មកដឹងត្រួសៗពីជីវិតដូចម្ចាស់ក្សត្រីរបស់ Taylor Swift

2017-08-31 03:40:58
ចំនួនមតិ 0 | ចំនួនចែករំលែក 0

ចន្លោះមិនឃើញ

Taylor Swift គឺជាកំពូលតារាល្បីមួយរូបដែលមានអ្នកស្រលាញ់ពេញចិត្តរាប់លាននាក់ តែក៏មានអ្នកមិនចូលចិត្តនាងច្រើនដែរ។ ប៉ុន្តែទោះបីជាអ្នកទាំងនោះមិនចូលចិត្ត Taylor Swift ក៏ដោយក៏ពួកគេដឹងថា Taylor មានសឹងតែគ្រប់យ៉ាងក្នុងជីវិតនាងដែលមនុស្សគ្រប់គ្នាសុបិននិងប៉ងប្រាថ្នាចង់បាន។

មិនថាជារូបសម្រស់ស្រស់ស្អាត ទ្រព្យសម្បត្តិ កេរ្តិ៍ឈ្មោះ ស្នេហា បងប្អូន និងមិត្តភ័ក្ដិជាដើម Taylor មានគ្រប់យ៉ាង។ ខាងក្រោមនេះជាចំណុចពិសេសៗរបស់ Taylor Swift៖

នាងមានរូបរាងស្អាតល្អឥតខ្ចោះ

រូបរាងស្រស់ស្អាតពីធម្មជាតិគឺមិនសូវជាមានច្រើនប៉ុន្មានទេ ប៉ុន្ដែ Taylor Swift គឺស្អាតល្អឥតខ្ចោះតាំងពីកំណើត ដោយនាងមិនដែលត្រូវការកែសម្ផស្សម្ដងណាទេ។ តាំងពីទម្រង់មុខស្រស់ស្អាត រូបរាងស្លីមស្រឡូន កម្ពស់១ម៉ែត្រ៨០សង់ទីម៉ែត្រ និងជើងស្អាតដូចតារាម៉ូដែលជាពិសេសគឺភ្នែកពណ៌ខៀវដូចទឹកសមុទ្រដែលអ្នកណាៗក៏ចង់បានរូបរាងដូចនាងដែរ។

មានទេពកោសល្យនិងឆ្លាត

មិនត្រឹមតែមានសំឡេងច្រៀងយ៉ាងពីរោះនោះទេ នាងក៏អាចលេងឧបករណ៍ភ្លេងជាច្រើនប្រភេទដូចជាហ្គីតា ព្យ៉ាណូ ជាដើមយ៉ាងស្ទាត់ជំនាញ។ លើសពីនេះទៅទៀតនាងក៏ចេះសរសេរបទចម្រៀង និងបទភ្លេងខ្លួនឯងផងដែរ ដែលបទចម្រៀងពីរោះៗនិងល្បីៗដូចជា "Blank Space”, “Love Story” និង "You Belong With Me” ជាដើមសុទ្ធតែជាស្នាដៃផ្ទាល់របស់ Taylor ទាំងអស់។ ហេតុដូច្នេះហើយទើបនាងមានសមត្ថភាពឈ្នះពាន Grammy ដល់ទៅ១០ឯណោះ។

ជាសេដ្ឋីម្ចាស់ទ្រព្យសម្បត្តិអចលនទ្រព្យ

ជាមួយនឹងភាពជោគជ័យតាមរយៈការលក់អាល់ប៊ុមនិងសំបុត្រការប្រគំតន្ត្រីធំៗ Taylor មានទ្រព្យសម្បត្តិដល់រាប់រយលានដុល្លារ ហើយទឹកប្រាក់នេះកាន់តែកើនឡើងជាប្រចាំ។ បើគិតត្រឹមឆ្នាំ ២០១៦ តារារូបនេះមានចំណូលសរុបដល់ទៅ ១៧០លានដុល្លារ ដែលជាចំនួនចំណូលសរុបរបស់កីឡាករបាល់ទាត់ល្បីពីររូបបូកបញ្ចូលគ្នា Cristiano Ronaldo (៨៨លានដុល្លារ) និង Lionel Messi (៨១,៥លានដុល្លារ)។

