ឃើញម៉ាស៊ីនសម្ងួតសក់តាមសណ្ឋាគារគួរកុំប្រើ ព្រោះប៉ះពាល់សុខភាពខ្លាំងហួសស្មាន

2017-08-13 08:20:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ធម្មតា ពេលអ្នកមានគម្រោងទៅសម្រាកនៅសណ្ឋាគារ ឬផ្ទះសំណាក់ណាមួយ ប្រាកដជាមិនចង់វេចរបស់ខ្លួនឯងទៅច្រើនឡើយ ព្រោះគិតថានៅទីនោះមានស្រាប់ៗ។ យ៉ាងនេះក្ដី តាមការចុះផ្សាយលើវិបសាយ The Independent បានបង្ហាញថាម៉ាស៊ីនសម្ងួតសក់នៅតាមសណ្ឋាគារ ឬផ្ទះសំណាក់នោះ មិនគួរប្រើប្រាស់ឡើយ។

តាមការស្រាវជ្រាវមួយរបស់អ្នកជំនាញផ្នែកអតិសុខុមសាស្រ្ដឈ្មោះ Chuck Gerba បានបង្ហាញលទ្ធផលថា ម៉ាស៊ីនសម្ងួតសក់តាមសណ្ឋាគារនានា មានផ្ទុកទៅដោយមេរោគយ៉ាងក្រាស់ ដែលអាចប៉ះពាល់ដល់សុខភាព និងគួរចៀសវាងប្រើ។ ការស្រាវជ្រាវនេះ ធ្វើឡើងដោយផ្ទាល់ទៅលើសណ្ឋាគារចំនួន៩ ចាប់ពីលំដាប់ផ្កាយ៣ ដល់ផ្កាយ៥ នៅក្រុង Los Angeles។

លទ្ធផលបង្ហាញថា ម៉ាស៊ីនសម្ងួតសក់គឺជាសម្ភារៈដ៏កខ្វក់មួយ ក្នុងចំណោមសម្ភារៈជាច្រើនដែលដាក់ឲ្យប្រើប្រាស់ដោយសណ្ឋាគារ។ ទោះបែបនេះ អ្នកស្រាវជ្រាវបានបញ្ជាក់ថា ផលប៉ះពាល់នោះមិនមែនដោយសារម៉ាស៊ីនសម្ងួតសក់ ផ្លុំធូលីចេញមកក្រៅនោះទេ គឺដោយសារតែម៉ាស៊ីនសម្ងួតសក់ មិនមែនជារបស់ត្រូវសម្អាតសម្រាប់អ្នករៀបចំបន្ទប់ ខុសពីកែវទឹក ឬបន្ទប់ទឹកដែលត្រូវសម្អាតយ៉ាងយកចិត្តទុកដាក់។

ប្រៀបដូចជាអំពូលភ្លើង កុងតាក់ភ្លើង កូនសោ ព្រមទាំងបញ្ជីម្ហូបដែរ គឺម៉ាស៊ីនសម្ងួតសក់ មិនត្រូវបានគេសម្អាតឡើយ ហើយវាត្រូវប្រើដោយមនុស្សជាច្រើន ជាហេតុនាំឲ្យមេរោគជាច្រើនតោងជាប់ស្ទើរគ្រប់ប្រភេទ។ លោកបានផ្ដល់អនុសាសន៍ ឲ្យអ្នកសម្អាតបន្ទប់ ធ្វើការសម្អាតសម្ភារៈនោះឲ្យបានត្រឹមត្រូវ៕