មុនយករថយន្តទៅឈៀក ត្រូវដឹងព័ត៌មានសំខាន់ទាំងនេះ

2017-08-08 04:01:48
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនចង់ចំណាយពេលយូរនៅពេលយករថយន្តទៅឈៀក ល្អបំផុតគឺត្រូវដឹងពីបែបបទផ្សេងៗ។ ព័ត៌មាននេះនឹងជួយអ្នកស្វែងយល់ជាមុនពីនីតិវិធីផ្សេងៗនិងព័ត៌មានដ៏សំខាន់ នៅពេលយករថយន្តទៅឈៀកតាមមណ្ឌលត្រួតពិនិត្យបច្ចេកទេសនានា។

+ការចុះឈ្មោះដើម្បីទទួលសេវាឈៀករថយន្ត មានពីរជម្រើស

-អាចទៅទំនាក់ទំនងផ្ទាល់នៅមណ្ឌលត្រួតពិនិត្យយានយន្តទាំង ១៣ កន្លែងទូទាំងប្រទេស ដើម្បីឲ្យគេចុះឈ្មោះនិងបញ្ចូលទិន្នន័យយានយន្តក្នុងប្រព័ន្ធកុំព្យូទ័រ។

-ជម្រើសល្អបំផុតគឺចុះឈ្មោះតាមប្រព័ន្ធស្វ័យប្រវត្តិកម្ម (https://techinspection.mpwt.gov.kh/#/) ដើម្បីណាត់ពេលត្រួតពិនិត្យតែម្តង មិនពិបាករង់ចាំយូរ។

+ប្រភេទយានយន្តដែលត្រូវត្រួតពិនិត្យបច្ចេកទេស

-រថយន្ត រ៉ឺម៉ក និងសឺមីរ៉ឺម៉ក

-ត្រីចក្រយានយន្ត ទោចក្រយានយន្តសណ្ដោងរ៉ឺម៉ក

-ទោចក្រយានយន្ត យានយន្តកសិកម្មកែច្នៃ (សម្រាប់គោលបំណងចុះបញ្ជីតែប៉ុណ្ណោះ)។

+ភ្ជាប់ឯកសារចាំបាច់

-បណ្ណសម្គាល់យានយន្ត (ថតចម្លង)

-វិញ្ញាប័នប័ត្រត្រួតពិនិត្យបច្ចេកទេសយានជំនិះចាស់ (ករណីបន្ត)

+ការពិនិត្យបច្ចេកទេសផ្តោតលើ ៨ ចំណុចសំខាន់ៗ

-ការវាស់កុងទ័រល្បឿន

-ការវាស់កម្រិតបញ្ចេញផ្សែងពុល

-ការពិនិត្យមើលគ្រឿងក្រោមរថយន្ត

-ការវាស់ភ្លើងសញ្ញា

-ការវាស់សូរស៊ីផ្លេ

-ការវាស់លំងាកចង្កូត

-ថ្លឹងទម្ងន់រថយន្ត

-ការវាស់កម្លាំងហ្រ្វាំង

+រយៈពេលត្រួតពិនិត្យ

-អាចចំណាយពី ១០ ទៅ ២០ នាទីទៅតាមប្រភេទយានយន្ត

+សុពលភាពប្រើប្រាស់

-រថយន្តថ្មីប្រភេទគ្រួសារឬរថយន្តដឹកទំនិញធុនស្រាល (Pick-Up) សុពលភាពប្រើប្រាស់បាន ៤ ឆ្នាំ (រថយន្តថ្មីត្រូវមានវិញ្ញាបនបត្រនិងលតាប័ត្រត្រួតពិនិត្យបច្ចេកទេស ដោយមិនចាំបាច់ត្រួតពិនិត្យបច្ចេកទេសនោះទេ)

-រថយន្តប្រភេទគ្រួសារឬរថយន្តដឹកទំនិញធុនស្រាល (Pick-Up) ប្រើប្រាស់រួច មានសុពលភាព ២ ឆ្នាំ

-រថយន្តថ្មីធ្វើអាជីវកម្មដឹកអ្នកដំណើរ ដឹកទំនិញ មានសុពលភាព ២ ឆ្នាំ

-រថយន្តចាស់ធ្វើអាជីវកម្មដឹកអ្នកដំណើរ ដឹកទំនិញ មានសុពលភាព ១ ឆ្នាំ

-រ៉ឺម៉ក សឺមីរ៉ឺម៉កថ្មី មានសុពលភាព ២ ឆ្នាំ

-រ៉ឺម៉ក សឺមីរ៉ឺម៉កចាស់ មានសុពលភាព ១ ឆ្នាំ

-ត្រីចក្រយានយន្ត និងទោចក្រយានយន្តសណ្ដោងរ៉ឺម៉ក មានសុពលភាព ១ ឆ្នាំ

+តម្លៃសេវាត្រួតពិនិត្យ

-រថយន្តគ្រួសារប្រភេទ ៥ ទៅ ៩ កៅអី តម្លៃ ៤៨ ០០០ រៀល

-រថយន្តតូចប្រភេទ ៤ កៅអី តម្លៃ ៤២ ០០០ រៀល

-ឡានដឹកទំនិញ ដឹកអ្នកដំណើរ តម្លៃចាប់ពី ៣៦ ០០០ រៀល ដល់ ៦៦ ០០០ រៀល (អាស្រ័យតាមទម្ងន់ផ្ទុកនិងចំនួនកៅអី)

លតាប័ត្រនិងវិញ្ញាបនបត្រត្រួតពិនិត្យលក្ខណៈបច្ចេកទេស នឹងត្រូវផ្ដល់ឲ្យភ្លាមៗក្រោយពិនិត្យរួច។ យានយន្តមកត្រួតពិនិត្យបច្ចេកទេសតាមកាលកំណត់ ដើម្បីបន្តសុពលភាពប្រើប្រាស់។

អត្ថបទ៖ ប៊ុណ្ណារ៉ា