ស្ត្រីធាត់បំផុតរបស់ពិភពលោក ទម្ងន់ជាងកន្លះតោន សម្រកគីឡូបានមិនគួរឲ្យជឿ

2017-07-27 09:49:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីជនជាតិអេហ្ស៊ីបទម្ងន់ ៥០៤គីឡូក្រាម ជាស្ត្រីធាត់បំផុតក្នុងលោក
អ្នកស្រីទៅព្យាបាលនៅប្រទេសឥណ្ឌាកាលពីខែកុម្ភៈ ស្រកទម្ងន់បានជាងពាក់កណ្ដាល
ពេលនេះទៅព្យាបាលនៅអារ៉ាប់រួម ស្រកបានច្រើនមែនទែនអាចក្រោកអង្គុយបាន

ស្ត្រីធាត់បំផុតនៅក្នុងពិភពលោកជនជាតិអេហ្ស៊ីប អ្នកស្រី Eman Ahmed Abdulati មានទម្ងន់ ៥០៤គីឡូក្រាម ត្រូវបានគេបញ្ជូនទៅវះកាត់នៅមន្ទីរពេទ្យអារ៉ាប់រួម ជាមួយលទ្ធផលគួរឲ្យកោតសរសើរ។

ស្ត្រីវ័យ ៣៦ឆ្នាំរូបនេះ សម្រកទម្ងន់បានជាងពាក់កណ្ដាលហើយ បន្ទាប់ពីទទួលការវះកាត់នៅមន្ទីរពេទ្យ Burjeel Hospital ក្នុងទីក្រុង Abu Dhabi ប្រទេសអារ៉ាប់រួម ដោយសង្ឃឹមយ៉ាងមុតមាំថា អាចសម្រកនៅត្រឹមជាង ៩០គីឡូក្រាមមិនខាន។

អ្នកស្រីបានទទួលការព្យាបាលដំបូងនៅប្រទេសឥណ្ឌាកាលពីខែកុម្ភៈ ដោយសម្រកបានជាង ៣២០គីឡូក្រាម។ បន្ទាប់ពីសម្រកទម្ងន់បានជាងពាក់កណ្ដាល អ្នកស្រីត្រូវបានគេបញ្ជូនទៅកាន់មន្ទីរពេទ្យទីក្រុង Abu Dhabi ក្នុងប្រទេសអារ៉ាប់រួម កាលពីខែឧសភា ដើម្បីព្យាបាលបន្ថែមព្រោះមានបញ្ហាឆ្អឹង។

ពេលនេះអ្នកស្រីអាចញញឹមទាំងភាពជឿជាក់ និងថ្លែងអំណរគុណគ្រប់គ្នាដែលបានជួយឧបត្ថម្ភថ្លៃព្យាបាល។ ខណៈពេលសម្រាកព្យាបាលនៅក្នុងមន្ទីរពេទ្យឯកជនធំបំផុតរបស់អារ៉ាប់រួមនេះ អ្នកស្រីក៏រំពឹងថា នឹងមានទម្ងន់មកធម្មតាដូចគេវិញ។

គួរបញ្ជាក់ថា អ្នកស្រីចាប់ផ្ដើមធាត់ខ្លាំងមិនអាចដើរចេញពីផ្ទះបានរយៈពេលជាង ២ទសវត្ស រហូតមានជំនួយសប្បុរសជនបញ្ជូនអ្នកស្រីព្យាបាលឆ្លងប្រទេសទៅព្យាបាល។ អ្នកស្រីបានកើតជំងឺច្រើនប្រភេទដោយសារការឡើងទម្ងន់នេះដូចជា ដាច់សរសៃឈាមខួរក្បាល ទឹកនោមផ្អែម លើសឈាម និងគេងមិនសូវលក់ជាដើម៕