អ្នកលក់នំកូននាង រកចំណូលប្រចាំខែបានមិនធម្មតា
- 2017-10-19 23:20:00
- ចំនួនមតិ 0 | ចំនួនចែករំលែក 0
អ្នកលក់នំកូននាង រកចំណូលប្រចាំខែបានមិនធម្មតា
ចន្លោះមិនឃើញ
បុរសម្នាក់សម្រេចចិត្តឈប់ធ្វើការឲ្យអ្នកដទៃហើយងាកមកបើករបរផ្ទាល់ខ្លួន ដោយថាធ្វើការឲ្យអ្នកដទៃមិនមានសរីភាពការងារ និងមិនអាចបង្កើតជោគជ័យសម្រាប់ជីវិតបាន។
លោក ហេង សុខលី បានធ្វើការជាចុងភៅនៅភោជនីដ្ឋានមួយក្នុងក្រុងភ្នំពេញកាលពីបីឆ្នាំមុន។ លោកបានសម្រេចឈប់ពីការងារនេះ និងងាកមកបើករបរធ្វើនំពោត និងត្រាវបំពងលក់ដោយខ្លួនឯងវិញ ហើយលោកដាក់ឈ្មោះនំនេះថានំកូននាង។ ក្នុងរយៈពេលបីឆ្នាំប្រកបរបរនេះនៅក្រោយវិទ្យាស្ថានវ៉ាន់ដា លោក សុខលី បានទទួលការគាំទ្រច្រើនពីអតិថិជន ទូទៅ ជាពិសេសសិស្សសាលា និងបុគ្គលិកក្រុមហ៊ុនឯកជន។
បុរសមានប្រភពមកពីស្រុកស្អាង ខេត្តកណ្តាល រូបនេះឲ្យដឹងថាការងារជាចុងភៅរយៈពេលប្រាំបីឆ្នាំ បានធ្វើឲ្យលោកមានបទពិសោធន៍ចម្អិនអាហារ ហើយបទពិសោធន៍នេះធ្វើឲ្យលោកចង់បើករបរធ្វើនំលក់ដោយខ្លួនឯង។
លោកឲ្យដឹងថាលោកបានផ្សំរូបមន្តធ្វើនំនេះដោយខ្លួនឯង ដែលលោកថាការរៀនបង្កើតអ្វីដែលថ្មីគឺដើម្បីភាពជោគជ័យក្នុងជីវិត។
បើនិយាយពីចំណូលប្រចាំខែវិញគឺមិនធម្មតានោះទេ ដោយលោកថាអាចរកបានជាងមួយពាន់ដុល្លារក្នុងមួយខែៗពីអាជីវកម្មមួយនេះ។ លោកឲ្យដឹងដែរថា នៅថ្ងៃណាមួយលោករំពឹងថានឹងអាចពង្រីកមុខរបរនេះ ឲ្យកាន់តែធំជាងនេះ ឬបង្កើតសាខាទៀត ប្រសិនទៅថ្ងៃមុខ នំកូននាង របស់លោកកាន់តែមានប្រជាប្រិយភាពខ្លាំងទៀតនោះ៕