា និង ទំនាក់ទំនងគ្នារវាងអ្នកប្រើប្រាស់បានយ៉ាងឆាប់រហ័សជាទីបំផុត។ រហូតមកទល់ឆ្នាំ ២០១៧ នេះ AIM នៅបន្តដំណើរការនៅឡើយ គ្រាន់តែមិនទទួលបានការនិយមប្រើដូចកាលពីចុងទសវត្សឆ្នាំ ១៩៩០ និង ដើមទសវត្សឆ្នាំ ២០០០។
បន្ទាប់មកទៀតឆ្នាំ ១៩៩៧ SixDegrees.com ដែលជាបណ្ដាញទំនាក់ទំនងសង្គមលើវិបសាយមួយបានបង្ហាញខ្លួនជាមួយមុខងារល្បីៗដូចជាការកំណត់ Profile និង បញ្ជីឈ្មោះ Friend ជាដើម។ មានបណ្ដាញសង្គមល្បីៗនាពេលបច្ចុប្បន្នជាច្រើនដែលយកលំនាំតាម SixDegrees.com រួមមាន Friendster, MySpace, LinkedIn និង Facebook ជាដើម។
២០០២ ជាឆ្នាំកំណើតរបស់បណ្ដាញទំនាក់ទំនង FriendSter ដែលអនុញ្ញាតឲ្យអ្នកប្រើប្រាស់ធ្វើការទំនាក់ទំនងជាមួយសមាជិកដទៃ និង ចែករំលែកព័ត៌មាន ឬ រូបភាព/វីដេអូ ជាមួយសមាជិកដទៃបានទៀតផង។ នៅឆ្នាំ ២០១១ FriendSter ក៏បានផ្លាស់ប្ដូរទៅជាសេវាកម្មទំនាក់ទំនងសម្រាប់ការលេងហ្គេមវិញ។
មួយឆ្នាំក្រោយមកក៏លេចចេញវត្តមាន MySpace ដោយមានមតិខ្លះយល់ថាបណ្ដាញទំនាក់ទំនងនេះចម្លងគំនិតតាម FriendSter។ មុខងារដែលមានឲ្យប្រើលើ MySpace មានដូចជាអាចបង្កើតជា Profile ផ្ទាល់ខ្លួន, បង្កើត Blog, បង្កើតក្រុម, បង្ហោះរូបភាព, ចម្រៀង និង វីដេអូបានទៀតផង។ MySpace ត្រូវបាន News Coperation ទិញយកនៅខែកក្កដា ឆ្នាំ ២០០៥ ក្នុងតម្លៃ ៥៨០ លានដុល្លារ ដោយនៅបន្តដំណើរការដល់បច្ចុប្បន្ន។
មួយឆ្នាំមកទៀត Facebook ក៏បានចាប់កំណើតឡើងដោយដំបូងជាបណ្ដាញសម្រាប់ឲ្យសិស្សានុសិស្សនៅសហរដ្ឋអាមេរិកអាចទំនាក់ទំនងគ្នាបានដោយងាយស្រួល។ បណ្ដាញទំនាក់ទំនងនេះដាក់ឲ្យប្រើលើកដំបូងនៅសកលវិទ្យាល័យ Harvard ដោយមានសិស្សជាងពាក់កណ្ដាលនៃសិស្សសរុប ១៩ ៥០០ នាក់បានចុះឈ្មោះប្រើ។ បន្តបន្ទាប់មក Facebook ក៏បានអាប់ដេតទៅជាបណ្ដាញទំនាក់ទំនងទូលំទូលាយមួយ ហើយបច្ចុប្បន្នបានក្លាយជាបណ្ដាញសង្គមធំជាងគេក្នុងលោក មានអ្នកប្រើប្រាស់សរុប ២ ពាន់លាននាក់៕
ចុចអាន៖