ករណី Taylor Swift ប្ដឹងផ្ដល់ DJ ម្នាក់ពីបទ ស្ទាបអង្អែលនាង កំពុងឡើងកម្តៅ

2017-08-09 03:34:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះតុលាការបានឆ្លើយតបពីករណីបណ្ដឹងរបស់តារាចម្រៀង Taylor Swift ពីបទប៉ះពាល់នាងដោយលក្ខណៈមិនសមស្របដោយ DJ វិទ្យុ នៅរដ្ឋColorado ម្នាក់។

ករណីប្ដឹងផ្តល់នេះគឺបានធ្វើឡើងពីសំណាក់ Taylor Swift កាលពីឆ្នាំ២០១៣ ហើយលោក Meuller ជា DJ ដែលត្រូវនាងចោទប្រកាន់នោះក៏បានប្ដឹងតបតរវិញថា Taylor Swift បង្ខូចឈ្មោះខ្លួន។

តារាចម្រៀងវ័យ២៧ឆ្នាំរូបនេះបានចោទប្រកាន់លោក David Mueller ថាបានស្ទាបអង្អែលនាង ខណៈពេលដែលពួកគេថតរូបជាមួយគ្នានៅការប្រគំតន្ត្រីមួយរបស់នាងកាលពីឆ្នាំ ២០១៣។

មេធាវីរបស់នាងបាននិយាយសម្រាប់សេចក្ដីថ្លែងការនៅតុលាការនៅទីក្រុង Denver រដ្ឋ Colorado ថាលោក Mueller បាន "ស្ទាបកំប៉េះគូទរបស់នាង"។

លោក Meuller បានប្ដឹងតារាចម្រៀងរូបនេះវិញកាលពីខែកញ្ញាឆ្នាំ ២០១៥ ថាការចោទប្រកាន់របស់នាងគឺមិនមែនជាការពិត។ លោកបាននិយាយថា Taylor បានធ្វើឲ្យលោកបាត់បង់ចំណូលពីការងារដែលអាចឲ្យរកចំណូលបានដល់ទៅ ១៥ម៉ឺនដុល្លារក្នុងមួយឆ្នាំ ជាពិធីករក្នុងប៉ុស្តិ៍វិទ្យុចង្វាក់ Country ឈ្មោះ KYGO-FM។

កាលពីថ្ងៃអង្គារម្សិលមិញនេះ Taylor បានមកចូលរួមនៅកន្លែងកាត់ក្ដី ហើយនៅថ្ងៃនោះដែរគណៈវិនិច្ឆ័យបានបង្ហាញពីរូបភាពដែលពាក់ព័ន្ធនឹងការចោទប្រកាន់នោះ ដែលថតនៅបន្ទប់ VIP ជួបនិងសំណេះសំណាល (Meet & Greet) កាលពីថ្ងៃទី២ខែមិថុនាឆ្នាំ២០១៣។

រូបថតដែល Taylor ចោទប្រកាន់ថាលោក Mueller បានប៉ះពាល់នាង

នៅក្នុងរូបថតនោះដែរគឺមានរូប Taylor នៅកណ្ដាលលោក Mueller និងមិត្តស្រី Shannon Melcher។

មេធាវីរបស់លោក Mueller លោក David McFarland បាននិយាយសម្រាប់ការថ្លែងការណ៍ អំពីរូបថតនេះថាដៃរបស់កូនក្ដីរបស់លោក "មិនបាននៅខាងក្រោមសំពត់របស់អ្នកនាង Taylor Swift ឡើយហើយសំពត់របស់នាងមិនមានភាពមិនប្រក្រតីអ្វីនោះឡើយ។"

សម្រាប់ការថ្លែងការណ៍របស់លោក Mueller វិញលោកបាននិយាយថា លោកគ្រាន់តែប្ដឹងដើម្បី លុបលាងឈ្មោះមិនល្អនិងការបាត់បង់ប្រាក់ចំណូលតែប៉ុណ្ណោះមិនមែនទាមទារប្រាក់សំណង៣លានដុល្លារដូចគេរាយការណ៍នោះទេ។

ចំពោះបញ្ហានេះដែរ Taylor បានប្រាប់ឲ្យតុលាការបំភ្លេចចោលនិងទុកថារឿងអាថ៌កំបាំងមួយ ប៉ុន្តែលោក Mueller មិនសុខចិត្តហើយក៏ប្ដឹងផ្ដល់គ្នាទៅវិញទៅមក។

សម្រាប់ពេលនេះការកាត់ក្ដីកំពុងតែដំណើរការនៅឡើយ ហើយអ្នកគាំទ្រតារាចម្រៀងរូបនេះជាច្រើនកំពុងរងចាំការកាត់ក្ដីសម្រេចពីរឿងក្ដីក្ដាំមួយនេះ៕