ចំណាត់ថ្នាក់ភាពយន្តរកចំណូលបានច្រើនជាងគេសប្ដាហ៍ដំបូង ខែតុលា

2017-10-02 02:49:40
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្រាប់សប្ដាហ៍ដំបូងខែតុលានេះ ទោះបីជាមានភាពយន្តថ្មីៗបានចាប់ដាក់បញ្ចាំងជាច្រើនក៏ដោយ ក៏រឿង"It” នៅតែមានសន្ទុះខ្លាំងនិងដណ្ដើមបានចំណាត់ថ្នាក់លេខ១សប្ដាហ៍នេះជាមួយនឹងប្រាក់ចំណូល ១៧,៣លានដុល្លារ។ នេះគឺដោយសារតែភាពល្បីល្បាញខ្លាំងនិងការនិយាយតគ្នាពីមាត់មួយទៅមាត់មួយទាក់ទងនឹងសាច់រឿងនេះធ្វើឲ្យមនុស្សជាច្រើនចាប់អារម្មណ៍និងចង់ទៅមើលផ្ទាល់ភ្នែកថារឿងនេះពិតជាល្អមើលខ្លាំងមែនឫយ៉ាងណា។

សម្រាប់ចំណាត់ថ្នាក់លេខពីរវិញ គឺបានទៅលើរឿង "American Made” ជារឿងបែបឧក្រិដ្ឋកម្មសម្ដែងដោយតារាសម្ដែងល្បីឈ្មោះ Tom Cruise ដោយរកចំណូលបាន ១៧,០១លានដុល្លារក្នុងរយៈពេល៣ថ្ងៃដំបូង។ នេះជាចំនួនមួយដែលច្រើនជាងការរំពឹងទុកទៅទៀត ម្យ៉ាងដោយសារតែភាពយន្តស្រដៀងគ្នាដែលនិយាយអំពី ឧក្រិដ្ឋកម្មវាយប្រហារនេះគឺមិនសូវមាននៅក្នុងរោងកុនផងនោះ ធ្វើឲ្យរឿងនេះទទួលបានជោគជ័យយ៉ាងងាយស្រួល។

ធ្លាក់មកដល់ចំណាត់ថ្នាក់លេខបីគឺរឿងដែលជាប់ចំណាត់ថ្នាក់លេខ១កាលពីសប្ដាហ៍មុន "Kingsman: The Golden Circle” ដែលរកចំណូលបាន ១៧លានដុល្លារ គឺថយចុះដល់ទៅ ៥៦.៤ភាគរយឯណោះបើប្រៀបធៀបទៅហ្នឹងសប្ដាហ៍មុន។ គិតត្រឹមពេលនេះ "Golden Circle” មានលទ្ធភាពរកចំណូលបាន ៦៦,៧លានដុល្លាររួចទៅហើយ គិតតែនៅសហរដ្ឋអាមេរិក។

“The LEGO Ninjago Movie” រកចំណូលបាន ១២លានដុល្លារ ដែលស្ថិតនៅក្នុងលំដាប់ថ្នាក់លេខ ៤ ហើយចំណូលសរុបតែក្នុងសហរដ្ឋអាមេរិកគឺ ៣៥,៥លានដុល្លារ។ បើប្រៀបធៀបទៅរឿងវគ្គមុនៗ រឿងនេះគឺរកចំណូលបានតិចជាងគេ ក្នុងស៊េរីរឿង LEGO នេះ។

ចំណែកឯរឿងទទួលបានចំណាត់ថ្នាក់លេខ ៥ គឺជាចំណូលថ្មីរឿង "Flatliners” រកចំណូលបាន ៦,៧លានដុល្លារក្នុងរយៈពេលបីថ្ងៃដំបូង។ ភាពយន្តនេះគឺជាវគ្គថ្មីដែលទាក់ទងទៅនឹងរឿងបញ្ចេញកាលពីឆ្នាំ ១៩៩០ មានចំណងជើងដូចគ្នា។

ភាពយន្តដែលទំនងនឹងជាប់ក្នុងចំណាត់ថ្នាក់រឿង Oscar រឿង "Battle of the Sexes” សម្ដែងដោយតារាសម្ដែងល្បីៗ ដូចជា Emma Stone និង Steve Carell រកចំណូលបាន ៣,៤លានដុល្លារ ជាប់ចំណាត់ថ្នាក់លេខ ៦ សប្ដាហ៍នេះ។

ឈានមកដល់ចំណាត់ថ្នាក់លេខ ៧ គឺបានទៅលើរឿង "American Assasin” ជាមួយប្រាក់ចំណូល ៣,៣លានដុល្លារ ឯភាពយន្ដរឿង "Home Again” ទទួលបានចំណាត់ថ្នាក់លេខ ៨ ដោយរកបាន ១,៧លានដុល្លារ។

“Till Death Do Us Part” ដែលជារឿងប្រភេទ រំជួលអារម្មណ៍ (Thriller) ទទួលបានចំណូល ១,៥លានដុល្លារស្ថិតក្នុងចំណាត់លេខ ៩ ធ្វើឲ្យរឿង "Mother!" បានចំណាត់លេខ១០ជាមួយចំណូល ១,៤លានដុល្លារ៕

នេះជាបណ្ដា Trailer រឿងចំណូលថ្មី៖