បើជាអ្នកប្រើប្រាស់រថយន្ត ត្រូវដឹងពីគ្រឿងដ៏សំខាន់ទាំងនេះ

2017-08-15 23:39:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការដឹងពីវិធីថែទាំគ្រឿងបរិក្ខារនានារបស់រថយន្ត គឺជាចំណុចដែលអ្នកបើកបរគ្រប់រូបគួរតែចេះ ទោះមិនអាចជួសជុលដោយខ្លួនឯង តែក៏អាចធ្វើឲ្យវាមិនងាយខូចដែរ ហើយរបស់ទាំងនោះមានដូចជា ៖

អាគុយ

ដែលជាទូទៅអាគុយមួយគ្រាប់អាចប្រើចន្លោះពី ៤ ទៅ ៥ ឆ្នាំ អាស្រ័យលើការប្រើប្រាស់ ហើយ ចុចទីនេះដើម្បីចេះវិធីមិនឲ្យឡានឆាប់អស់អាគុយ។

ស្បែកហ្វ្រាំង និងដុំហ្រ្វាំង

ដែលជាមុខងារសុវត្ថិភាពសំខាន់នៃរថយន្ត ហើយមិនគួរឲ្យវាត្រូវទឹកច្រើន លើសពីនេះពេលជាន់ហ្វ្រាំងទៅឡានញ័រ ឬលាន់សំឡេងខុសប្រក្រតី គឺត្រូវយកចូលជាងភ្លាម កុំទុកយូរនាំមានបញ្ហាធំ។

ប៊ីស្តុង

ជាឆ្អឹងខ្នងរបស់ម៉ាស៊ីន ហើយជាទូទៅត្រូវត្រួតពិនិត្យមើលកម្រិតប្រេងម៉ាស៊ីនឲ្យបានត្រឹមត្រូវ ជៀសវាង ប៊ីស្តុងដំណើរការមិនរលូន ឬធ្វើឲ្យឡានចេញផ្សែងខ្មៅលើសកម្រិត។ លែងសង្ស័យ មើលពណ៌ផ្សែងដឹងច្បាស់ពីស្ថានភាពម៉ាស៊ីនរថយន្ត

ប៊ិចសាំង

ម៉ាស៊ីនដំណើរការ ហើយឡានស្ទុះមិនស្ទុះ គឺអាស្រ័យលើរបស់នេះ ដែលជាអ្នកបាញ់សាំងចូលក្នុងស៊ីឡាំងដើម្បីបង្កើតល្បឿន។ ប្រសិនរបស់ដើរមិនស្រួល ឡានអាចស៊ីសាំងលើសធម្មតា ឬអាចសាំងបាញ់មិនគ្រប់ដែលធ្វើឲ្យឡានស្ទក់។ វិធីការពារ គឺប្រើប្រាស់សាំងតាមស្តង់ដារ ជៀសវាងមានកំណកស្អិតជាប់ប៊ិចសាំង។ ឡាន ម៉ូតូថ្មីៗ មិនគួរប្រើសាំងស៊ុបពែ ព្រោះ ...

ធុងទឹក

វាមានតួនាទីសំខាន់ក្នុងការកាត់បន្ថយ និងរក្សាតុល្យភាពកម្ដៅនៃម៉ាស៊ីនរថយន្ត ហើយជាធម្មតាអ្នកត្រូវពិនិត្យកម្រិតទឹកក្នុងធុងនេះតាមកម្រិតកំណត់របស់វា។ មិនគួរឲ្យធុងទឹកគ្មានទឹកនោះទេ ព្រោះវាអាចបណ្ដាលឲ្យម៉ាស៊ីនរថយន្តទាំងមូលមិនដំណើរការ។

កង្ហារម៉ាស៊ីន

វាជាមុខងារជួយឲ្យស្រូបខ្យល់ពីខាងក្រោយឲ្យប៉ះធុងទឹកដើម្បីចុះកម្ដៅបានកាន់តែលឿន ហើយបើអាច គួរផ្លុំលាងជាប្រចាំ។

ឧបករណ៍បង្ហាប់សីតុណ្ហភាព (AC Compressor)

វាជាបេះដូងនៃប្រព័ន្ធម៉ាស៊ីនត្រជាក់ និងកម្ដៅក្នុងរថយន្ត ជម្រើសប្រើប្រាស់ត្រឹមត្រូវបំផុត គឺមិនគួរប្រើដល់កម្រិតខ្ពស់បំផុតរបស់វាច្រើនពេកទេ ព្រោះឆាប់ខូច។ ឧទាហរណ៍ ៖ នៅតាមប្រទេសត្រជាក់ គេច្រើនកំណត់ឲ្យវាចេញក្ដៅ តែពេលខ្លះក្ដៅជ្រុលធ្វើឲ្យរលួយជ័រ ឬតាមប្រទេសក្ដៅ ប្រើឲ្យត្រជាក់ពេក ធ្វើឲ្យហ្គាស៍ម៉ាស៊ីនត្រជាក់បុកមកក្រៅខ្លាំងហួសហេតុ។

