ធ្វើដំណើរទៅក្រៅប្រទេសលែងភ័យ បើស្គាល់ក្រុមហ៊ុនតាក់ស៊ីទាំងនេះ

2017-10-13 04:02:46
ចំនួនមតិ

ចន្លោះមិនឃើញ

Uber ជាក្រុមហ៊ុនផ្ដល់សេវារថយន្តតាក់ស៊ីដ៏ល្បីឈ្មោះ មានដើមកំណើតចេញពីទឹកដីសហរដ្ឋអាមេរិក។ក្រុមហ៊ុនមួយនេះ បានពង្រីកសេវាតាក់ស៊ីធ្វើដំណើរដល់ ៦៧ ប្រទេស និង ៧៨ ទីក្រុង ទូទាំងតំបន់អាស៊ីប៉ាស៉ីហ្វីកដូចជា ឥណ្ឌា ចិន ហុងកុង ម៉ាកាវ តៃវ៉ាន់ ជប៉ុន កូរ៉េ អូស្រ្តាលី នូវេលហ្សេឡង់ រួមទាំងតំបន់អាស៊ីអាគ្នេយ៍មានវៀតណាម, ថៃ, ម៉ាឡេស៊ី, ហ្វីលីពិន, ឥណ្ឌូណេស៊ី និងថ្មីៗនេះទើបចាប់ផ្តើមប្រតិបត្តិជាផ្លូវការនៅក្នុងប្រទេសកម្ពុជា។

Sabay ណែនាំឲ្យស្គាល់ក្រុមហ៊ុនដែលផ្តល់សេវាដឹកជញ្ជូនកំពូលទាំង ១២ ផ្សេងទៀតនៅតាមបណ្ដាប្រទេសធំៗជុំវិញពិភពលោក សម្រាប់ភ្ញៀវទេសចរស្វែងរកពេលត្រូវការជិះធ្វើដំណើរកម្សាន្តទៅណាមកណា។

១.Lyft

Lyft ជាគូប្រជែងដ៏ខ្លាំងមួយរបស់ Uber ក្នុងទឹកដីអាមេរិក។ ក្រុមហ៊ុននេះក្ដោបក្ដាប់បានលើសពី ៦០ ទីក្រុងនៅអាមេរិក ហើយការផ្ដល់សេវាកម្មមិនចាញ់ Uber ប៉ុន្មានឡើយ។ ចំណុចល្អម្យ៉ាងរបស់ Lyft រាល់អ្នកបើកបររថយន្តទាំងអស់ សុទ្ធសឹងតែតម្រូវឲ្យមានប័ណ្ណបើកបរ, ការត្រួតពិនិត្យ DMV និងជីវប្រវត្តិជុំវិញអំពើឧក្រិដ្ឋកម្មផ្សេងៗ។

ផ្អែកតាមការសិក្សាចេញពី Zebra Magazine បានរកឃើញថា ជាមធ្យមការចំណាយពេលរង់ចាំជាមធ្យមនៃសេវាកម្ម Lyft តិចជាង ៦ វិនាទី ធៀបនឹង Uber។ បញ្ជាក់ថា Lyft មានសេវាកម្ម ៣ ប្រភេទ មួយគឺ Lyft ធម្មតា, Lyft Plus និង Lyft Line ខណៈ Lyft Plus ជាកញ្ចប់អនុញ្ញាតឲ្យអ្នកធ្វើដំណើរម្នាក់ឯង ឬជាក្រុម ៦ នាក់។ បច្ចុប្បន្នអ្នកដំណើរអាចទាញយកកម្មវិធី Lyft ទាំងនៅលើប្រព័ន្ធ Android និង iOS។

-ប្រទេសប្រតិបត្តិការ៖ អាមេរិក (៦០ ទីក្រុង)