នេះជាភូមិគ្រឹះខ្លះៗរបស់ Taylor Swift

វិឡាតម្លៃ ២៧,៩លានដុល្លារនៅ Beverly Hills

អាផាតមិនតម្លៃ ២០លានដុល្លារ នៅ New York

វិឡាតម្លៃ ១៧លានដុល្លារនៅរដ្ឋ Rhode Island

វិឡាតម្លៃ ២,៥លានដុល្លារនៅរដ្ឋ Nashville

វិឡាតម្លៃ ៣,៩៧លានដុល្លារនៅ Beverly Hills

អាផាតមិនតម្លៃ ១,៩៩លានដុល្លារនៅ Nashville

Taylor តែងតែស្លៀកពាក់សំលៀកបំពាក់ស្រស់ស្អាតខ្លាំង

ប្រសិនបើអ្នកជានារីម្នាក់ ជាពិសេសចាប់អារម្មណ៍ខាងផ្នែក Fashion នោះអ្នកប្រាកដជាច្រណែន Taylor ខ្លាំងព្រមទាំងគិតថាជាតិក្រោយសុំប្រាថ្នាចាប់ជាតិក្លាយជា តារារូបនេះម្ដង។

ទាក់ទងជាមួយសុទ្ធតែប្រុសសង្ហាៗ

អ្នកណាមិនល្បីថា Taylor សម្បូរសង្សារ? តារាប្រុសល្បីៗនិងសង្ហាៗដូចជា Joe Jonas, John Mayer, Taylor Lautner, Harry Styles និង Calvin Harris ជាដើម សុទ្ធតែធ្លាប់នាងទាក់ទងទាំងអស់។ ហើយសម្រាប់ពេលនេះនាងកំពុងតែទាក់ទងជាមួយតារាសម្ដែង Joe Alwyn ក៏មានសម្រស់ស្រស់សង្ហាមិនធម្មតា។

ជិតស្និទ្ធជាមួយគ្រួសារ និងមិត្តភ័ក្ដិ

តាំងពីនាងចូលសិល្បៈមក Taylor តែងតែមានការគាំទ្រនិងផ្ដល់ភាពកក់ក្ដៅពីគ្រួសារនាងជានិច្ច។ ទំនាក់ទំនងនាងជាមួយបងប្រុសបង្កើតឈ្មោះ Austin គឺពិតជាជិតស្និទ្ធ នាងតែងតែទទួលបានការលើកទឹកចិត្តពីបងប្រុសជានិច្ច។

បើនិយាយពីមិត្តភ័ក្ដិវិញ អ្នកណាមិនស្គាល់ Taylor's Squad? តារាល្បីៗជាច្រើនសុទ្ធតែជាមិត្តជិតស្និទ្ធរបស់ Taylor ដូចជា Selena Gomez, Gigi Hadid និង Ed Sheeran ជាដើម។

មានអត្តចរិតក្លាហាន មិនចេះចាញ់អ្នកណា

Taylor ធ្លាប់តែជាតារាចម្រៀងចង្វាក់ Country ដ៏គួរឲ្យស្រលាញ់មួយរូប ប៉ុន្តែគ្រប់យ៉ាងបានផ្លាស់ប្ដូរកាលពីឆ្នាំ ២០០៩ នៅពេលតារាចម្រៀង Kayne West ដណ្ដើមមីក្រូនាងនិយាយក្នុងកម្មវិធី VMAs។ នាងចាប់ផ្ដើមសរសេរបទចម្រៀង ឌឺដងដល់តារាទាំងឡាយណា ដែលធ្វើរឿងមិនល្អចំពោះនាង ក្នុងនោះគឺរាប់បញ្ចូលទាំងអតីតគូរស្នេហ៍នាងផងដែរ។

ថ្មីៗនេះចំពោះរឿងក្ដីជាមួយ DJ David Mueller នាងបានឡើងតុលាការរហូតឈ្នះក្ដីព្រមទាំងយកសំណងតែ១ដុល្លារតែប៉ុណ្ណោះដើម្បីបញ្ជាក់ថានាងចង់បានត្រឹមតែយុត្តិធម៌។ ហើយជាមួយនឹងវីដេអូចម្រៀងថ្មី "Look What You Made Me Do” Taylor បានធ្វើឲ្យពិភពលោកភ្ញាក់ផ្អើលយ៉ាងខ្លាំង ដោយសារឥទ្ធិពលរបស់នាង៕