ស្រ្ដីឈុតក្រហមម្នាក់ ត្រូវជ្រូកព្រួតដេញឈ្មុសស្ទើរបាត់បង់ជីវិត ព្រោះ..

2017-08-20 06:27:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីជនជាតិឥណ្ឌាអាយុ ៦០ឆ្នាំម្នាក់ ត្រូវបានជ្រូក ២ក្បាលព្រួតគ្នាដេញឈ្មុស ខាំហែកសំលៀកបំពាក់ របួសពេញខ្លួន ខណៈពេលត្រលប់មកពីធ្វើការវិញ។

ការយាយីរបស់សត្វជ្រូកដ៏កម្រប្រទះឃើញនេះ ត្រូវបានគេថតជាប់ក្នុងទូរសព្ទដៃពីលើផ្ទះនៃជ្រុងម្ខាងដោយឃើញស្ត្រីរងគ្រោះបានដេកដួលក្រឡាប់ផ្កាប់ផ្ងារលើដី ខណៈជ្រូកទាំងពីរចោមរោមខាំ ទាញទាំងកម្រោលត្រង់ដៃ ជើង និងក្បាល។

ឃើញហេតុការណ៍បែបនេះ អ្នកជិះម៉ូតូ ២នាក់ អមជាមួយអ្នកភូមិផ្សេងទៀត បានចូលទៅជួយដេញជ្រូកជាមួយឧបករណ៍ផ្សេងៗឲ្យវាទៅឆ្ងាយ។

ស្ត្រីរងគ្រោះមានឈ្មោះ Bibi Jan ត្រូវបានគេជឿថា បានទៅក្បែរកូនជ្រូកទើបកើត រួចក៏ត្រូវមេរបស់វាដេញឈ្មុសតែម្ដង ដើម្បីការពារកូនតូច។ ភ្លាមៗក្រោយដណ្ដើមបានពីមាត់ជ្រូក ជនរងគ្រោះត្រូវបានគេបញ្ជូនទៅកាន់មន្ទីរពេទ្យទីក្រុង Kavali រដ្ឋ Andhra Pradesh ជាមួយរបួសជើង មុខ និងដៃ តែមិនប៉ះពាល់ដល់អាយុជីវិតទេ។

យោងតាមការបញ្ជាក់របស់អ្នកភូមិប្រាប់ថា នេះជាការវាយប្រហាររបស់ជ្រូកលើកទី ៣ ហើយនៅតំបន់ពួកគាត់ក្នុងសប្ដាហ៍នេះដោយមានក្មេងប្រុសអាយុ ៣ឆ្នាំម្នាក់ និងគ្រូបង្រៀនម្នាក់ទៀតផង៕