សង្វៀនប្រយុទ្ធស្លាប់រស់រវាងជ្រូកព្រៃ និងឆ្កែស្រុកនៅឥណ្ឌូនេស៊ី អ្នកឈ្នះបានខ្ទង់ពាន់ដុល្លារ

2017-10-18 09:12:16
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកភូមិមួយនៅឥណ្ឌូនេស៊ី បានរៀបចំកម្មវិធីប្រយុទ្ធស្លាប់រស់រវាងសត្វជ្រូកព្រៃ និងឆ្កែស្រុកក្នុងសង្វៀនឫស្សីដ៏ធំដោយមានមនុស្សរាប់រយនាក់ចោមរោមមើល និងហ៊ោកញ្ជ្រៀវទ្រហឹងអឺងកង។

ប្រពៃណីបង្ហូរឈាមសត្វនេះមានឈ្មោះ Adu Bagong តែងតែប្រារព្ធធ្វើឡើងនៅភូមិដាច់ស្រយាល ក្នុងខេត្ត West Java ដោយមានឆ្កែមួយក្បាល និងជ្រូកព្រៃមួយក្បាលដាក់ឲ្យខាំគ្នាក្នុងសង្វៀនទំហំ ១៥ម៉ែត្រ គុណនឹង ៣០ម៉ែត្រ។

អ្នកចូលរួមក្មេងចាស់ប្រុសស្រី បានចោមរោមមើលដូចគេប្រកួតកីឡា និងស្រែកហ៊ោពេលសត្វម្ខាងខាំ ឬឈ្មុសត្រូវ។ ប្រពៃណីនេះ ត្រូវបានអ្នកស្រុកអនុវត្តជាច្រើនទសវត្សរ៍មកហើយប្រហែលនៅឆ្នាំ ១៩៦០។

ពិធីផ្ដើមឡើងដំបូង គឺនៅពេលអ្នកស្រុកអ្នកភូមិបានព្យាយាមការពារចម្ការពួកគេមិនឲ្យជ្រូកព្រៃបំផ្លាញ រួចក៏បង្វឹកសត្វឆ្កែឲ្យចេះប្រមាញ់ជ្រូកជ្រៃតែម្ដង ហើយទម្លាប់នេះក៏បានធ្វើតៗគ្នា រហូតមានការចាក់ភ្នាល់ទៀតផង។

ការប្រកួតតែងតែធ្វើឡើងរៀងរាល់ចុងសប្ដាហ៍នៅតាមភូមិផ្សេងៗ ហើយសត្វទាំងពីរត្រូវបង្ខំឲ្យប្រយុទ្ធគ្នារហូតម្ខាងរបួស ឬស្លាប់។ ដើម្បីចូលរួមប្រកួតម្ចាស់ឆ្កែត្រូវបង់ប្រាក់យ៉ាងតិច ១៤ ដល់ ១៥០ដុល្លារ ហើយឆ្កែត្រូវបែងចែកជា ៣ប្រភេទទៅតាមពូជ ទម្ងន់ ហើយអ្នកឈ្នះនឹងទទួលរង្វាន់ប្រមាណ ២ពាន់ដុល្លារ។

ទោះយ៉ាងណា សកម្មជនការពារសិទ្ធិសត្វឥណ្ឌូនេស៊ី បានចាត់ទុកពិធីនេះជា ឧក្រិដ្ឋកម្ម និងអំពាវនាវឲ្យរដ្ឋាភិបាល និងអង្គការមិនមែនរដ្ឋាភិបាលចុះអន្តរាគមន៍បញ្ឈប់ព្រឹត្តិការណ៍នេះផងដែរ៕