តម្រង់ខ្យល់

ឧបករណ៍នេះ ជាអ្នកចម្រេះខ្យល់ និងមិនធ្វើឲ្យធូលីចូលឡានតាមរន្ធម៉ាស៊ីនត្រជាក់ តែគួរណាស់តែធ្វើការសម្អាតជាប្រចាំ ព្រោះថាបើមានធូលីជាប់លើវាច្រើនពេល ក្នុងឡានក៏មិនត្រជាក់ ឬអាចមានសំឡេងរំខានផងដែរ។

ស្បែកអំព្រីយ៉ា និងបន្ទះអំព្រីយ៉ា

ដែលវាជាមុខងារជួយសម្រួលប្រអប់លេខពេលប្ដូរពីលេខមួយទៅមួយលេខមិនឲ្យចង្កឹះលេខកកិតខ្លាំង ហើយវិធីប្រើប្រាស់ត្រឹមត្រូវ គឺត្រូវដឹងពីកម្រិតប្រេងប្រអប់លេងឲ្យគ្រប់តាមស្តង់ដារដែលធ្វើការពិនិត្យដោយអ្នកជំនាញតាមហ្គារាស។

ប៊ូស៊ី

ខ្លួនតូច តែរថយន្តមិនអាចដំណើរការបានទេបើគ្នាវា ព្រោះប៊ូស៊ី ជាអ្នកបង្កើតឲ្យមានចរន្តអគ្គិសនីទៅបញ្ឆេះឲ្យម៉ាស៊ីនឥន្ធនៈរបស់រថយន្តដំណើរការ។ ការប្រើប្រាស់ប៊ូស៊ីមិនត្រឹមត្រូវ គឺអាចធ្វើឲ្យម៉ាស៊ីនឡានឆេះមិនប្រក្រតី ឬពេលខ្លះគេនិយមហៅថាការ៉ង់ទីមិនស្មើ ដែលកម្លាំងម៉ាស៊ីនឡើងចុះខ្លាំងពេក។ វិធីប្រើប្រាស់ត្រឹមត្រូវ គឺជ្រើសរើសប៊ូស៊ីដែលមានម៉ាកច្បាស់លាស់ និងធ្វើការសម្អាតការកាលកំណត់ណាមួយ។

ស៊ីមាំង និងករស៊ីមាំង

សឹងតែគ្រប់គ្នាហើយដែលដឹងថាស៊ីមាំងមានតួនាទីបំភាយផ្សែងចេញពីចំហេះម៉ាស៊ីន តែប្រហែលមិនទាន់ច្បាស់ទេថា ករស៊ីមាំងមានតួនាទីយ៉ាងសំខាន់ក្នុងការជួយកាត់បន្ថយមិនឲ្យផ្សែងចេញមកក្រៅខ្លាំងពេក។ ចំពោះការថែទាំ គឺមិនត្រូវឲ្យមានទឹកចូលនោះទេ ព្រោះអាចបណ្ដាលឲ្យម៉ាស៊ីនមិនដំណើរការតែម្ដង។

ឌីណាម៉ូ

រាងមិនធំជាងផ្លែដូងប៉ុន្មាន ឌីណាម៉ូ មានតួនាទីប្រើថាមពលអគ្គិសនីទៅទាញខ្សែពានឲ្យម៉ាស៊ីនដំណើរការ និងសមត្ថភាពបង្វិលចរន្តអគ្គិសនីពេលម៉ាស៊ីនដំណើរការទៅសាកបញ្ចូលឲ្យអាគុយវិញ។ ការថែទាំរបស់នេះ គឺគ្រាន់តែមិនឲ្យវាត្រូវទឹកជាការស្រេច តែក៏សូមកុំធ្វើការបញ្ឆេះដោយកន្ត្រាក់ៗ ព្រោះងាយឲ្យឌីណាម៉ូងាយខូច។

ដោយឡែក ខាងលើនេះ គ្រាន់ជាមូលដ្ឋានបន្តិចបន្តួចនៃការថែទាំរថយន្តតែប៉ុណ្ណោះ ខណៈនៅមានចំណុចជាច្រើនទៀតដែលក្រុមការងារនឹងបង្ហាញជូននៅពេលក្រោយ។ ចំពោះចម្ងល់នានាទាក់ទងជាមួយយានយន្ត និងបច្ចេកវិទ្យា ប្រិយមិត្តអាចចោទជាសំនួរនៅខាងក្រោយអត្ថបទនេះបាន៕

ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា កុំភ្លេចចុច Like Page Sabay News Technology...

ចុចអានបន្ត ៖

ប្រភព៖ Odometer ប្រែសម្រួល៖ រដ្ឋ