២.Hailo

Hailo ជាក្រុមហ៊ុនសេវាតាក់ស៊ីលំដាប់ទី ១ ក្នុងចក្រភពអង់គ្លេសល្បីដូច Uber នៅអាមេរិកដែរ។ សព្វថ្ងៃ Hailo ក្ដោបក្ដាប់លើទីក្រុងធំៗចំនួន ៨ ក្នុង ៥ ប្រទេសផ្សេងគ្នា។

Hailo មានផ្ដល់សេវាទូទាត់តាមរយៈកម្មវិធី Electronic Pay និងមុខងារជាច្រើនទៀតដូចជា Hailo Hub, Hailo for Business ដោយគាំទ្រទាំងលើប្រព័ន្ធ iOS, Android និង Apple Watch។

ប្រទេសប្រតិបត្តិការ៖ អង់គ្លេស, អៀរឡង់, អេស្ប៉ាញ, សិង្ហបុរី និងជប៉ុន

៣.Ola Cabs

Ola Cabs ជាក្រុមហ៊ុនផ្តល់សេវាតាក់ស៊ីទំនើបលំដាប់ទី ១ ក្នុងប្រទេសឥណ្ឌា ហើយក្ដោបក្ដាប់ ៨០ ទីក្រុងសម្រាប់ទីផ្សារក្នុងស្រុក។ និយាយពីតម្លៃ ក្រុមហ៊ុនផ្ដល់សេវាកម្មថោកជាងក្រុមហ៊ុនប្រជែងផ្សេងទៀតក្នុងប្រទេសឥណ្ឌា។

រាល់អ្នកបើកបរមានការឆ្លងកាត់ត្រួតពិនិត្យ ទាំងសុខភាពនិងអនាម័យ ដើម្បីផ្ដល់ទំនុកចិត្តនិងផាសុកភាពដល់អ្នកដំណើរ។ Ola Cabs គាំទ្រទាំងលើប្រព័ន្ធ Windows Phone, Android និង iOS។

-ប្រទេសប្រតិបត្តិការ៖ ឥណ្ឌា (១០០ ទីក្រុង)

៤.Grab Taxi

ជាក្រុមហ៊ុនតាក់ស៊ីមានមូលដ្ឋានមកពីតំបន់អាស៊ីអាគ្នេយ៍ ដែលមានការទទួលស្គាល់ពីពលរដ្ឋនៅក្នុងតំបន់។

កម្មវិធី Grab ទទួលបានការចុចទាញយកដល់ ៣.៨ លានដង ដែលនេះជាចំណុចវិជ្ជមានដ៏ធំមួយ។ មានអ្នកបើកបរសរុប ៧៥ ០០០ នាក់ ផ្តក់សេវាកម្មនៅ ២១ ទីក្រុងក្នុង ៦ ប្រទេសផ្សេងគ្នា។ Grab Taxi ធ្លាប់ទទួលបានពានរង្វាន់ Frost & Sullivan Best Travel App of 2013 សម្រាប់ការផ្ដល់ភាពកក់ក្ដៅសម្រាប់ការធ្វើដំណើរដល់អតិថិជន។

-ប្រទេសប្រតិបត្តិការ៖ ម៉ាឡេស៊ី, សិង្ហបុរី, ថៃ, វៀតណាម, ឥណ្ឌូណេស៊ី, ហ្វីលីពិន។

៥.Easy Taxi

ដំណើរការនៅ ៣០ ប្រទេស និង ៤២០ ទីក្រុងនៅទូទាំងពិភពលោក Easy Taxi មានអតិថិជនជាង ១៧ លាននាក់ និងអ្នកបើកបរជាង ៤០ ម៉ឺននាក់។ អ្នកដំណើរអាចធ្វើការកក់រថយន្តតាក់ស៊ីបានយ៉ាងលឿន និងដឹងពីថេរវេលាទៅដល់គោលដៅ។ អ្វីដែលពិសេសករណីបើអ្នកភ្ជាប់កម្មវិធីនេះ ទៅកាន់ Facebook ក៏មានឱកាសទទួលបានគូប៉ុងនិងរង្វាន់ជាច្រើនពីក្រុមហ៊ុន។

