ញឹម ចាន់ថន ប្រកាសផ្អាកថតរឿងភាគមួយរយៈ

2017-07-26 07:45:23
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងចាស់វស្សាកញ្ញា ញឹម ចាន់ថន បានប្រាប់ថា បច្ចុប្បន្នខ្លួនរវល់ខ្លាំងណាស់លើការងារថតកុនជាពិសេសរឿងភាគ ដោយការងារមមាញឹកបែបនេះ តារាស្រីរូបនេះសូមប្រកាសផ្អាកទទួលថតរឿងមួយរយៈហើយ។

ញឹម ចាន់ថន បានឲ្យដឹងថា បច្ចុប្បន្ននាងកំពុងតែថតភាពយន្តចំនួន ៤រឿង ក្នុងពេលតែមួយ ស្ទើរមិនមានពេលសម្រាកឡើយ មិនត្រឹមតែប៉ុណ្ណោះនាងត្រូវមកធ្វើការជាមេការនៅហាងពេលយប់ថែមទៀត។ រឿងដែលតារាស្រីមានស្រុកកំណើតមកពីខេត្តកំពតរូបនេះកំពុងតែថតមានដូចជារឿង"នេះឬជីវិត", រឿង"ក្រមុំឆ្នាសប៉ះមេស្រុកឆ្នើមៗ", រឿង"រថយន្តក្រុងទៅសៀមរាប" និង រឿងមួយទៀតដែលនាងមិនចំណងជើង ។

"បងអើយថត១ថ្ងៃៗអត់មានពេលសម្រាក មិនថាសៅរ៍ អាទិត្យទេ ហើយយប់ខ្ញុំត្រូវមកធ្វើការនៅ Mango Mango ទៀតព្រោះដូចបងដឹងខ្ញុំជាមេការនៅហាងនេះយូរហើយ" ញឹម ចាន់ថន ថ្លែង។

តារាស្រីខាងលើបានបន្តថា ទន្ទឹមនឹងមមាញឹកនេះ មានផលិតកម្មជាច្រើនបានទាក់ទងនាងទៅថតឲ្យជាបន្តបន្ទាប់ ដែលរឿងទាំងនោះសុទ្ធតែជារឿងភាគទាំងអស់ ដូចនេះនាងបានបដិសេធជាបន្តបន្ទាប់។ ក្រោយពីការងាររឿងខាងលើបានថតចប់រួចរាល់ហើយ ញឹម ចាន់ថន នឹងពិចារណាទទួលរឿងជាបន្តទៀត។

តារាស្រី វ័យ៣៦ឆ្នាំរូបនេះបានបញ្ជាក់ថា ការប្រកាសផ្អាកនេះ នាងផ្អាកតែថតរឿងភាគប៉ុណ្ណោះ ចំណែកថតស្ប៉ត MV ឬរឿងដុំនាងនៅតែទទួល ព្រោះការថតទាំងនោះ មានរយៈពេលខ្លី មិនប៉ះពាល់ការងារច្រើន។

សូមបញ្ជាក់ផងដែរថា ចាប់តាំងពីចូលសិល្បៈកញ្ញា ញឹម ចាន់ថន ធ្លាប់ថតកុនមិនក្រោម៣០រឿងទេ ជាមួយគ្នានោះអតីតក្រុមចម្រៀង High Rock រូបនេះធ្លាប់ក្ដាប់ដំណែងតួឯកមិនតិចជាង១០រឿងឡើយ ប៉ុន្តែមួយរយៈចុងក្រោយនេះ ដោយសារតែវ័យកាន់តែច្រើន នាងត្រូវបានអ្នកដឹកនាំសម្ដែងតម្រូវឲ្យដើរតួម្តាយវិញម្ដង៕