អ្នកជំនាញអប់រំថាគួរឲ្យកូនៗចេះភាសាជាតិសិនមុនបញ្ជូនទៅរៀនភាសាបរទេស
- 2017-09-25 23:25:00
- ចំនួនមតិ 0 | ចំនួនចែករំលែក 0
អ្នកជំនាញអប់រំថាគួរឲ្យកូនៗចេះភាសាជាតិសិនមុនបញ្ជូនទៅរៀនភាសាបរទេស
ចន្លោះមិនឃើញ
នៅកម្ពុជានាពេលបច្ចុប្បន្ន ឪពុកម្ដាយក្នុងគ្រួសារមួយចំនួន ហាក់មានមោទនភាពចំពោះកូនដែលអាចនិយាយភាសាបរទេស ជាពិសេសនិយាយភាសាអង់គ្លេសសម្រាប់ទាកទងគ្នាក្នុងគ្រួសារ។ ជារឿយៗ គេសង្កេតឃើញឪពុកម្ដាយ មានកូនអាយុ ៣ឆ្នាំ មិនទាន់ បានបញ្ចូនទៅសាលាមត្តេយ្យដើម្បីរៀនភាសាអង់គ្លេស មុនភាសាជាតិខ្លួនឯង។
ដោយមើលឃើញចំណុចនេះអ្នកធ្វើការលើវិស័យអប់រំមួយរូប គឺលោកឧកញ៉ា គួច ម៉េងលី អគ្គនាយកប្រតិបត្តិនៃក្រុមហ៊ុន ម៉េងលី ជេ. គួច អេឌ្យូខេសិន ផ្តល់ជាអនុសាសន៍ថាឳពុកម្តាយគួរឲ្យកូនចេះភាសាខ្មែរជាមុនសិនមុននឹងបញ្ជូនកូនទៅរៀនភាសាបរទេស។
លោកបានថ្លែងក្នុងវេទិកាបណ្ណារក្សលើកដំបូងនៅបណ្ណាល័យ Monument Book កន្លងទៅ ថាៈ « លោកឪពុកអ្នកម្ដាយភាគច្រើនមានមោទនភាពភាសាបរទេសខ្លាំងពេក នៅពេលដែលឃើញកូនយាយភាសាអង់គ្លេសតិចតួច គិតថាអស្ចារ្យ ប៉ុន្តែមិនបានដឹងថា វាជាការចូលរួមបំផ្លាញអនាគតកូន»។
លោកបន្តថា ថ្ងៃក្រោយកូនៗនឹងចេះភាសាខ្មែរមិនច្បាស់លាស់ និងក្លាយខ្លួនជាអ្នកដែលនិយមភាសាបរទេសជាជាងភាសាជាតិ ដែលនេះលោកថាធ្វើឲ្យក្មេងបាត់នូវមោទនភាពជាតិ។ លោកបន្ថែមថាៈ «ហើយនិយាយភាសាខ្មែរមិនច្បាស់នៅក្នុងប្រទេសខ្មែរ វាហាក់ដូចជាយើងជាពលរដ្ឋវង្វេងទិស មិនស្គាល់អត្តសញ្ញាណខ្លួនឯង»។ «នេះមិនមែនជាមោទនភាពឲ្យគេសរសើនោះទេ តែផ្ទុយទៅវិញ បរទេសនឹងវាយតម្លៃថាពលរដ្ឋខ្មែរ ជាជនគ្មានអត្តសញ្ញាណ មិនទទួលស្គាល់ភាសាខ្លួនឯង (មិន)លើកស្ទួយភាសាខ្មែរ ជាចំនុចមួយគួរឲ្យសោកស្ដាយបំផុត គឺប្រៀបដូចមានមោទនភាពក្នុងបរាជ័យកូន»។ លោកបន្ថែម។
ទោះយ៉ាងនេះក្តី អ្នកជំនាញរូបនេះបញ្ជាក់ថាលោកមិនមែនឲ្យឳពុកម្តាយមិនឲ្យកូនរៀនភាសាបរទេសនោះទេ តែលោកថាគួរឲ្យកូនៗចេះច្បាស់ភាសាជាតិខ្លួនជាមុន។ លោកបន្តថាបើសិនជាក្មេងចេះភាសាជាតិបានច្បាស់លាស់ ក្មេងចង់រៀនផ្សេងទៀតក៏ងាយស្រួលដែរ និងថា ការអាន និងការសរសេរភាសាជាតិ គឺចាំបាច់សម្រាប់ក្មេងៗ ដែលឪពុកមា្ដយគ្រប់រូបគប្បីបង្វឹក និងជំរុញទឹកចិត្តកូនអនុវត្តរាល់ថ្ងៃ។
ទន្ទឹមគ្នានេះ ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ ក៏បានអំពាវនាវដល់អាណាព្យាបាលសិស្ស និងបណ្ណារក្សទាំងអស់ ចូលរួមជំរុញសិស្សឲ្យចូលចិត្តអានតាមរយៈវិធីសាស្ត្រងាយៗខាងក្រោមដូចជា ទី១. អាននៅមុខក្មេងឲ្យខ្លាំងៗ ទី២. ចូលរួមអានជាមួយគ្នា និងទី៣. ឲ្យក្មេងអានទាំងអស់គ្នា៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
