បកស្រាយការពិត ក្មេងប្រុសដាក់ក្លាសេក្នុងឡាំងដែលគេល្បីជួញដូរយកគ្រឿងក្នុង

2017-07-20 08:29:41
ចំនួនមតិ 0 | ចំនួនចែករំលែក 0

ចន្លោះមិនឃើញ

វីដេអូមានប្រភពពីចិន ប្រទេសជាច្រើនផ្អើលព័ត៌មានមួយនេះ
វីដេអូអះអាងថា ជាការជួញដូរគ្រឿងក្នុងកុមារ
តាមពិតជាកុមារលង់ទឹកពីរបីឆ្នាំមុនទៅហើយ

វីដេអូក្មេងប្រុសម្នាក់ដេកស្លាប់ក្នុងឡាំងស្នោដែលក្រុមគ្រួសារដាក់ក្លាសេទឹកកកទាំងដុំៗ ត្រូវបានគេបង្ហោះចែកចាយយ៉ាងច្រើនពាសពេញអ៊ីនធឺណិតនៅចិន តាមប្រទេសមួយចំនួនអាស៊ី រហូតធ្លាយដល់កម្ពុជាថែមទៀត ព្រោះបានអះអាងថា ជាការជួញដូរគ្រឿងក្នុងកុមារ។

វីដេអូមានប្រភពចេញពីប្រទេសចិននេះ ក៏បានធ្វើឲ្យអ្នកប្រើប្រាស់បណ្ដាញសង្គមនៅកម្ពុជាជាច្រើន ពិសេសឪពុកម្ដាយបានបង្ហាញក្ដីបារម្ភចំពោះសុវត្ថិភាពកូនតូចៗដែរ។ វីដេអូ អមជាមួយរូបថតមួយសន្លឹក ត្រូវបានគេបង្ហោះនៅលើទំព័រហ្វេសប៊ុកមួយរបស់អ្នកប្រើប្រាស់នៅកម្ពុជាកាលពីថ្ងៃទី ១០កក្កដា ឆ្នាំ ២០១៧ បានសរសេរថា «វាជាការជួញដូរគ្រឿងក្នុងកុមារដែលកំពុងកើនឡើងពីមួយថ្ងៃទៅមួយ»។ ព័ត៌មានមួយនេះ ត្រូវបានគេចែកចាយរហូតដល់ទៅជាង ១១ម៉ឺនដង និងមានអ្នកចូលមើលជាង ៣,១លានដង។

បើយោងទៅតាមគេហទំព័រសារព័ត៌មានសិង្ហបុរី Channelnewsasia បានផ្សាយថា ព័ត៌មានមិនពិតមួយនេះក៏បានផ្ទុះខ្លាំងក្នុងបណ្ដាញសង្គម WhatsApp នៅប្រទេសសិង្ហបុរីដែរ ដែលល្បីតៗគ្នាថា ជាការចាប់ជំរិតក្មេងដាក់ក្នុងឡាំងទឹកកក ដើម្បីយកគ្រឿងក្នុងរបស់កុមារទៅលក់។

ទោះបីជាមានការយល់ឃើញបែបនេះ ប្រភពសារព័ត៌មានភាសាចិន Apple Daily បានស៊ើបដឹងការពិតពីប៉ូលិសទីក្រុង យីយ៉ាង ខេត្តហ៊ូណាន បញ្ជាក់ថា ហេតុការណ៍នេះមិនមែនជាករណីឧក្រិដ្ឋកម្មឡើយ។ កុមាររូបនេះបានលង់ទឹកនៅផ្ទះសាច់ញាតិនៅខេត្តក្វាងទុង រួចត្រូវបងប្អូនយកសាកសពដាក់ក្នុងឡាំងទឹកកកដឹកទៅផ្ទះវិញ ព្រោះតាមផ្លូវឆ្ងាយខ្លាចសាកសពរលួយធុំក្លិន ខណៈមេឃកំពុងក្ដៅខ្លាំង។ ដូច្នេះសូមបងប្អូនកុំមានការយល់ច្រឡំទៀត៕