មិត្តប្រុសជួបគ្រោះថ្នាក់រន្ធត់ អាចពិការមួយជីវិត តែខាងស្រីស្រលាញ់ស្មោះ សុខចិត្តធ្វើបែបនេះ

2017-09-30 08:34:16
ចំនួនមតិ 0 | ចំនួនចែករំលែក 0

ចន្លោះមិនឃើញ

គូស្នេហ៍មួយគូ នៅក្នុងប្រទេសចិន បានបង្ហាញឲ្យមនុស្សគ្រប់គ្នាដឹងថា ស្នេហាពិតមានន័យយ៉ាងណា ហើយរឿងរ៉ាវរបស់ពួកគេ ពិតជាធ្វើឲ្យយើងរំជួលចិត្ត។

នាង Xiao Xia និង Xiao Geng

គូស្នេហ៍វ័យក្មេងខាងលើ មានឈ្មោះថា Xiao Xia និង Xiao Geng ត្រូវវិលត្រលប់ទៅស្រុកកំណើតវិញ នៅចុងឆ្នាំនេះ។ ជាអកុសល បុរសជាសង្សារឈ្មោះ Xiao Geng បានជួបឧប្បត្តិហេតុដ៏គួរឲ្យរន្ធត់ កាលពីពាក់កណ្ដាលខែសីហា ដែលបណ្ដាលឲ្យរូបគេ រលាកខ្លួនប្រាណ ៩០ ភាគរយ។

Xiao Geng

បន្ទាប់ពីទទួលការព្យាបាល អស់រយៈពេល ១២ ថ្ងៃរួចមក Xiao Geng ក៏បានភ្ញាក់ដឹងខ្លួនវិញ។

បើទោះបីជាអាការរបស់ Xiao Geng មានស្ថេរភាពក៏ដោយ ប៉ុន្តែគ្រូពេទ្យបានប្រាប់ នាង Xiao Xia ថា Xiao Geng នឹងខូចទ្រង់ទ្រាយមុខជារៀងរហូត ហើយទទួលរងពិការភាពច្រើនកន្លែងទៀតផង។ ដោយសារតែការរងរបួសយ៉ាងធ្ងន់ធ្ងររបស់ Xiao Geng គ្រូពេទ្យបានប៉ាន់ប្រមាណថា ថ្លៃព្យាបាលនឹងមានតម្លៃប្រហែល ១៥០ ០០០ ដុល្លារ។

ជាមួយគ្នានេះដែរ អ្នកស្គាល់គ្នាជិតស្និទ្ធរបស់ Xiao Xia ដែលបានដឹងអំពីស្ថានភាពរបស់គូស្នេហ៍មួយគូនេះ បានឲ្យនាងចាកចេញពី Xiao Geng ដោយប្រាប់ថា «ឯងនៅមានផ្លូវដើរវែងឆ្ងាយទៀតនៅក្នុងជីវិត កុំយកគេមកធ្វើជាបន្ទុករបស់ឯង»។

ទោះបីជាយ៉ាងណា នារីដ៏ក្លាហាន និងស្មោះស្នេហ៍រូបនេះ មិនព្រមបោះបង់គូស្នេហ៍នាងចោលឡើយ។ នាង Xiao Xia ថែមទាំងនិយាយថា «នៅពេលគាត់ក្រោកឡើង ខ្ញុំនឹងសុំឲ្យគាត់រៀបការជាមួយខ្ញុំ! កាលពីលើកមុន គាត់គឺជាមនុស្សម្នាក់ដែលថែរក្សាខ្ញុំ ឥឡូវវាដល់វេនខ្ញុំដើម្បីធ្វើដូច្នេះវិញហើយ»។

គួរបញ្ជាក់ឲ្យដឹងថា ពួកគេបានស្គាល់គ្នាតាំងពីមានអាយុ ១៥ ឆ្នាំមកម្ល៉េះ។ Xiao Geng បានធ្លាក់ក្នុងអន្លង់ស្នេហ៍ នាង Xiao Xia ជាច្រើនឆ្នាំ ទម្រាំតែនាងព្រមទទួល នៅពេលពួកគេមានអាយុ ២០ ឆ្នាំ។ បន្ទាប់មក ពួកគេទាំង ២ នាក់ បានទៅធ្វើការនៅខេត្ត Guangdong អស់រយៈពេល ២ ឆ្នាំ និងមានគម្រោងរៀបការទៀតផង នៅពេលពួកគេត្រលប់ទៅផ្ទះវិញនៅចុងឆ្នាំនេះ។ ផ្ទុយទៅវិញ រឿងអកុសលក៏បានកើតឡើងមុន៕

ចុចអាន៖

ប្រភព៖ worldofbuzz ប្រែសម្រួល៖ សេង ឡុង