-ប្រទេសប្រតិបត្តិការ៖ ៣០ ប្រទេស ( ៤០០ ទីក្រុង)

៦.Didi Dache

ច្រើនគេហៅក្រុមហ៊ុននេះថាជា Uber នៅស្រុកចិន ខណៈ Didi Dache មានអ្នកប្រើជាង ១០០ លាននាក់នៅ ៣០០ ទីក្រុងជុំវិញប្រទេសចិន។ ក្រុមហ៊ុនធ្លាប់បំបែកកំណត់ត្រាទទួលអតិថិជន ៣ លាននាក់ក្នុងមួយថ្ងៃ។

យ៉ាងណាតម្លៃសេវាកម្មរបស់ Didi Dache រាងថ្លៃជាង Uber នៅអាមេរិកបន្តិច។

-ប្រទេសប្រតិបត្តិការ៖ ចិន (៣០០ ទីក្រុង)

៧.Gett

ជាក្រុមហ៊ុនមកក្រោយ Uber ប៉ុន្តែ Gett បានព្យាយាមជ្រៀតខ្លួនចូលទីផ្សាររថយន្តតាក់ស៊ី តាមរយៈការបញ្ចុះតម្លៃដល់ ២៥ ភាគរយ រាល់ការធ្វើដំណើរក្នុងទីក្រុង New York និងចំណាយត្រឹមតែ ១០ ដុល្លារ សម្រាប់ការធ្វើដំណើរតាមតំបន់ពិសេសមួយចំនួន។

-ប្រទេសប្រតិបត្តិការ៖ អាមេរិក, អ៉ីស្រាអែល, អង់គ្លេស និងរុស្សី

៨.LeCab

Uber ត្រូវបានហាមមិនឲ្យបើកដំណើរការក្នុងប្រទេសបារាំង ជាឱកាសល្អដែល LeCab ត្រូវក្ដោបក្ដាប់ទីផ្សារបានយ៉ាងទូលំទូលាយ។ បម្រើអតិថិជនជាង ៧ ម៉ឺននាក់ប្រចាំថ្ងៃ LeCab ត្រូវបានជាប់ឈ្មោះជា Uber ក្នុងប្រទេសបារាំង។

ក្រៅពីការបម្រើសេវាតាក់ស៊ី ក្រុមហ៊ុនមានសេវាកម្ម LeCab Fly ដែលអនុញ្ញាតឲ្យអតិថិជនធ្វើការហោះហើរទៅកាន់គោលដៅណាមួយ ជាលក្ខណៈឯកជន។ ក្រុមហ៊ុនបានប្រើប្រាស់រថយន្ត Peugeot 508 ផលិតនៅបារាំង ជារថយន្តស្តង់ដាសម្រាប់ប្រើសម្រាប់ដឹកជញ្ជូនរបស់ខ្លួន។

LeCab មានចំណុចពិសេសបើអ្នកដំណើរចង់លុបចោលការកក់ គ្រាន់តែក្រឡុក (Shake) ទូរសព្ទ ដើម្បីមកកាន់ទំព័រព័ត៌មានដើមវិញ។ ការធ្វើដំណើរទៅដល់ទិសដៅអតិថិជន ធានាចំណាយពេលត្រឹមតែ ៧ នាទីប៉ុណ្ណោះ។

-ប្រទេសប្រតិបត្តិការ៖ បារាំង (ប៉ារីស)

៩.Cabify

Cabify គាំទ្រទាំងលើប្រព័ន្ធ Andorid និង iOS។ អ្នកអាចធ្វើការបង្កើតគណនីច្រើនក្នុងកម្មវិធីតែមួយបាន គួបផ្សំមុខងារកក់សម្រាប់នរណាម្នាក់ ជាមួយនឹងតម្លៃថោកសមរម្យ។ ក្រៅពីនោះក៏មានមុខងារពិនិត្យមើលការធ្វើដំណើររបស់អ្នក, វាស់ស្ទង់តម្លៃ, ចម្ងាយនៃការធ្វើដំណើរ និងជម្រើសនៃការទូទាត់ច្រើនបែប។

