Sterling ថាខ្លួន មិនដែលគិតចង់ចាកចេញពី Man City ទៅលេងឲ្យ Arsenal

2017-10-17 11:39:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធល្បឿនលឿន Raheem Sterling កាលពីពេលថ្មីៗនេះបាននិយាយថាខ្លួនមិនបានគិតសូម្បីតែមួយនាទី អំពីពាក្យចចាមអារាមដែលថាខ្លួននឹងចាកចេញពីក្លឹប Manchester City ដើម្បីទៅចូលរួមជាមួយ Arsenal កាលពីអំឡុងពេលរដូវកាលដោះដូរកីឡាករដែលទើបនឹងបិទបញ្ចប់ខែមុននេះ។

នៅក្នុងសន្និសីទសារព័ត៌មាន Champions League ពេលសួរថាខ្លួនមានបាននិយាយជាមួយ លោកPep Guardiola ពេលលឺពាក្យចចាមអារាមទាក់ទងនឹងក្លឹប Arsenal ឬអត់ ខ្សែប្រយុទ្ធវ័យក្មេង Sterling បានឆ្លើយទៅវិញថា៖ "ខ្ញុំមិនចាំបាច់និយាយជាមួយគាត់ (Pep) អំពីរឿងហ្នឹងទេ ដោយសារតែខ្ញុំបាននិយាយយ៉ាងច្បាស់ហើយជាមួយគាត់ហើយ តាំងពីរដូវកាលថ្មីមិនទាន់បានចាប់ផ្ដើមម្ល៉េះ"។

កីឡាករសញ្ជាតិអង់គ្លេសរូបនេះបានបន្តទៀតថា៖ "ខ្ញុំមិនបានគិតអ្វីច្រើនទេអំពីពាក្យចចាមអារាមមួយនេះ ពីព្រោះពាក្យទាំងនេះមិនមែន Pep ជាអ្នកនិយាយ អ៊ីចឹងទាល់តែ Pep និយាយអំពីរឿងហ្នឹងទើបខ្ញុំជឿ"។ Sterling បានបញ្ជាក់ទៀតថា Pep គឺជាមនុស្សស្មោះត្រង់ ខ្ញុំដឹងថាគាត់នឹងនិយាយជាមួយខ្ញុំអំពីរឿងហ្នឹង បើសិនជាវាជារឿងពិតមែន អ៊ីចឹងហើយ ទើបខ្ញុំមិនបានគិតខ្វល់ខ្វាយសូម្បីតែមួយនាទីទាក់ទងនឹងពាក្យចចាមមួយនេះ"។

ពាក្យចចាមអារាម និងរបាយការណ៍ជាច្រើន ចុះផ្សាយកាលពីអំឡុងរដូវកាលដោះដូរកីឡាករថា Manchester City នឹងធ្វើការផ្ទេរ Sterling ទៅឲ្យ Arsenal ជាថ្នូរនឹងការបានខ្សែប្រយុទ្ធ Alexis Sanchez ពីក្លឹបយក្សឡុងដុងមួយនេះត្រលប់មកវិញ។ ទោះជាយ៉ាងនេះក្ដី នៅក្នុងអំឡុងពេលនោះ អ្នកចាត់ការ Manchester City លោក Pep Guardiola បានច្រានចោលពាក្យចចាមអារាមមួយនេះ ដោយថាវាមិនអាចទៅរួច៕

ចុចអាន៖

ប្រភព៖ ESPN FC ប្រែសម្រួល៖ ហ៊ីម រស្មី