Selena លែងត្រូវការពឹងពាក់មនុស្សប្រុស បន្ទាប់ពីមានរឿងរ៉ាវច្រើនពេកជាមួយ Justin Bieber

2017-08-04 23:48:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងនិងសម្ដែង Selena Gomez បានបង្ហាញពីអារម្មណ៍ស្នេហា និងរឿងរ៉ាវផ្ទាល់ខ្លួនខ្លះៗក្នុងកិច្ចសម្ភាសន៍ថ្មីមួយជាមួយទស្សនាវដ្ដី Instyle។

បន្ទាប់ពីមានរឿងរ៉ាវមិនចេះចប់មិនចេះហើយជាមួយអតីតសង្សារ Justin Bieber តារាចម្រៀងវ័យ២៥ឆ្នាំរូបនេះបានបញ្ចប់រឿងគ្រប់យ៉ាងហើយក៏ស្វែងរកបានសេចក្ដីសុខជាមួយគូស្នេហ៍ថ្មី គឺ The Weeknd។

នៅក្នុងកិច្ចសម្ភាសន៍ថ្មីជាមួយទស្សនាវដ្ដី InStyle នាងបានបញ្ជាក់ថាខ្លួនធំធាត់និងមានម្ចាស់ការលើខ្លួនឯងហើយ ដូចនេះនាងមិនត្រូវការពឹងពាក់លើបុរសៗដូចមុនទេ។

អាន៖ មកស្គាល់តារាប្រុសៗទាំងអស់ដែលធ្លាប់ជាសង្សាររបស់ Selena Gomez

អាន៖ Selena និង The Weeknd បង្ហាញខ្លួនដំបូងជាគូស្នេហ៍នៅកម្មវិធី Met Gala 2017

"ខ្ញុំមិនចាំបាច់ពឹងផ្អែកលើនរណា ដើម្បីឲ្យខ្លួនទទួលអារម្មណ៍នៃក្ដីស្រលាញ់នោះទេ។ សម្រាប់ខ្ញុំ ការផ្ដល់ភាពកក់ក្ដៅដល់មិត្តភ័ក្ដិនិងគ្រួសារគឺជារឿងសំខាន់ ប៉ុន្តែខ្ញុំមិនព្រមឲ្យបុរសណាម្នាក់មានឥទ្ធិពលមកលើរូបខ្ញុំឡើយ"។ នាង ថ្លែង។

នាងបានបន្តទៀតថា៖ "ខ្ញុំតែងតែចង់ឲ្យខ្លួនឯងក្លាយជាមនុស្សរឹងមាំម្នាក់ ព្រោះកាលពីពេលមុនៗមក ខ្ញុំតែងតែទន់ខ្សោយ។ ការត្រូវការមនុស្សពិសេសម្នាក់សម្រាប់ជីវិតគឺជារឿងសំខាន់ ប៉ុន្តែមិនត្រូវឲ្យមនុស្សម្នាក់នោះក្ដោបក្ដាប់ជីវិតយើងឡើយ។"

ចំពោះគូស្នេហ៍បច្ចុប្បន្នរបស់នាងវិញ Selena បានបញ្ជាក់ថា៖ "ខ្ញុំពិតជាមានសំណាង ព្រោះគាត់ជាមិត្តប្រុសដ៏ល្អរបស់ខ្ញុំ គាត់ល្អជាងអ្វីទាំងអស់។"

មិនត្រឹមតែប៉ុណ្ណោះ នាងក៏បាននិយាយអំពីការព្យាបាលជំងឺបាក់ទឹកចិត្តរបស់នាង ដែលប្រើប្រាស់រយៈពេល៩០ថ្ងៃកាលពីឆ្នាំមុនថា នាងពិតជាពេញចិត្ត និងរីករាយចំពោះបទពិសោធន៍ដែលនាងទទួលបាន។ អ្វីដែលគួរឲ្យកត់សម្គាល់នោះគឺភាពយន្តភាគ "13 Reasons Why” ដែលនាងជាផលិតករនោះទទួលបានជោគជ័យជាខ្លាំង។

ហេតុផលខាងលើនេះ បានធ្វើឲ្យ Selena កាន់តែមានភាពឯករាជ្យចំពោះការងារសិល្បៈមិនថាចម្រៀង សម្ដែង ឫជាផលិតករនោះទេ។ ដូច្នេះនាងពិតជាអាចជាម្ចាស់ការលើខ្លួនឯង និងមិនចាំបាច់ពឹងពាក់នរណាម្នាក់ទៀតឡើយ៕