-ប្រទេសប្រតិបត្តិការ៖ អេស្ប៉ាញ, ឈីលី, ប៉េរូ, ម៉ិកសិក, កូឡំប៊ី

១០.Bitaksi

ជាក្រុមហ៊ុនតាក់ស៊ីល្បីបំផុតនៅទីក្រុងអ៊ីស្តាន់ប៊ុលប្រទេសតួគី។ ក្រុមហ៊ុនមានអ្នកប្រើប្រមាណ ២០ ម៉ឺននាក់ និងមានអ្នកបើកបរជាង ៣៤ ០០០ នាក់។

Bittaksi ផ្ដល់នូវមុខងារពិសេស Traffic en route ដែលអាចឲ្យអ្នកដំណើរមើលឃើញពីចរាចរណ៍លើដងវិថី ដើម្បីពង្រឹងភាពទុកចិត្តនិងសេវាកម្មកាន់តែប្រសើរ។ រាល់អ្នកបើកបរទាំងអស់ សុទ្ធសឹងតែមានប័ណ្ណបើកបរ ហើយស្វាគមន៍ក្នុងការផ្ដល់យោបល់និងដាក់ពិន្ទុពីអតិថិជន។

-ប្រទេសប្រតិបត្តិការ៖ តួគី (អ៊ីស្តាន់ប៊ុល)

១១.goCatch

ជាក្រុមហ៊ុនលំដាប់កំពូលមួយរបស់ប្រទេសអូស្ត្រាលី ដោយផ្ដល់នូវមុខងារពិសេសម្យ៉ាង បើអ្នកទូទាត់ថ្លៃសេវាកម្មតាមរយៈ Credit Card វានឹងកាត់តែ ៥ ភាគរយប៉ុណ្ណោះ ខុសពីការទូទាត់តាមស្តង់ដារធម្មតាកាត់ដល់ ១០ ភាគរយ។

អ្នកដំណើរអាចត្រួតពិនិត្យព័ត៌មានលំអិតរបស់អ្នកបើកបរតាមរយៈ Photo ID និងការឆែក ABN ដើម្បីផ្ដល់ទំនុកចិត្តខ្ពស់លើសុវត្ថិភាពនៃការធ្វើដំណើរ។ ក្ដោបក្ដាប់លើវិស័យរថយន្តតាក់ស៊ីប្រមាណ ៤០ ភាគរយក្នុងស្រុក goCatch មានអតិថិជនជាង ៣០ ម៉ឺននាក់ និងអ្នកបើកបរប្រមាណ ៣ ម៉ឺននាក់។

-ប្រទេសប្រតិបត្តិការ៖ អូស្រ្តាលី

១២.Ingogo

Ingogo ជាក្រុមហ៊ុនតាក់ស៊ីដ៏ល្បីមួយទៀតរបស់អូស្ត្រាលី ដោយអនុញ្ញាតឲ្យអតិថិជនអាចកក់ទុកជាមុនរយៈពេល ៤៨ ម៉ោង។ នៅពេលជិះធ្វើដំណើរ អតិថិជនអាចត្រួតពិនិត្យការធ្វើដំណើរបានទៀតផង។ ក្រៅពីតម្លៃសេវាកម្មថោកសមរម្យ ក្រុមហ៊ុននេះផ្ដល់នូវសុវត្ថិភាពនិងទំនុកចិត្តជាចម្បង។ សព្វថ្ងៃមានដំណើរការនៅទីក្រុង ស៊ីដនី, ម៉ែលប៊ន និងប្រីសបេន។

-ប្រទេសប្រតិបត្តិការ៖ អូស្រ្តាលី

អានអត្ថបទបន្ទាប់

ប្រភព៖ BeeBom | linkedin ប្រែសម្រួល៖ កៅ រក្សា